TE ƔƐƐ VAITIƐ 20

Masadoonia ta Geliiki yui ziɛ‐wo fai Pɔɔ vɛ

1Tei zaɣa‐zaɣagi wɛ̃ɛni, Pɔɔ keela leveni kala dopoitiɛ luo. Tei sa é te yii lɔɔni, é ʋelini te ma é wulo na va dii ʋai ma Masadoonia. 2Tei Pɔɔ leveni ga vɛ vele é numaitiɛ yii lɔ ga kpaanaga, é vaani Geliiki yui zu. 3Ná ɣa é ɣalo saagɔ ɣɛɛni na. Tei é ɣɛni ƃɔɔ nɔ vaazu zeizu yuwu ɣa é li Siilia, Dusiitiɛ te maa ʋuɛ looni. É deʋe sa ga é li wulu ga Masa‐doonia velei. 4Niitiɛ ta Pɔɔni te liini, tiɛ ɣa: Bɛluiya nui Sɔpeta, nii é ɣɛni ga Pilɔ dui; Aluisitakɔ ƃɔga Sɛkũdɔ, niitiɛ te wuloni Tɛsɛlonaika; Dɔɔbi nui Geea; Temete; é vɛɛ Tekekɔ va ta Tɔlɔfimɔ, niitiɛ te wuloni Eezia. 5Niitiɛ te liini na luo. Na ɣa ɣɛɛ na te ɣɛni gé ƃowũsu Toolɛɛ lai zu. 6Kɛ̀ gé zeini yuwu ɣa gé wulo Felepai va tei kpoolo‐lɛʋɛ‐mii wuu‐ɣaa ziɛgi wuloni gá, gé kɛ pele zu ga folo looluo gé va te wɔ vɛ Toolɛɛ vɛ gé folo lɔfela ɣɛɛni na.

Pɔɔ na feli‐ma laali‐ma‐wo fai Toolɛɛ

7Tei gé ɣaa lɛɛni ba kpoolo‐ʋɔi zu‐ɣale‐ɣale faa ma ga gé mi, Pɔɔ ƃɔɛni te wɔ é kí ma ga é wulo na va ga nà ʋoloi. É ná faa‐zu‐wulogi zu woozani ma é yɛsu kpidi bea sakpa ma. 8Labo lamaa ɣɛni ná maazuvɛ lumui zu pɛlɛi ʋaa va vɛ gé ɣaa lɛi ɣɛ ba na. 9Zunu loma ta ɣɛni na daa ga Yutekɔ é ɣɛni zeini wũdai la. Ŋii ƃakpa leveni da, Pɔɔ wɔ ge ɣɛni dɛ nɔ ƃɔɛzu ga su wooza. Tei tɔwɔ ŋii lɔi ɣɛ la, é wuloni pɛlɛi nii é ɣɛ kii maazu sava maazu ɣelei mawũdai la é loo. Te kpekpe sa sai. 10Kɛ̀ Pɔɔ vileni é wũ pile maazu é ɣili ba é ɣɛ tea, “A mɛ lɛ yii wulo va. Zɛʋui ɣa zéea.” 11Tei Pɔɔ lɛɛni gee‐zuvɛ wɔnɔ é kpoolo‐ʋɔi zu ɣale‐ɣale é mi, ta tiɛni te yɛpɛni ga su wooza é yɛsu gela bo. É wulo sa na va. 12Te lopoi ziɣini te lii la, zɛʋu su. Maʋai lɛ te ɣaa nɛkpɛni ga soloya.

Ziɛ‐ɣa ziɛi é ziɣi Toolɛɛ é li Mailitɔ

13Kɛ̀ tei sa gé liini gé lɛ kẽe gwalai zu, gé zeini yuwu ɣa ga gé li Asɔ lai zu é gé ɣigi zu ga ná ɣa Pɔɔ ɣa vili na kẽegi zu. Ƃɔvɛlaale vele ɣa na é kpɛtɛni la, é kigi zu tɔ ɣagi ga é leve ga kakei‐ɣa velei. 14Tei gá tiɛni gé wũini Asɔ, é vilini kẽegi zu gé va Meteliine lai zu. 15Tei gé wuloni na va gé zei yuwu ɣa, gé leveni Kaiyɔ yui ɣeeɣi daavɛ na wulu ʋoloi. Na wulu ʋoloi gé ziitini Seemɔ lai zu. Tei sa wɔnɔ nà ʋoloi leveni, gé vaani Mailitɔ lai zu. 16Pɔɔ deʋeni ga é yɛ yuwu ɣa é leve Ɛfɛsɔ va, kɛɛ ʋaa ma é mɛ lɛ lebi Eezia. Ƃɔvɛlaale é ɣɛni maa ʋilezu ga ani ɔ́ zolowo na é ziili Yɛlusulɛɛ Pɛ̃tɛkɔ wui ma.

Pɔɔ ɣa ƃɔɛzu Ɛfɛsɔ Ɣala pɛlɛ wũ‐tuo veaitiɛ wɔ

17É yɛni Mailitɔ é keela leve Ɛfɛsɔ é Gala pɛlɛ lo‐tuoitiɛ lili. 18Tei te vaani pɔ vɛ, é ɣɛni te ma, “Wo kwɛ̃ni wa ƃɔɔ ga velei gè yɛga la wo zaama ga siɛgi ɣaazɔ é ziɣi folo maa wũgi ma gè wɔwɔ vileni la Eezia, 19gìɛ mɔɔlɛ de maliɣii vɛ ga velei ɣaazɔ nu ɣa wolo la nu vɛ ta gàazu‐maa‐yiɛ é vɛɛ kɔ̃ɔ‐kɔ̃ɔgi va é woga gàazu, toku ge zei maa‐ʋuɛi va Dusiitiɛ te toa. 20Wo wɛlɛni na va ga velei gɛ̀ lɛ̀ wuloni la fai nii ta nɛpɛ bo faa ɣa pagɛi ɣɛ wo ʋaa ma ɔ́ nɔ ɣɛ ga gè wulo wo ɣala‐bo faa ɣa kɛnɛ ma ta pɛlɛ ɣile‐giledai wu, 21gìɛ seele woo ʋe Dusiitiɛ ɣaazu ta Geliikiitiɛ é vile nu wulu‐ɣaa‐ʋe faa va faa yowũ va é va Gala pɔ, é vile wɔnɔ nu yee‐la ʋaa va de maliɣii Ziizɛ ma. 22Tɔwɔ a wɛlɛ! Gà sa liizu Yɛlusulɛɛ. Gìlivɛ Gala baa ŋinɛgi vɛ ga gè li. Gɛ̀ lɛ kwɛ̃ni ga nii é vaazu ɣɛɛzu gàazu na, 23kɛni velei Gala baa ŋinɛgi dɛɛzu la gàazu taa ɣile‐giledai zu ga kpidi vɛlɛ ƃɔga faa ƃoei ta zeini tùo. 24Gɛ̀ lɛ zɛ̀ʋui ziɣizu ga ŋɛnii nii tɔnɔ ta nɛpɛ ge ba ɔ́ nɔ ɣɛ ga nii maʋaa ƃai kpɔ̀ɔ ʋaa ma, ani nɔ gà nii laa wulo na gè ma é vɛɛ tii nii va gè maa zɔlɔ woga de maliɣii Ziizɛ ya ga gè woo vagɔi mazeele woo ʋe é vile Gala na gaazu‐maa‐wõi‐ɣaa ƃɔ‐bai va.

25“Tɔwɔ, a wɛlɛ! Gè kwɛ̃ni ga waitiɛ gè leve‐tevega wo ɣaazɔ maazu gìɛ Gala goi wo wiɛ é vile Gala na masadai va, wɛ lɛ sa wɔnɔ ɣaazu laa mà. 26Na ma gà dɛɛzu ga wiɛ za ga wo ta nɛpɛ zɛʋui ʋaa lɛ ga bàa ʋaa, 27ƃɔvɛlaale gɛ̀ lɛ wuloni Gala na deʋei ɣaazɔ zu‐wulo ʋai ɣa wo ma. 28A ƃɔɔ maazu vɛtɛ wo baala kpɔgi nii ɣaazɔ maazu vɛtɛ Gala baa ŋinɛgi é wo ɣɛɛ ga maazu‐vɛtɛ bea, wo Gala na pɛlɛi ɣaa wɔ nii é kɛɛ ga kpɔɔ wo dúi zaa ʋai zaala zu. 29Gè kwɛ̃ni ga gà ziɣi na vɛ, file woeitiɛ ta vili wo zaama niitiɛ tɛ lɛ baala kpɔgi ɣaazu‐maa‐wõi ɣaa. 30Na ɣa ɣɛɛ na numaa ta vaazu wu ziɣizu wa ƃɔɔ wo zaama tiɛ fai niitiɛ wo ɛ́ lɛ ɣɛɛ pele ma é vile gaamai va, kɛɛ ʋaa ma te kala dopoitiɛ ɣaa lɛ ba ƃɔɔ ma. 31Na ma a ɣɛ ɣi su, wo ɣi ge yɛ su ga kwena saagɔ yee wu gɛ̀ lɛ ƃɔlɔni ga wo ɣile‐giledai lɛnɛga ga ɣaazu‐maa‐yiɛ kpidi vɛɛ folo va. 32Na ma gè wo ʋeea Gala zeea gè wo wɔɔ laa loo ná gaazu‐maa‐wõi‐ɣaa ƃɔ‐bai mawoi va. Na ɣa ga woi nii yá wo loo zu é wo wo kɛ ga Gala kweligi wa niitiɛ ɣaazɔ te wuloai su leelaa Gala faa ma. 33Gɛ̀ lɛ nu ta na kani mayii vilini wuu zu ɔɔ zɛni ɔɔ seɣe. 34Wo kwɛ̃ni ga zèe niitiɛ nɔ ɣa gè tii ɣɛɛni la ŋɛnii niitiɛ ʋaa ma te maƃala ɣɛni mà, te maƃala wɔnɔ niitiɛ ma te ɣɛni bà. 35Gè dɛɛ ga wiɛ pelei ɣaazɔ zu ga kɛni nu ɣa ƃɔ niitiɛ va zobo gɛ lɛ tiɛ. Towaa nii ɣɛ ga tii ƃaanagi natiɛ mazii‐ɣɛɛ, kí ge Ziizɛ woi niitiɛ zu. Na ɣa ga velei é ɣɛni la tea, ‘Tɔ ga tuuyiɛ ƃakpa nu ma ga é faa‐nɛɛ ɣɛ é leve faa‐nɛɛ va yá ɣɛ manu vɛ.’ ”

36Tei sa é ƃɔɛni ŋɛ na, é vileni ŋibia te pɛ te Gala feli ta tiɛni. 37Te pɛ te wɔlɔni te ɣili Pɔɔ va te laa vɛɛ ba. 38Te maa wõini. Ta maa‐wõi bɔɔlɔ kele toku seiyai woi va é boni ga tɛ lɛ wɔnɔ ɣaazu laa ma. Te va sa la kẽe gwalai ɣalama.

Currently Selected:

TE ƔƐƐ VAITIƐ 20: DN1971

Highlight

Copy