HIIƂULUITIƐ 8

Deʋe niinɛi malaa‐ʋaale gwalai

1Tɔwɔ faa ɣaa wuai é fai nii zu gé bosu tɔ ga nii. Na ɣa ga nii ɣavele laa‐ʋaale gwalai ɣa de ya. Tɔ ga nui é zeini ga nu yee za‐su vele gee‐zuvɛ ɣalaso gwalai zei ƃɔkpɔgi ʋaa va. 2Tɔ ga tii‐ɣɛɛ nu ŋada maa wuai zu, na ɣa ga gaama zeɣe vɛlɛ ƃɔɔƃɔɔgi. Seɣe vɛlɛi nii lɛ loni ga nu ƃuse yee, kɛ̀ de maliɣii ɣa togɛi bɛ́. 3Ƃɔvɛlaale laa‐ʋaale gwala nɛpɛ kulovɛ ga é faa‐nɛɛ‐ɣɛɛ ŋɛniitiɛ leve Gala pɔ é zalaɣa wulo. Na ma pagɛ laa‐ʋaalegi nii tɔ ƃalaa ŋɛni ta ɣɛ zéea ga é teve. 4È ɣɛ é ɣɛni zui ɣa, ɛ́ lɛ ƃega ɣɛ ga laa‐ʋaale. Ƃɔvɛlaale laa‐ʋaalega ta na tiɛ faa‐nɛɛ‐ɣɛɛ ŋɛnia leve Gala pɔ, è ɣɛ velei nɔ tɔgi laa woi la. 5Ŋada maa wuai nii é Gala ta mawo‐kɔ̃ɔ nɔ ɣa zui zu laa‐ʋaalegitiɛ te tii ɣɛɛzu ma é nɔ ga maa‐niini. Ƃɔvɛlaale tei Mooze ɣɛni vaazu seɣe vɛlɛi vilesu, Gala ka é deʋeni é da zéea yíɛ ɣɛ ma, “Wɛlɛ na va ga ŋɛniitiɛ ɣaazɔ te ƃɛtɛ ga velei gè kpɛtɛ velei lɛɛni la ga yìɛ gizi gwalai ma.” 6Kɛ̀ è ɣɛ velei é la, Kolai tii maa zɔlɔ woga nii maʋaa wala vagɛi é leve mawɔlɔ‐zaɣagi va. Vele nɔ na é la ga deʋei nii é zɔɔzu‐ƃɛtɛɛ wosu su. Toku ge zei ga deʋei nii laavɛ ki‐to pagɔ zu é leve mawɔlɔ‐zaɣagi va.

7Su‐wulo‐zu ɣa ga è ɣɛ faa ta lɛ ŋɛni deʋe maa wũgi va, fele kele maƃala lɛ ƃega ɣɛ nu ma. 8De maliɣii Gala kwɛlɛ vele ma faa ta va numai niitiɛ va te deʋe maa wũgi yee wu, tɔ fai nii wosu yíɛ ɣɛ tea,

“Siɛgi ɣa vaazu ziitizu ga gè deʋe niinɛ la

Yezɔi vɛlɛi wu ta Juda vɛlɛi.

9Ɛ́ lɛ ɣɛɛ ga deʋei nii ɣavele gè daani

te mama gwɔlɔni zeea ga ʋoloi na gè yee

looni la te ya gè wulo ga tiɛ Iije yui va.

Toku ge zei ga tɛ lɛ ɣatani zia va ga nà deʋei.

Na ma gɛ̀ lɛ wui toni te maʋaa ma.” De maliɣii

ɣa é na wosu.

10De maliɣii ɣa ɣɛɛzu tea, “Deʋei nii ɣa

gè vaazu daazu Yezɔi vɛlɛi wu ga ná luo vele.

Gà nà tɔgitiɛ wu te ɣigi zu, gè ponɛ te

yiitiɛ ma.

Na ɣa ɣɛɛ na gè ɣɛ ga ta Ɣala te ɣɛ ga

nà numaa.

11Tɛ lɛ vilega te ɣile‐giledai tɔ ɣɛ ɣɛɛzu

te vaitiɛ ma ɔɔ te ɣaa yɔ̃wɔitiɛ,

‘A de maliɣii wɛ̃ɛ.’ Toku ge zei ga te pɛ ta kẁɛ̃ɛ,

é ziɣi ƃɔɔ nui nii ma toai te pɛ te wu

é loo nii ma é te pɛ te maazu.

12Ƃɔvɛlaale gà ɣɛ ga maa‐wõi‐ɣaa‐wo nu

te luo vele yowũitiɛ zu.

Gɛ̀ lɛ sa wɔlɔ‐wɔlɔ ta ʋaa yowũitiɛ

laa ga yee ƃeɣa.”

13Tei é ɣɛni ƃɔɛzu é vile deʋe niinɛi va, é mamaa wũgi ziɣini ga deʋei nii ná tii lɛ sa na. Tɔwɔ ŋɛnii nii ná tii ɣa ɣɛ valasu ŋetea yíɛ wɔlɔ zaɣa, su ɣa sa a ɣɛ ƃuozu ga maŋɛnii maʋaa ƃea gá.

Currently Selected:

HIIƂULUITIƐ 8: DN1971

Highlight

Copy

Compare