TE ƔƐƐ VAITIƐ 15

Yɛlusulɛɛ wũ‐pilegi

1Kɛ̀ zinaa taniga te ziɣini Yudiiya tiɛ Gala pɛlɛ wu veaitiɛ ɣala bo tiɛ ɣɛ tea, “Wɛ lɛ valoa, kɛni ta wo zei kpoto ma è ɣɛ velei Mooze deʋea la gé ɣɛɛ ʋaitiɛ zu.” 2Tei Pɔɔ ƃɔga Banaba te fai nii zakpeni ga kpaanaga, na ɣa ɣɛɛ na te lo zinai niitiɛ la ga daaza, te yee ƃadoni Pɔɔ va ta Banaba é vɛɛ sa zɔitiɛ taniga va ga te li Yɛlusulɛɛ Ziizɛ na keelaitiɛ wɔ vɛ ta to‐tuoitiɛ é vile fai nii va. 3Na ma tei sa Gala pɛlɛi é te leveni, te leveni Feniisia é vɛɛ Sameelia va tiɛ kona‐bo bo é vile zii ƃalaagitiɛ wulu‐ɣaa‐ʋe fai va te va Ziizɛ wɔ. Na ɣa ɣɛɛ na te kɛɛni Kolai maa veaitiɛ ɣaazɔ wuu zu nɛɛ ga kpakpaa. 4Tei te vaani Yɛlusulɛɛ, Gala pɛlɛi vɛɛ Ziizɛ na keelaitiɛ va ta to‐tuoitiɛ te yee zeini te wu. Na ɣa ɣɛɛ na te tii ɣaazɔ mawona‐bo boni Gala ge kɛɛni ga tiɛ. 5Kɛ̀ niitiɛ te Ziizɛ ʋaa ziɣini ga gaama te taniga, na ɣa ga niitiɛ te ɣɛni ga Favilesiitiɛ te ta, te wu ziɣini te ɣɛ tea, “Kɛni ta zei kpoto ma, na ɣa ɣɛɛ na de bo te ma te ziɛ ga Mooze na tɔgi.”

6Ziizɛ na keelaitiɛ ƃɔga to‐tuoitiɛ te ɣaa lɛi ɣɛ ba ŋada ɣila ga te ɣi gaa ziɛ fai nii ma. 7Tei sa te daaza wuloni ga tamaa, Pite wu ziɣini é ɣɛ te ma, “Nà numaa, wo kwɛ̃ni ga tɔɔ‐zei ʋolo ma Gala ge yee ƃadoni bà wo zaama ga dàa vele‐zuvɛ zaala zu ɣa zii ƃalaagitiɛ ta woo vagɔi mɛni da te siɣi ga gaama. 8Na ɣa ɣɛɛ na Galagi nii é nu yii zu wɛ̃ni é te mazeele woo ʋeeni ga baa ŋinɛgi levega te wɔ vɛ, è ɣɛ velei nɔ é kɛɛni la ga diɛ. 9Ɛ́ lɛ de yɔɔzu wuloni da tiɛni, kɛ̀ é te yii zu wuoni ga zee‐la‐ma. 10Na ma zɛƃɛi é kɛɛ wo Gala su wɔ̃ɔsu ga kasɔ‐ɣilia kala dopoitiɛ laa ma nii de ɣeeani tɛ lɛ dɛ ziɛni bu ɔ́ nɔ ɣɛ ga diɛ? 11Kɛ̀ de siɣia ga gaama ga a da valo de maliɣii Ziizɛ na gaazu‐maa‐wõi‐ɣaa ƃɔ‐bai zaala zu è ɣɛ velei nɔ yá ɣɛɛ la ga tiɛ.”

12Nu ƃɔgi ɣaazɔ na ɣɛɛni ƃu. Te wui to Banaba woo ma ta Pɔɔ tei te ɣɛni fai niitiɛ zu wulozu Gala ge ɣɛni ga zaƃu te kɛ te dɛ ga seele é vɛɛ faa maa‐wɔlɔ‐wɔlɔgitiɛ va zii ƃalaagitiɛ zaama. 13Tei sa te woloni ƃɔɛzu, Jĩi gaa woteni yíɛ ɣɛ tea, “Nà numaa, a wui to. 14Simiã é su wuloa ga velei Gala ge vaani la zii ƃalaagitiɛ vɛ ga maa wũ ga é numaa ziɣi te zaama ná daa‐zeigi ʋaa ma. 15Gala daa woo‐wo beaitiɛ te woi zolowoni nɔ fai nii zu è ɣɛ velei ponɛi la 16de maliɣii yìɛ ɣɛ tea,

‘Nii ɣa wulo na ba gà gale ma wulu, na ɣa ɣɛɛ na gà

Deeve na pɛlɛi lo kɔnɔ é woloa.

Gà mazaɣai lo kɔnɔ, na ɣa ɣɛɛ na gè gaa lɔ gè to.

17-18Kɛɛ ʋaa ma nu ƃusei mataitiɛ vɛɛ zii ƃalaagitiɛ ɣaazɔ

va, niitiɛ dàa te va,

te te maliɣii ɣaa ziɛ,

na ɣa ga nài gè fai niitiɛ wuloa kala‐kala ga wɔlɔ.’ ”

19Jĩi ɣɛ wɔnɔ tea, “Na ma nii gè pɛtɛga fai nii zu tɔ ga de mɛ lɛ faa vili zii ƃalaagi niitiɛ ma te wulu ɣaa ʋesu tiɛ va Gala pɔ. 20Kɛ̀ a de kɔlɔ wonɛ te wɔ ga te ƃe teve ƃɔɔ lɔbɔga va ga nii nɛpɛgi pilegɛi maa‐niini gala zeke‐kɛɛ ʋaa va, te ƃe teve wɛ̃ɛ‐ziɛ‐boga va, te ƃe teve suoi nii mia va ta paa ga soga foole zu, é vɛɛ ŋama‐mia va. 21Ƃɔvɛlaale é ziɣi tɔɔ‐zei ziɛ su ma é loo za ma, numaa ta taa ɣile‐giledai zu tiɛ Mooze na kɔlɔi zu woi wo, ƃɔvɛlaale ta dodosu doowo folo ɣile‐giledai zu Gala‐feli wɔtaitiɛ wu.”

Wũ‐pilegi zu leʋei

22Tɔwɔ Ziizɛ na keelaitiɛ ta to‐tuoitiɛ é vɛɛ Gala pɛlɛi wu veaitiɛ ɣaazɔ va te wɛlɛni na va ga pagɛ te yee ƃako numaa va zaama te te leve Ãteya ta Pɔɔni é vɛɛ Banaba va. Te Dudia leveni, nii tɔ tili ga Basaba, ta Saila. Numai niitiɛ ɣa te ɣɛni ga nu ɣaa wuaitiɛ Gala pɛlɛ wu veaitiɛ zaama. 23Te kɔlɔ ʋeeni te ya su woi ga nii, “Gái gé ga wo vaitiɛ, na ɣa ga gái gé ga Ziizɛ na keelaitiɛ ƃɔga to‐tuoitiɛ, wai wo ga gé vaitiɛ zii ƃalaagitiɛ zu wo zeini Ãteya lai zu ta Siilia yui é vɛɛ Seliisia yui zu va, gé wo luoni gé wo luo. 24Tei tɔwɔ gé mɛniga ga nui taniga te wuloa gé zaama te wo ɣɛɛ pɔ̃ɔ ga woo, te kɛ wo ɣigi maa ɣɛ yɔʋɔ, velei ƃalaa gɛ́ lɛ te leʋeni la ŋɛ na, 25gé ƃɔgɛ gé wɛlɛ na va ga pagɛ gé yee ƃako numaa va gé te leve wo wɔ vɛ é vɛɛ gé wõila veai niitiɛ va, natiɛ ta ga Banaba ƃɔga Pɔɔ. 26Ta ɣa te ɣi kuloa ƃɔɔ yɛʋui zu de maliɣii Ziizɛ Kolai zaƃu ma. 27Na ma gé Dudia levega ta Saila, niitiɛ ta ƃɔɔ ta faa zii ɣilagi nii wo wiɛ ga laa woo. 28Ƃɔvɛlaale é vaga Gala baa ŋinɛgi ɣaazu é va wɔnɔ gé ɣaazu ga gé mɛ lɛ wo ƃaa faa la wo yii la ɔ́ leve niitiɛ va maa nɛɛ wo kɛ. 29Natiɛ ta ga wo ƃɔɔ ƃe teve niitiɛ mii ʋaa va ta maa‐niini galaga wɔɔ la, wo ƃɔɔ ƃe teve ŋama‐mii ʋaa va, wo ƃɔɔ ƃe teve suoi nii mii ʋaa va ta paa ga soga foole zu, é vɛɛ wɛ̃ɛ‐ziɛ‐boga va. Wa ƃɔɔ ƃe teve na niitiɛ va, wa kɛ ga pagɔ. A da ɣa.”

30Na ma tei te te leveni, te liini Ãteya. Tei sa te Gala pɛlɛ wu veaitiɛ ɣaa lɛɛni ba ŋada ɣila, te kɔlɔi leveni. 31Tei te dodoni, te wuu zu nɛɛni te yii‐ƃoale ʋai ma kɔlɔi zu woi vɛ. 32Na ɣa ɣɛɛ na Dudia ta Saila, niitiɛ ta ƃɔɔ te ɣɛni ga Gala daa woo‐wo bea, te Gala pɛlɛ wu veaitiɛ yii lɔɔni ga woo lamaa te te zu ƃaa. 33Tei sa te kuu fele kuloni na, te vaitiɛ te te leveni zii‐laa zu niitiɛ wɔ vɛ te te leveni. [ 34Kɛ̀ págɛi ɣɛ Saila ɣaazu ga é yɛ ná.] 35Pɔɔ ƃɔga Banaba te yɛni Ãteya tiɛ de maliɣii woi wo tiɛ numaa ɣala bo da. Zɔitiɛ lamaa te vɛɛni sa te va tiɛ kala‐bogi wo.

Pɔɔ ƃɔga Banaba ta ɣaa wɛɛzu

36Tei sa folo taniga te leveni, Pɔɔ ɣɛni Banaba ma, “Va de gale ma de laali de vaitiɛ ma taa ɣile‐giledai zu vɛtiɛ de de maliɣii woi woni na de ná vɛtɛ ga velei te la.” 37Banaba wɔ ge ɣɛni wõizu ta Jɔ̃ni te li nii tɔ tili ga Maki. 38Kɛ̀ Pɔɔ ɣi gaa ziɛni ga nii pagɛi tɔ ga te mɛ lɛ li ta nui niitiɛ nii é ziɣini te wulu Pãfelia ta tiɛni tɛ lɛ liini tii ma. 39Goo ɣaa laɣa‐laɣa ge looni te yɔɔzu ga kpaanaga, te ɣaa wɛɛ. Banaba Maki ziɣini ta tɔ te zei yuwu ɣa te li Saipɔlɔ. 40Tei tɔwɔ Pɔɔ wɔɔ laa loai ɣɛ sa de maliɣii na gaazu‐maa‐wõi‐ɣaa ƃɔ‐bai va Gala pɛlɛ wu veaitiɛ vɛ, é Saila ziɣini ga yii‐ma te ziɣi na. 41Na ɣa ɣɛɛ na é leveni Siilia yui zu ta Seliisia yui yíɛ Gala pɛlɛitiɛ zu ƃaa.

Currently Selected:

TE ƔƐƐ VAITIƐ 15: DN1971

Highlight

Copy