HIIƂULUITIƐ 5
5
1Laa‐ʋaale gwalai nɛpɛ kuloai nu ƃuse zaama tɔ ga nui te yee ƃadogɛi ba ga é nu ƃusea ta lo bo te yɔɔzuvɛ ʋaa ma ta Galani ga manui yìɛ faa‐nɛitiɛ laa ziiti Gala ma yíɛ zalaɣa wulo faa yowũ ʋaa ma. 2Niitiɛ te liti su ta niitiɛ te ziɣiai pele va, towaa te zo ga sɛ‐sɛ‐bo pele, tei tɔwɔ tɔ ɣagi ɣa ɣɛ ga nui toai bi ga zobo‐bala‐bɛ. 3Nii mazaƃui ma kɛni tɔ ɣagi zalaɣa wulo ná faa yowũitiɛ ʋaa ma é kulo wɔnɔ numaitiɛ ta dɛi ʋaa ma. 4Manui lɛ vaa ga ƃaa‐la‐ma ƃɔɔ wɔ ga é ƃɔɔ ɣɛ ga laa‐ʋaale gwala. Kɛ̀ Gala ka tiligɛi bɛ́ fai nii ma è ɣɛ velei é kɛɛni la ga Eelɔ̃.
5Vele nɔ na é la ga Kolai. Ɛ́ lɛ ƃɔɔ wɔɔlɔni ɔ́ ƃɔɔ ɣɛ ga laa‐ʋaale gwala. Kɛ̀ nui é fai nii woni ma towa é yee ƃadoni ba. Fai na ɣa ga,
“Yà ga dùu. Zaa ɣa gè ɣɛɛ la ga è ɣeea.”
6Tɔ bosu wɔnɔ ŋadɛi ta ƃɔnɔ Gala kɔlɔi ʋaa va yíɛ ɣɛ tea,
“Yà ga laa‐ʋaale wɔlɔ‐wɔlɔ ta wɔlɔ‐wɔlɔ.
Yà laa‐ʋaale fai ɣa ɣɛ Mɛkisidɛ na laa―
ʋaaledai maleʋei zu.”
7Siɛgi Ziizɛ ɣɛni la nu ƃuselai zu, nui nii zobo ge bɛ́ ga é saa ʋoola bá, é nà ʋelini yíɛ maa nɛɛnɛ ga woo wala gaazu‐maa‐yiɛi yìɛ loo ma. Tɔwɔ Gala ge goo mɛnini ná Gala duo‐ba ŋeteai ʋaa zu. 8Velei ƃalaa é ɣɛni la ga Gala duu, é goo‐mɛni‐kuloa maa wolini daa‐nɔwɔ‐wogi é boni saala zu. 9Tei sa é ɣɛɛni ga nui maa‐wulo‐zu lɛ maʋaa va, é ɣɛɛni ga balolai kwɛ̃ɛ gɛ lɛ ba nà lo‐kala‐suvɛ niitiɛ ɣaazɔ ʋaa ma ta goo‐mɛni kulo zéea. 10Toku ge zei ga kulovɛ Gala bɛ ga laa‐ʋaale gwala Mɛkisidɛ na laa‐ʋaaledai maleʋei zu.
Tɛnɛgi é vile nu ziɣi ʋai va Gala tuo wulu
11Faa lamagɛ gé la ga gé bo é vile laa‐ʋaaledai nii va. Tɔwɔ kpai ga nu kavele zu wulo, toku ge zei wa ʋaa‐mɛnisu‐ƃaa ʋai va. 12Su‐wulo‐zu ɣa ga velei ƃalaa maa nɛɛ wo ɣɛ sa la ga kala‐mɔa siɛgi nii ma, to mu kɛni dɛ nu ɣa Gala daa woi maleʋe maa wũgitiɛ lɛ ga wiɛ wɔnɔ. Ŋini yiɛ ɣa dɛ pagɛi wo ʋaa ma, kɛ̀ ɛ́ lɛ ga daa‐mii ŋɛni ƃaana. 13Nui nɛpɛ daa‐mii ŋɛni ga ŋini yiɛ nɔ manui lɛ laalia tele‐bo tuoi mawoi ʋaa zu, ƃɔvɛlaale towaa ɣɛ ga lopo wolo. 14Kɛ̀ daa‐mii ŋɛni ƃaanagi ɣa nui nii ʋaa ma pɔlɔi. Na ɣa ga niitiɛ ta ɣi‐gaa‐ziɛ ɣaa‐ƃai maa woloai tiɛ faa vagɔ ƃɔga faa yowũ te yɔɔzu‐wulo vele ma te vɛ ti‐ti.
Currently Selected:
HIIƂULUITIƐ 5: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
