TE ƔƐƐ VAITIƐ 12

Jĩi vaavɛ, Pite viligɛi kpidi vɛlɛ wu

1Na maziɛ daa yɔɔzu masagi Yɛloo woloni Gala pɛlɛi wu vea taniga ma wawu. 2É kɛɛni te Jɔ̃ diɛ Jĩi vaa ga boa zɔkpɔ. 3Tei é wɛlɛni na va ga nà nɛɛni Dusiitiɛ vɛ, é liini ga luo é Pite zo ƃalaa pɛ. Nii ɣɛni ga kpoolo‐lɛʋɛ‐mii wuu‐ɣaa ziɛgi. 4Tei é soni, é pilini kpidi vɛlɛ wu. É daa wona bo sa sɔdasia ma te levegɛi ga naa‐naa te zei‐zu naa ga te maa ƃɛ, yíɛ ɣi gaa ziɛ ga teve‐maazu wui ʋaa ɔ́ wulo na ba, é kulo é vaa la numaitiɛ wɔ. 5Na ma te ƃeni Pite va é yɛ kpidi vɛlɛi wu. Kɛ̀ Gala pɛlɛi wu veaitiɛ te Gala felini maʋaa ma ga kpaanaga.

Pite wulovɛ kpidi vɛlɛ wu

6Kpidii na ƃɔɔƃɔɔgi nɔ Yɛloo ɣɛni vaazu Pite wulozu la, nà ɣɛni ŋiizu sɔdasi felegɔ yɔɔzu giliai ga yɔ̃wɔ felegɔ. Na ɣa ɣɛɛ na kpidi vɛlɛ maa‐ƃɛɛ zɔdasii niitiɛ te ɣɛni pɛlɛi la, te ɣɛni kpidi vɛlɛi maazu vɛtɛsu. 7Nà ɣɛɛni ƃɔɔ nɔ de maliɣii na keelai wulo na, na ɣa ɣɛɛ na ŋada wodoai ʋolo kpidi vɛlɛi wu. Gala ta ɣeelai nii é Pite maa lowani kakamavɛ yíɛ ɣɛ ma, “Wu ziɣi ga maa ʋilea.” Yɔ̃wɔitiɛ te wulo sa zée va te loo. 8Gala ta ɣeelai ɣɛ ma, “Maa ɣili è yà zavalagitiɛ lɔ wɔwaa.” Nà wɔ ge kɛ ŋɛ na. É ɣɛ ma, “Yà zeɣei ƃiti ma è vile pùlu.” 9É wulo é vile pulu. Ɛ́ lɛ ŋɛni kwɛ̃ni ga nii Gala ta ɣeelai ɣɛni kɛɛzu é ɣɛni ga ƃɔɔƃɔɔ su ʋaa. Kɛ̀ é ɣɛni kaazu ga ŋada ɣa nɔ é wuuzu gaazu. 10Tei sa te leveni sɔdasi ƃulu maa wũgi va ta fele kelei, te vaani siɣigi nii la daa wuloai ɣɛ tai zu vele, malaa‐wulugi ga kolu. Daa laoni te luo ga ƃɔɔ yee. Te wulo te leve pele‐vɛɛ gila ma. Gala ta ɣeelai ziɣi pulu ga maa ʋilea. 11Pite ƃɔɔ ʋaa ɣaa ɣa sa é ɣɛ tea, “Gè laa la teɣa ga màliɣii é ná keelai levega é kùlo Yɛloo ya. Na ɣa ɣɛɛ na é kùlo nii ɣaazɔ zu Dusi veaitiɛ ɣigi yɛga ba ga é ɣɛ gàazu.” 12Tei é looni ga nii ɣalama laa, é liini Jɔ̃ dee Meele na pɛlɛi la, Jɔ̃ nii ná daa‐zeigi zɔi ɣɛni ga Maki. Pɛlɛi nii wu ɣa nu lamaa ɣaa lɛi ɣɛ ba na ŋada ɣila tiɛ Gala feli. 13Tei é siɣigi laavɛ ƃogi luƃoni, tii‐ɣɛɛ ŋaza nu ɣila daa ga Looda é vaani ga é wɛlɛ na va ga nui é le. 14Tei é Pite woo wulo‐ba wɛ̃ɛni, ɛ́ lɛ siɣigi laa laoni kuu‐zu‐nɛɛ vɛ, kɛ̀ é ƃizeni é li pɛlɛi wu é bo ga Pite ɣa loni siɣi zeɣei la. 15Te ɣɛ ma, “È ɣigi lɛ è woba.” Kɛ̀ é ɣatani boga va ga kavele ɣa na. Te ɣɛ tea, “ka dɔ kɛ mu mawɔʋɛi ɣa na.” 16Kɛ̀ pite ɣilini kpogi luƃoa va. Tei te daa laoni, te wɛlɛni ba. Na ɣa ɣɛɛ na é wuloni ga tiɛ ga kpakpaa. 17Kɛ̀ tei é yee ɣɛni te ma ƃɛ‐ƃɛ ga te na ɣɛ ƃu, velei de maliɣii kuloni la kpidi vɛlɛi wu é kavelei zu wuloni te ma. É ɣɛ tea, “A nii wo Jĩi ma é vɛɛ de vaitiɛ va.” É ziɣi sa na é li ŋada ƃɔnɔ.

18Tei sa gela boni, zii‐zɛlɛgi é ɣɛ sɔdasiitiɛ ma é vile velei va Pite maʋai ɣɛɛni la ɛ́ lɛ ŋɛni vɛnɛni. 19Tei Yɛloo gaa ziɛni, tɔwɔ lɛ ŋɛni pɛtɛsu, é kpidi vɛlɛ maa‐ƃɛɛ zɔdasiitiɛ ɣaa‐zaɣa kɛɛni ƃɔɔ sɛ‐sɛ. Na ɣa ɣɛɛ na é deʋe ga te te vaa. É wulo sa Yudiiya é li Sɛsɔluiya é yɛ na.

Yɛloo zaa ʋai

20Tɔwɔ Yɛloo yii ɣaa wãlai ɣɛ Taalɔ ƃɔga Saidɔ̃ lai zu veaitiɛ ya. Te vaani pɔ́ ga ƃulu. Tei sa te laa lɔɔni masagi na pɛlɛ lo‐tuoi Belasitɔ va, te maa‐nɛɛnɛ boni ga Yɛloo ga ta tiɛni te yɔɔzu ƃɛtɛ, ƃɔvɛlaale ta yui yee lai ɣɛ masagi na zui ma daa‐mii ŋɛni ʋaa ma. 21Te kuu loni. Nà maʋoloi Yɛloo é ná masa seɣei looni wɔ ba é zei ná masa kpɔkpɔgi ɣa é ƃɔɛ sa te wɔ. 22Numaitiɛ te lobani te ɣɛ tea, “Gala ta ɣa goo le, nu ƃuse woo laale!” 23Gala ta ɣeelai kuloai de maliɣii wɔ vɛ é dowani ga maa ʋilea, ƃɔvɛlaale ɛ́ lɛ ŋɛni ƃeni ba ƃai nii ɔ́ la Gala ma. Na ɣa ɣɛɛ na é yɛni ga ʋulu koiga te miini é za.

Banaba ƃɔga Sɔɔ

24Kɛ̀ Gala goi zu wɔɔlɔni ma, maa yìɛ wɔɔlɔ. 25Na ɣa ɣɛɛ na Banaba ƃɔga Sɔɔ te galeni ma te ziɣi Yɛlusulɛɛ, tei te nii ɣɛɛni te levegɛi ɣɛ ma. Te vaani ta Jɔ̃ni nii ná daa‐zeigi zɔi ga Maki.

Currently Selected:

TE ƔƐƐ VAITIƐ 12: DN1971

Highlight

Copy