KOLASAITIƐ 3

1Ani mu wo vɛɛ Kolai va wo wu ziɣi saa ya, ŋɛnii niitiɛ te de maazu vele a natiɛ maa vele ɣaa ziɛ. De maazu vele ɣa Kolai zeini la ga Gala zee za‐su vele. 2A ɣi kɛ ŋɛnii niitiɛ va te ná maazuvɛ, ɛ́ lɛ ga niitiɛ te ná wɔwɔ wuuvɛ zui ma. 3Ƃɔvɛlaale wo zaa. Na ɣa ɣɛɛ na wo yɛʋui vɛɛvɛ Kolai va doowugɛi Gala zeea. 4Kolai nii é ga wo yɛʋui a wulo na, wa sa ƃalaa pɛ wa wulo wo vɛɛ bá ná saala‐malai zu. 5Na ma nii nɛpɛgi é wo maʋaa va ga ŋeteai nii zu ʋaa, a te zu ŋala‐ŋala. Natiɛ ta ga wɛ̃ɛ‐ziɛ‐boga, nu‐wɔtɔ tuo, ŋaza nu ɔɔ zunu wõi‐leve‐ma, faa yowũ‐ɣɛɛ wõi‐wɔɔlɔ‐ma, é vɛɛ kuu‐zu‐yii va. Kuu‐zu‐yii ɣa nɔ ga maa‐niini gala‐felia. 6Niitiɛ te mazaƃui ɣa Gala na zii‐ɣaa‐wãlai ziitizu la goo‐mɛni tala vea ma. 7Wo vɛi ɣɛ na ɣavele veaitiɛ va wɔlɔ, tei dɛ na ɣavele ʋaitiɛ te mawõi wo maa ƃoaleai ɣɛ bɛ́. 8A niitiɛ ɣaazɔ loo ya ƃalaa pɛ. Natiɛ ta ga zii‐ɣaa‐wãla, goei‐leve, wãla‐lɔɔ luo, daa‐wo‐boga ta nu wãla‐ma ƃɔɛ‐woga yá wulo wo la. 9A mɛ lɛ zɛɛ ʋaa wo ɣiini ma. Toku ge zei ga wo wa ŋetea wɔlɔ‐zaɣagi viliga ya é vɛɛ su‐luoitiɛ va, 10wo ŋetea niinɛ ziɣi. Na ɣa ga ŋeteai nii maa ʋelisu ga maniinɛ faa‐ɣaa‐ɣai zu ga é ɣɛ ga ŋeteai ƃɔɔ ƃɛtɛ nui mawo‐kɔ̃ɔ. 11Ŋetea niinɛi nii zu Geliiki ʋaa lɛ ɣɛɛ na ga tee Dusi ʋaa ɔ́ ɣɛ na ga tee. Sei‐kpoto‐ma ʋaa lɛ ɣɛɛ na ga tee sei‐kpoto‐ma lala ʋaa ɔ́ ɣɛ na ga tee. Gaa‐laa lala vea tɛ lɛ ɣɛɛ na ga tee Siitia nu ɔ́ ɣɛ na ga tee. Dua tɛ lɛ ɣɛɛ na ga tee wɔɔlɔa tɔ ɣɛ ga tee. Kɛ̀ Kolai ɣa é ga fai pɛ so‐su too la.

12Tei tɔwɔ wo ga numai niitiɛ Gala ge yee ƃadoga te va te wuloai su ga tee ga wõila vea, a ɣɛ ga nui niitiɛ nu maa‐wõi wɔɔlɔi te ma ta niitiɛ te luola nɛi. A mɛ lɛ ƃɔɔ ʋaa zu wɔɔlɔ. A ɣɛ ga kolo‐wulo vea wo ɣɛ wɔnɔ ga zii‐lɔɔ‐wulo vea 13wiɛ ɣi kulo ɣiini kɛɛ‐zɔ su. Ani wɔnɔ wo ta ɣɛɛ‐zɔ ka ɣɛɛ na bɔ́ɔ wuu zu, a wiɛ ɣiini su ʋaa yɛ. Tei tɔwɔ de maliɣii wo zu ʋaa yɛga, kɛni wa su‐ʋaa‐yɛ bo wa ƃalaa. 14Nii ƃɔɔ é fai nii ƃɔgɔpɛ maazu tɔ ga wõila ɣɛ wo ya. Wõila ɣa yá fai nii ƃɔgɔpɛ kpɔ kii zu é gili te maʋaa‐la pele ma maa‐wulo‐zu lɛ ɣɛɛ ba. 15A ƃe ba Kolai na zii‐lai ɣɛ ga wo yii maazu‐ʋaa‐wo ŋɛni. Nii ɣa wo liligɛi su ga wo ɣɛ ga dɔtɔ ɣilekpu su vea ga ƃɔɔƃɔɔ su. A ɣɛ ga faa‐nɛɛ‐wɛ̃ɛ bea. 16A ƃe ba Kolai woi wɔɔlɔ wo yii zu. A wiɛ ɣii ɣala bo wiɛ ɣii lɛnɛ kele‐ɣele faa ɣaazɔ zu. Gui niitiɛ te wuloai Gala kɔlɔi zu ta Gala daa‐maa‐lɛɛ wuitiɛ é vɛɛ Gala gui zɔitiɛ va, a te loo Gala ma ga mama‐feea bɛ́ wo yii zu. 17Na ɣa ɣɛɛ na nii nɛpɛgi wa ɣɛ kɛɛzu wo laa woo zu ta wo luo vele, a te pɛ te ɣɛ de maliɣii Ziizɛ na daa‐zeigi zu, wiɛ mama fe de ɣeea Gala bɛ́ sáala zu.

Ŋetea niinɛi zu yɔɔzu‐ziɛ‐wo pelei

18Wai wo ga zini‐bɛ veaitiɛ, a wolo wo wɔɔ veaitiɛ vɛ. Na ɣa solowogɛi nui nii ma ta de maliɣiini te su ɣilekpu. 19Wai wo ga ŋaza kɛɛ veaitiɛ, a wõi ga wo ŋazaitiɛ, wo mɛ lɛ ɣɛ te zosu ƃazuwulu‐ƃazuwulu.

20Wai wo ga lopaitiɛ, a wo ɣaa veaitiɛ woo mɛni fai ɣaazɔ zu, ƃɔvɛlaale nà ɣa de maliɣii yii la. 21Duu keeaitiɛ, a mɛ lɛ ɣɛ wo leaitiɛ wãla‐ma ʋaa ɣɛɛzu, wo mɛ lɛ va te ʋii ƃɛɛzu. 22Wai wo ga duoitiɛ, a goo‐mɛni kulo fai ɣaazɔ zu numai niitiɛ ya te ga wa nu kɛɛ vea ŋeteai nii zu. A mɛ lɛ ɣɛ nɔ kɛɛzu ga numaa ɣaazu ʋaa è ɣɛ niitiɛ te ga nu ƃuse yii‐laa vea nɔ. Kɛ̀ wo ɣi‐to‐su ɣa ɣɛ nɔ ɣile wiɛ luo de maliɣii va. 23Tii mazii nɛpɛ wa ɣɛ kɛɛzu, a wiɛ kulo ƃɔɔ yii zu wiɛ kɛ ga gaama vele è ɣɛ wa ɣɛ kɛɛzu de maliɣii vɛ, ɛ́ lɛ ga nu ƃuse, 24kwɛ̃ɛgɛi wo vɛ ga wa vaazu de maliɣii weligi zɔlɔ wosu ga su‐lɔnɔ. Wa tii ɣɛɛzu de maliɣii Kolai vɛ. 25Ƃɔvɛlaale pele‐ma lala luo‐wo nui na pele‐ma lala luoi é boga su ɣa loo bɛ́. Daa‐wulo‐su lɛ ba.

Currently Selected:

KOLASAITIƐ 3: DN1971

Highlight

Copy

Compare