1 TƐSƐLONAIKAITIƐ 5
5
A ɣavele bɛtɛ de maliɣii vaa ʋai ma
1Nà numaa, ani a lii na ga kuu ʋai wɔ vele ta siɛgi, ɛ́ lɛ dɛ ga kɛni mawɔlɔ ɣa wonɛ wo wɔ. 2Ƃɔvɛlaale wa ƃɔɔ wo kwɛ̃ni kalãi ga de maliɣii na kui ɣa ziiti nɔ è ɣɛ wũmɔ nu ɣa yɛ kpidi zu é va. 3Numaa ta ɣɛ na ɣɛɛzu tea, “Zii‐laa ɣa gé ya gé wuloai faa zu,” te zu‐ŋala‐ŋala faa ɣa wulo nɔ te wũ maazu kpɛsɛ, è ɣɛ velei kuu‐zu‐wãla ɣa vɛɛ la ko ŋaza va. Tɔwɔ pele nɛpɛ gɛ lɛ ɣɛɛ na tɔ wulo la su. 4Nà numaa, de maliɣii na kui ʋaa ɣaa lɛ ƃidini ga wiɛ, kɛɛ ʋaa ma yá ziiti na maʋai ɔ́ wulo ga wiɛ è ɣɛ wũmɔ nu ɣa va. 5Ƃɔvɛlaale wa ga ŋada wodoai zu vea wo ga gela‐bogai zu vea. Dɛ lɛ ga kpidi zu vea. 6Na ma a de mɛ lɛ ŋii è ɣɛ velei zɔitiɛ ta kɛɛ la, kɛ̀ a de yɛ ɣaazu ma de ɣaazu lai ga daa vele. 7Ƃɔvɛlaale taitiɛ ta ŋii ta ŋii ga kpidi. Niitiɛ wɔnɔ te ga dɔɔ‐ƃoale vea dɔɔ ɣa te zo ga kpidi. 8Kɛ̀ tei a de ga gela‐bogai zu vea, ƃe ba a de yɛ ga ɣaazu levea. Na ɣa ɣɛɛ na zee‐la‐mai ƃɔga wõila, a de natiɛ lɛ ɣekegi ma ga da wɔɔ‐wɔɔ maa‐ɣili sɔɔla. A de mawɔɔlɔgi ɣɛ ga balolai maɣi‐togi. 9Ƃɔvɛlaale Gala gɛ lɛ yee ƃadoni de va ga de ná zii‐ɣaa‐wãlai maa zɔlɔ wo. Kɛ̀ é yee ƃadoni de va ga de balolai maa zɔlɔ wo de maliɣii Ziizɛ Kolai zaala zu. 10Na ɣa ga Ziizɛi nii é zaani de ʋaa ma, kɛɛ ʋaa ma a de yɛni ŋetea ƃaa de zaani a de vɛɛ bá da tiɛni diɛ ŋetea ɣɛ. 11Na ma a wiɛ ɣiini zii lɔ wiɛ ɣiini maʋaa li ga zee luo vele ŋeteai zu, è ɣɛ velei wo kɛɛzu la.
Tɛnɛ gaa‐ƃelagi ta daali‐mai
12Kɛ̀ nà numaa, gá kɛɛzu ga pee‐ʋee vele wo vɛ ga wo wũfe numai niitiɛ ma te wo zaama tiɛ mɔɔlɛ te wo maazu wa tiɛni wo ɣɛɛ vele ma su ɣilekpu wa de maliɣiini tiɛ wo lɛnɛ. 13Na ɣa ɣɛɛ na a wiɛ te maʋai wala ziɣi ƃɔɔ ga gaa wua wõila zu ta lii mazaƃu ma. A ŋeteai ɣɛ ga ɣiini ga zii‐laa. 14Gá bosu wiɛ ga tɛnɛ goo, nà numaa, ga wo fii‐ƃɛɛ vea lɛnɛ, niitiɛ te yii lɛ lɔɔni wo te yii lɔ, wo ƃɔ niitiɛ va zobo gɛ lɛ te vɛ, wo yii lɔ te pɛ te ya. 15A wɛlɛ na va ga wo ta nɛpɛ ge mɛ lɛ faa yowũ woto kulo ga faa yowũ. Kɛ̀ to mu wiɛ pele ɣaa ziɛ ga siɛ nɛpɛ ga wo faa vagɔ ɣɛ ga ɣiini wiɛ kɛ ga nu pɛ. 16A wiɛ kuu‐zu‐nɛɛ wulo ga ɣee nɛpɛ. 17A wiɛ Gala feli ti‐ti 18wiɛ mama fe bɛ́ faa zii ɣaazɔ zu. Ƃɔvɛlaale na ɣa é ga Gala zii‐mai wo ʋaa ma Ziizɛ Kolai zaala zu. 19A mɛ lɛ ƃesa Gala baa ŋinɛgi na tii luo, 20wo ɣaazu mɛ lɛ wudɛ Gala daa woo‐wogai maazu. 21Kɛ̀ a fai pɛ kɔ̃ɔ‐kɔ̃ɔ, nii pagɛi wo ɣata na maʋaa va 22wo ƃe teve faa yowũ mazii ɣaazɔ va.
23Zii‐laa Ɣalagi tɔ ɣagi towaa wo wulo su leelaa fãa é wolo wulu ma ga wo ɣɛ ga ná dɔa. Na ɣa ɣɛɛ na wa ɣi‐gaa‐ziɛi pɛ, wo yɛʋui pɛ, é vɛɛ wo malɔtɔi va, towaa te za‐su wuo fãa faa lɛ vɛɛ te va ga de maliɣii Ziizɛ Kolai vaa ʋoloi. 24Nui nii é wo lilisu tɔ ga nui nu ɣa laa la. Towaa kɛ.
25Nà numaa, a Gala feli gé ʋaa ma.
26A de vaitiɛ ɣaazɔ luo ga ná maa wua. 27Gè deʋea gè da wo ya de maliɣii mavele ma ga wo kɛ kɔlɔi nii lodo wo vaitiɛ ɣaazɔ ma.
28De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo ʋaa ma fãa.
Currently Selected:
1 TƐSƐLONAIKAITIƐ 5: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
