GALEESIAITIƐ 4

1Nii gè boga su‐wulo‐zu ɣa ga nui é ga po ŋɛni keea nui, ani nɔ tɔ dɛ ga lopo wolo ɛ́ lɛ ʋizɛ woga duo va, velei ƃalaa pó ka ɣɛɛ la ga kéea weligitiɛ. 2Kɛ̀ towaa ɣɛ gaazu‐kɛɛ‐ba vea wu ta kweligi maazu‐vɛtɛ beaitiɛ é yɛsu kui nii kéea toga é ziiti. 3Vele nɔ na é la ga diɛ. Tei de ɣɛni ga lopaa de ɣɛni ga dua zuu ƃɔga gee te zu ʋaitiɛ ya. 4Kɛ̀ tei kui woloni ga lɛ gá, Gala ge dui leveni nii kái ŋaza nu vɛ, kái tɔgi yee wu 5ga niitiɛ te tɔgi yee wu é te wũ maa wo, kɛɛ ʋaa ma de ziɣi ʋai Gala bɛ ga dea de ná maa zɔlɔ wo. 6Gala ge dui vaa ŋinɛgi levega de yii zu yíɛ loba yíɛ ɣɛ tea, “Aba”, na ɣa ga “Kèea”. Nii ɣa dɛ ga wa ga Gala dea. 7Na ma Gala saala zu ɛ̀ lɛ sa wɔlɔ‐wɔlɔ ga duo. Kɛ̀ yà ga Gala duu. Ani tɔwɔ yà ga Gala duu, è ɣɛɛ ɣa na ga kweligi keea nu.

Pɔɔ ƃala ʋai Ziizɛ maa veaitiɛ ʋaa ma

8Tei dɛ mamaa wũgi zu wɛ lɛ ŋɛni ga Gala kwɛ̃ɛga, wo ɣɛni duola zu ʋulu ŋɛnii niitiɛ ya tɛ lɛ ga Gala ga gaama. 9Kɛ̀ tei tɔwɔ sa wo Gala kwɛ̃ɛga, ɔɔ to mu fɔlɔ wo ɣɛ ga nui niitiɛ yá te wɛ̃ɛ, wa leve sa kɔnɔ ɣɛ le wo gale ma wulu zuu ƃɔga gee te zu ʋai niitiɛ wɔ te ga faa yãkaa te ɣɛɛ‐zu lɛ ma ga wo ɣɛ ga ta lua? 10Wa foloniga wulo su leelaa wiɛ te maʋaa ziɣi ga faa ɣaa wua é vɛɛ ɣaloga va! Wa daamɔdai ɣɛ ga siɛgi taniga wiɛ wɔnɔ kɛ ga kwenagi taniga! 11Gà luozu ɣi su ga gè wo mamɔɔlɛ woga nɔ ƃɔɔvɛ.

12Nà numaa, wo vee ʋaa ve. A ƃɔɔ ɣɛ ga kàvele, toku ge zei ga nà ƃaagi gè ƃɔɔ ɣɛɛ ga velei wo la. Wɛ lɛ faa ta nɛpɛ kɛɛni gàazu. 13Wo kwɛ̃ni ga dɔtɔ‐zu‐wodo lala mazaƃu ɣa gè woo niinɛ vagɔi woni la wo ma ɣaʋu pa. 14Velei ƃalaa màʋai ƃɛtɛ vele ɣɛni la wo ya ga su‐wɔ̃ɔ faa, wɛ lɛ gàazu ƃala‐ƃalani ɔ́ nɔ ɣɛ ga wo ɣaazu wudɛ màazu. Kɛ̀ wo yee zeini bù è ɣɛ Gala ta ɣeela, yà ka è ɣɛ wɔ ɣɛ nɔ kɛɛzu ga Ziizɛ Kolai ɣagi. 15Zɛƃɛ mu ka sa é ɣɛɛ ga zii‐lai é woni ga wiɛ? Ƃɔvɛlaale gà seele woo ʋeezu ga è ɣɛ ɔ́ zolowo na, a wɔ ɣaazu ɣɛzɛgitiɛ wulo kala zu wo te ʋe zèea. 16?Gè ɣɛɛ ʋaa ve ga wo zili yɔ̃wɔ gaamai‐wo faa ma bɛ̀ wo ma? 17Numai niitiɛ ta wɔɔlɔzu wo maʋaa zu ga wo ɣɛ ga te wɔ vele, kɛ̀ tɔwɔ tɛ lɛ kɛɛzu zaƃu vagɔ ma. Te wõini te pelei laa wulu wo luo, kɛɛ ʋaa ma wo wɔɔlɔ te maʋaa zu. 18Pagɛ wo maʋaa wɔɔlɔ numaa ɣaazu siɛ ta nɛpɛ ma, ani ta kɛɛzu zaƃu vagɔ. Ɛ́ lɛ nɔ ga gà ɣɛ na wo woba. 19Dèa woloitiɛ ―gà yɛsu wo malaa‐nɔwɔ‐wo bosu, è ɣɛ duu‐ɣaa wuu‐zu‐wãla ɣa ɣɛ ŋaza nu va, é yɛsu Kolai maʋai wooli wo ɣigi zu. 20Gɔ̀ wõi ɣɛ gè ɣɛ wo woba nii zu gè ƃɔɔ yɛpɛ woi maa ʋeli, ƃɔvɛlaale gà pɔ̃ɔ é vile wo maʋai va.

Heega ƃɔga Seelɔ te maʋaa wɔlɔ‐zaɣagi

21Waitiɛ wo wõini wo ɣɛ tɔgi maɣaa‐ƃai yee wu, gà wo ɣaa‐zaɣa kɛɛzu nii ma.? Wɛ lɛ tɔgi laa woi mɛnisu? 22Ponɛvɛ Gala kɔlɔi zu ga Eeƃɔlɔhɛ̃ɛ dea zinaa te ɣɛni fele. É gila kaani duo ŋaza nu va é gila ka wɔɔlɔ va. 23Kɛ̀ duo ŋaza nui ná dɔ lui ɣaani ga nu ƃuse luu‐ɣaa vele, tɔwɔ wɔɔlɔi ná dɛi ɣa Gala na ki‐togi zaala zu. 24Nii ɣa ga faa wɔlɔ‐zaɣagi bogɛi ga é fai ɣavele zu wulo. Ŋazai niitiɛ maʋaa zu‐wulo‐zu ɣa ga Gala na deʋe felegɔ. Deʋei ɣilagi wulovɛ gizi gwalai Sainai ma. Na ɣa ga ŋaza nui nii é dui ɣaazu ga kuu‐zu nu zuwuitiɛ te ɣɛ ga dua. Ŋaza nui nii laa ɣa ga Heega. 25Heega zu‐wulo‐zu ɣa ga gizi gwalai Sainai é Aleebia yui zu. Mawo‐kɔ̃ɔgi ɣa ga Yɛlusulɛɛ nii za é na, ƃɔvɛlaale Yɛlusulɛɛ lai vɛɛ su vea va ta duola zu. 26Yɛlusulɛɛ nii é Gala ta ɛ́ lɛ duola zu. Tɔ wɔ ka é ga de lee. 27Ƃɔvɛlaale ponɛvɛ Gala kɔlɔi zu mawoi ga

“Yài è ga kubu‐ʋɔɔ ŋaza nu ɛ̀ lɛ duu ɣaazu,

kuu‐zu‐nɛɛ wulo.

Yài duu‐ɣaa wuu‐zu‐wãla lɛ vɛɛzu yìɛ,

loba kpala ga kuu‐zu‐nɛɛ.

Ƃɔvɛlaale kɛlɛ‐bɛ ŋaza nui dea ta lama

é leve ŋaza nui nii va ta pɔɔ nu te ma.”

28Tɔwɔ, nà numaa, wo maʋai wulovɛ ga Aize. Wa ɣa wo ɣai ga Gala na ki‐togi levea‐ma. 29È ɣɛ velei nɔ é ɣɛni la siɛgi na zu, vele nɔ na é la nii zu ƃalaa. Na ɣa ga nui te kaani ga nu ƃuse ɣaa vele manui é nui nii ƃɔɔlani te kaani Gala baa ŋinɛgi zaala zu. 30Tɔwɔ zɛƃɛ ɣa Gala kɔlɔi bosu? Tɔ ɣɛɛzu tea, “Duo ŋaza nui ƃɛ é vɛɛ dúi va, ƃɔvɛlaale duo wuu‐zui ƃɔga wɔɔlɔ wuu‐zui tɛ lɛ ƃɔga po ŋɛni ma.” 31Na ma nà numaa, dɛ lɛ ga duo wuu‐zua. Da ga wɔɔlɔ wuu‐zua.

Currently Selected:

GALEESIAITIƐ 4: DN1971

Highlight

Copy

Compare