GALEESIAITIƐ 2

Ziizɛ na keelai zɔitiɛ te yee‐zei ʋai Pɔɔ wu

1Tei sa kwena puugɔ kai naagɔ wuloni su, Banaba vɛɛni bà gé li kɔnɔ Yɛlusulɛɛ. Gé Taitɔ ziɣini gá tiɛni gé li. 2Gè liini máʋai‐wulo vele ma kɛnɛ ma gàazu ga gè li. Na ɣa ɣɛɛ na woo niinɛ vagɔi gè bosu zii ƃalaagitiɛ ma gè maʋai laani niitiɛ laa wu te lɔwɔ vagɔi wuloai ɣɛ. Nà wɔ gè nii ɣɛɛni gá letele ŋada laa. Gè daani te laa wu kɛɛ ʋaa ma gè mɛ lɛ ɣɛ faa yãka maa ƃize yɛvɛsu pele ta zu ɔɔ gè mɛ lɛ ɣɛ faa yãka maa ƃize yɛvɛni pele ta zu. 3Kɛ̀ velei ƃalaa Taitɔ ɣɛni la bà é ga Geliiki nu, tɛ lɛ kɛlɛ gbɛdɛni ga sei‐kpoto‐ma wo da. 4Numaa te ɣɛni na te ƃɔɔ wulo ga de vaitiɛ te ta, ta wɔ tɛ lɛ ŋɛni ga te ta. Ta ɣa te vaani sĩi doowu zu ga te gé maa ʋɛɛnɛ, kɛɛ ʋaa ma de yee‐laa‐ʋũigi bogɛi de ɣɛɛ vele ma su ɣilekpu da Ziizɛ Kolaini te minɛ wu maa ƃɛɛ ga te de wolo kpa. 5Gɛ́ lɛ kɛɛni gɔ́ laa zei bu te ya ga ta wolo ƃalaa. Gé nii ɣɛɛni kɛɛ ʋaa ma woo niinɛ vagɔi maɣaamai yɛ laani daa‐zu wo ʋaa ma. 6Niitiɛ te lɔwɔ vagɔi wuloai ɣɛ ga ta ga nu mazii ta, gà bosu ga gɛ̀ lɛ faa niinɛ ta nɛpɛ maa wolini te ya. Nui maziitiɛ te ɣɛni le maʋaa lɛ ŋɛni ga faa ta nɛpɛ gàazu. Gala gɛ lɛ nu zu yɛvɛga. 7Kɛ̀ to mu te wɛlɛni na va ga tògɛ woo niinɛ vagɔi maʋaa ƃawola sei‐kpoto‐ma lala veaitiɛ ʋaa ma, è ɣɛ velei nɔ Pite ɣɛɛ la maʋaa ƃawola sei‐kpoto‐ma veaitiɛ ʋaa ma. 8Toku ge zei ga nui é kɛɛni Pite yíɛ tii nii ɣɛ sei‐kpoto‐ma veaitiɛ ʋaa ma, manui nɔ wɔnɔ ƃalaa é kɛɛ gìɛ kɛ zii ƃalaagitiɛ ʋaa ma. 9Tei te wɛlɛni na va ga velei gè maa‐wõi‐ɣaa ƃɔ‐bai maa zɔlɔ woni la, nui é ga Jĩi ta Siifɛ é vɛɛ Jɔ̃ va, natiɛ ta ga nuitiɛ te lɔwɔi wuloai ɣɛ ga ta ɣa te ga Gala pɛlɛi maziliɣɛ wuluitiɛ, te yee zeini gé wu gá Banaba ga gá tiɛni gé ɣɛ siɛ‐pulu zu ga gaama ga gé li zii ƃalaagitiɛ wɔ, ta wɔ te li sei‐kpoto‐ma veaitiɛ wɔ. 10Nii nɔ te ɣɛni wõi ɣɛɛzu ga gé kɛ é ɣɛni ga gé ɣi zɛ maa‐wõi veaitiɛ ʋaa zu. Tɔwɔ minɛ ƃɔɔƃɔɔ nɔ ɣa ná wõi wɔɔlɔi ɣɛ mà.

Pɔɔ loni Pite la

11Kɛ̀ tei Siifɛ vaani Ãteya, gè loni da gáazu, ƃɔvɛlaale tɔ ɣagi é dɛɛni ga ná dɛi lɛ ga gaama. 12Toku ge zei ga ta ƃɔga zii ƃalaagitiɛ tɔ dɛ laa mi ŋada ɣila numaa taniga tɔ teɣa ɣɛ wulozu Jĩi wɔ vɛ tɔ va. Tei sa natiɛ te vaani, é wuloni wulu é ziɣi sa zii ƃalaagitiɛ va duo vele ma sei‐kpoto‐ma nu ƃulugi va. 13Tɔwɔ Dusii zɔitiɛ te vɛɛni sa bá ta tiɛni te gaama lala luoi na ɣɛ. Nà kɛɛni ʋɔlɔ ƃalaa Banaba yii wu ziɣi é vɛɛ te va ta ɣaama‐ɣɛɛ lala luoi zu. 14Kɛ̀ tei gè wɛlɛni na va ga te ɣaa lɛ ŋɛni lɔni woo niinɛ vagɔi maɣaamai ʋaa zu, gè boni Siifɛ ma te pɛ te ɣaazu gè ɣɛ ma, “Velei ƃalaa è la ga Dusi nu, yà ɣɛ na luozu è ɣɛ zii ƃalaagi ta ɛ̀ lɛ luozu ga Dusi nu luo vele, yà zoo ɣɛ le è zii ƃalaagitiɛ ɣɛlɛ gbɛdɛ ga te luo è ɣɛ Dusia?”

Dusia ta zii ƃalaaga ta valo zee‐la‐mai zaala zu

15Gái gé ga Dusia gé ɣagi gé wulovɛ ga Dusilai ŋetea gɛ́ lɛ wuloni ga zii ƃalaada, na ɣa ga niitiɛ te ga faa yowũ‐ɣɛɛ vea. 16Na pɛ ge ɣɛɛvɛ gé kwɛ̃ni ga nu ɣɛɛ‐zɔ yowũi ɣɛɛ lɛ boga ba ga faa ɛ́ lɛ ziɣia Gala na tɔgi zu lii‐ɣɛɛ vele la manui vɛ. Kɛ̀ dai yá bo ga Ziizɛ Kolai, nà ɣa yá ɣɛ saala zu. To mu fɔlɔ Ziizɛ Kolai ʋaa ziɣivɛ gíɛ ga gaama, kɛɛ ʋaa ma gé ɣɛɛ‐zɔ yowũi mɛ lɛ ɣɛ gé va ga faa gé laa vele ma ga Kolai, kɛ̀ ɛ́ lɛ ga tɔgi zu lii‐ɣɛɛ vele gé vɛ. Ƃɔvɛlaale tɔgi zu lii‐ɣɛɛ lɛ kɛɛ nu ta nɛpɛ kɛɛ‐zɔ yowũi ɔ́ ƃe ɣɛɛzu ba ga faa. 17?Kɛ̀ ani gá ɣagi gé ɣɛni ga faa yowũ‐ɣɛɛ vea è ɣɛ velei nɔ zii ƃalaagitiɛ te la gé ɣɛi ma ɣaa ƃaazu ga gé ɣɛɛ‐zɔ yowũi mɛ lɛ ɣɛ gé va ga faa gé ɣɛɛ vele ma su ɣilekpu gá Kolaini, na zu‐wulo‐zu ɣɛɛ ɣa bogɛi ga Kolai ɣa tii ɣɛɛzu faa yowũ vɛ ʋaa ve? Ƃɔɔƃɔɔ su ɛ́ lɛ ŋɛ na! 18Kɛ̀ ŋɛnii niitiɛ gè te wolo‐woloni ani gà te lo na wɔnɔ, gà ƃɔɔ mazeele woo ʋe ga gà ga tɔ‐kãla‐ŋala nu. 19Toku ge zei ga tɔgi ɣɛɛ ga zaƃu gè za, kɛɛ ʋaa ma kpè ge leve tɔgi va gè ŋeteai ɣɛ Gala bɛ. 20Gè vɛɛni Kolai va te gé ƃako gului ma. Ɛ́ lɛ sa wɔlɔ‐wɔlɔ ga nà ƃɔɔ ɣa gè ŋeteai ɣɛɛzu, kɛ̀ Kolai ɣa é ŋeteai ɣɛɛzu zìi zu. Tuoi sa gè bosu nu ƃuse ŋeteai zu gà bosu ga dàa vele ga Gala dui, nii é ẁõiya é ɣi kulo ƃɔɔ zu màʋaa zu. 21Gɛ̀ lɛ Gala na maa‐wõi‐ɣaa ƃɔ‐bai maʋai ɣɛɛzu ga faa yãka. Toku ge zei ga nu ɣɛɛ‐zɔ yowũi lɛ ɣɛɛ ba ga faa, è ɣɛ maʋai ɣɛɛvɛ nɔ tɔgi zaala zu, a kɛ tii Kolai zaa ʋai mawũ gɛ lɛ ŋɛni ba.

Currently Selected:

GALEESIAITIƐ 2: DN1971

Highlight

Copy

Compare