KƆLĨITIƐ 12

Faitiɛ te wuuni Pɔɔ ɣaazu ta niitiɛ te wuloni gáazu kɛnɛ ma

1Kɛni gà yoka teve. Su‐lɔnɔ ta nɛpɛ gɛ lɛ ɣɛɛ ba, kɛ̀ faitiɛ de maliɣii kɛɛ natiɛ te wu gàazu ta faitiɛ é te wuloa kɛnɛ ma gàazu, gà te wosu. 2Gè Kolai maa nu ta wɛ̃ni nii kwena puugɔ kai naagɔ levegɛ sa te siɣini te lɛɛ la Gala ta zei‐zu sava kelei zu. Zunui nii ɣɛni nu lɔtɔ zu ƃaa lɛ ŋɛni su, gɛ̀ lɛ kwɛ̃ni. Gala ge kwɛ̃ni. 3Tɔwɔ gè kwɛ̃ni ga te zunui nii ziɣini te lɛɛ la ŋada vapa su. É ɣɛni nu lɔtɔ zu ƃaa lɛ ŋɛni su, gɛ̀ lɛ kwɛ̃ni. Gala ge kwɛ̃ni. 4É fai taniga mɛnini niitiɛ tɛ lɛ woga, niitiɛ tɛ lɛ ga nu ƃuse wo faa. 5Zunui nii mavele ma gà yoka teve. Kɛ̀ gɛ̀ lɛ yoka tevea ƃɔɔ ʋaa ma, kɛni kilaa gè yoka teve nà zobo‐bala‐bɛ ʋaitiɛ ʋaa ma. 6Tɔwɔ ani ƃalaa gà wõi na gè yoka teve gɛ̀ lɛ ɣɛɛ ga titi nu, ƃɔvɛlaale gaamai ɣa gà ɣɛ bosu. Kɛ̀ gɛ̀ lɛ yee viliga nà ɣɛɛ ʋaa zu, kɛɛ ʋaa ma nu ta mɛ lɛ ɣi gaa ziɛ màʋaa ma ga kpakpaa ɔ́ leve nii va yá pɛtɛ màʋaa va ɔɔ nii yá mɛni dà. 7Tɔwɔ zɔi ɔ́ kɛ faa lamaa ɣaa‐wodo ʋai mɛ lɛ màʋaa wala wɔɔlɔ ƃɔɔ ɣaazu, towaa é kɛɛni ŋai ge lɔ màzuoi zu. Na ɣa ga Seeta na keelai é va ga é laa lɛ bù, kɛɛ ʋaa ma màʋaa wala mɛ lɛ wɔɔlɔ ƃɔɔ ɣaazu. 8Ná zei‐zu ɣɛɛ sava gìɛ pee ʋe de maliɣii vɛ é vile fai nii va ga é kɛ é ƃe bà. 9Kɛ̀ é ɣɛni mà, “Nà gaazu‐maa‐wõi‐ɣaa ƃɔ‐bai nɔ ɣa solowogɛi è ʋaa ma. Ƃɔvɛlaale gà kɛ nà gaa‐ƃai laa ʋe nui nii ya zobo gɛ lɛ bɛ́.” Na ma gà nà zobo‐bala‐bɛ ʋai mayoka gwala leve ƃɔɔ ga kuu zu nɛɛ, kɛɛ ʋaa ma Kolai na gaa‐ƃai ɣɛ màazu. 10Na ma Kolai mazaƃui ma zìi laavɛ zobo‐bala‐bɛ ʋaa zu, zìi lai gaazu‐ƃala‐ƃala tuo ɣa é vɛɛ faa ƃaalii ba ta kpɔɔla é vɛɛ faa ƃawu ba. Toku ge zei ga zobo ka vala na bɛ̀, a kɛ tii gà ƃaa.

Pɔɔ ƃala ʋai Kɔlĩ Ɣala pɛlɛi ʋaa ma

11Gè ɣɛɛ ga titi nu! Wo laa ʋaa be, ƃɔvɛlaale maa nɛi ɣɛ wo dɛ̀. Ziizɛ na keelai niitiɛ te ƃɔɔ ziɣizu ga te maʋaa wɔɔlɔvɛ é leve te vaa pɛ ba gɛ̀ lɛ looni te wu ga pele mazii ta nɛpɛ, velei ƃalaa gɛ̀ lɛ la ga ŋɛni ta nɛpɛ. 12Niitiɛ ta ɣɛ te dɛ ga seelea ga nu ɣa ga Ziizɛ na keela ƃɔɔƃɔɔ te ɣɛɛni wo zaama zii‐lɔɔ ʋaa ɣaazɔ zu. Te ɣɛɛni faitiɛ zu ta ɣɛ ga seelea, te ɣɛ faa maa‐wɔlɔ‐wɔlɔga zu te ɣɛ wɔnɔ tii maa‐wɔlɔ‐wɔlɔ‐kɛɛ zu. 13Zɛƃɛ ɣa é ɣɛɛni Gala pɛlɛi zɔitiɛ vɛ é leve wo va, kɛni nɔ kɛ̀i gɛ̀ lɛ boni ga wo wũmɔ ɣasɔ? A sù ʋaa yɛ na zu! 14Kàvele ƃɛtɛvɛ sa ga gè paalai sava kelei ɣɛ wo wɔ vɛ. Tɔwɔ gɛ̀ lɛ ɣɛɛ ga wo wũmɔ ɣasɔ. Ƃɔvɛlaale nii é ga wo wo nà lei gɔ̀ ɣɛ gaa ziɛzu, kɛ̀ wa ɣagi ɣa gè wo ɣaa ziɛzu. Toku ge zei ga ɛ́ lɛ ga lopaitiɛ vaa ʋaa ga te ŋɛni laa‐zu ɣɛ te ɣaa veaitiɛ ʋaa ma, kɛ̀ duu‐ɣaa veaitiɛ mu ka pagɛi te kɛ te leaitiɛ ʋaa ma. 15Kùu zu wala ɣa nɛɛ ga nii ƃɔɔ é zèea gè kwɛɛ wo yɛʋui ʋaa ma, nà kagi ge ɣɛ wo yɛʋui ʋaa ma.? Ani gà wõi na ga wiɛ ga kpakpaa, wõila vɛnɛi ɣa wó gàazu ʋaa ve? 16Wo ʋaa bu ga nà kagi gɛ̀ lɛ ŋɛni ƃɔɔ ɣɛɛni ga wo wũmɔ ɣasɔ, tɔwɔ wiɛ bo ga gè ɣɛni gaa‐wɔlɔ‐bo gbana wulozu gìɛ wulo wo zu nu ma ga gbana vele. 17?Nui niitiɛ gè te leveni wo wɔ vɛ gè wuloni wo zu nu ma te ta nɛpɛ saala zu? 18Gè Taitɔ maa nɛɛnɛni ga é va gè gé wɔi vɛɛ bá gè te leve.? Taitɔ wuloni wo zu nu ma ʋaa ve? ?Gá tɔ gɛ́ lɛ nɔ luozu ga wiɛ ki‐gaa‐ziɛ zii ɣilagi zu? ?Pele zii ɣilagi nɔ lei gá tɔ gɔ́ vile su?

19Wo ɣɛɛvɛ nɔ ɣi gaa ziɛzu é yɛga su é ziitia zai ŋɛ ni ma ga gé ɣɛɛvɛ ƃɔɔ woo zu wulozu wo ɣaazu, kɛlɛi? Gé wõila veaitiɛ, Gala ka gé yɛga ƃɔɛzu gáazu gé ɣɛɛ vele ma su ɣilekpu gá Kolaini gíɛ kɛ nɔ wo maʋaa lii ʋaa ma ga zee luo vele. 20Gà luozu ga ɣee ta gè mɛ lɛ va gɔ̀ wɛlɛ wiɛ wɔ ƃe ɣɛɛzu ga velei gè wõini wo ɣɛɛ la, nà wɔ wɔ pɛ̀tɛ gɔ̀ ƃe ɣɛɛzu ga velei wo wõini gè ɣɛɛ la. Kɛ̀ɛvɛ luozu ga ɣee ta kpɔɛ ʋaa, tolo ʋaa, zii‐ɣaa‐wãla ʋaa, nu ƃala ʋai nɔ ƃɔɔ ʋaa ma, daa‐ŋala‐ŋala faa, daa‐wo faa, kpɔɔ‐ʋaa‐wɔɔlɔ‐gaazu, yopo‐yapa faa, natiɛ te pɛ ta ɣɛ na. 21Gà luozu wɔnɔ ga gà vaa na, ɣee ta nà Galagi ɣa kòlo wo ɣaazu. Ɣee ta nu lamaa ta kɛ zìi zuuli niitiɛ zu te faa yowũ ɣɛɛ wɔlɔ, tɔwɔ tɛ lɛ dɛ wulu ɣaa ʋeni ta maa‐wuo lala yekegi va ta ta wɛ̃ɛ‐ziɛ‐bo yekegi é vɛɛ ta ƃaa‐wulo‐ma luoi va.

Currently Selected:

KƆLĨITIƐ 12: DN1971

Highlight

Copy

Compare