1JƆ̃ 1

Zɛʋui mawoi

1Fai nii ɣɛni ŋetea é ziɣi tɔɔ‐zei ʋolo ma. Gé mɛnini gé wɛlɛ bá ga ɣaazu. Gé pɛtɛni gé yee ʋowũ ba. Pilegɛ zeʋui mawoi va. 2Zɛʋui maʋaa wuloni kɛnɛ ma gé wɛlɛ bá gíɛ mazeele woo ʋe. Na ɣa ɣɛɛ na zɛʋui nii kwɛ̃ɛ gɛ lɛ ba, gá maʋaa wosu wiɛ ga woo maa zeezea. Towa é ɣɛni de ɣeea Gala ba máʋai wulo kɛnɛ ma gé ɣaazu. 3Nii gé mɛniga gé pɛtɛ towa gé bosu wiɛ ƃalaa pɛ, kɛɛ ʋaa ma a da wani de ɣɛ siɛ‐pulu zu. Tɔwɔ da de ɣeea Galani ka de siɛ‐pului zu é vɛɛ dúi Ziizɛ Kolai va. 4Gá nii wonɛzu wo wɔ kɛɛ ʋaa ma gá wuu‐zu‐nɛɛ‐wuloai maʋai wolo wulu ma ƃɔɔ kpowũ.

Gala ka ga ŋada wodoa

5Keela woi nii ɣa gé mɛnini Gala dui la gé bo wiɛ ga woo maa zeezea. Na ɣa ga Gala ka ga ŋada wodoa. Ŋada ƃidi ʋaa ta nɛpɛ gɛ lɛ maʋai va. 6Ani da bo na ga da tiɛni da siɛ‐pulu zu, tɔwɔ diɛ ziɛ kpidii zu, a kɛ tii da zɛɛ ʋaa wosu. 7Kɛ̀ ani da ɣɛ na ziɛzu ŋada wodoai zu è ɣɛ velei é la ŋada wodoai zu, de ɣile‐giledai da ɣɛ siɛ‐pulu zu. Na ɣa ɣɛɛ na dúi Ziizɛ Kolai maŋamai ɣa faa yowũ ɣaazɔ wuo de ma. 8Ani da bo na ga faa yowũ lɛ de va, da ɣɛ ƃɔɔ ɣaa wɔlɔsu, gaamai lɛ ɣɛɛ de yii zu. 9Ani da laa wu ziɣi na da ʋaa yowũitiɛ ma de bo, tɔ ga nui nu ɣa laa la, tele bogɛi. Towaa da ʋaa yowũitiɛ zu ʋaa yɛ é de wulo da lele‐bo tala luoi ɣaazɔ zu. 10Ani da bo na ga dɛ lɛ faa yowũ ɣɛɛni, a da ɣɛ Gala kɛɛzu ga zɛɛ ʋaa nu. Nà wɔ ka ɣɛɛ na, gói ɣa na lɛ ɣɛɛ de ɣigi zu.

Currently Selected:

1JƆ̃ 1: DN1971

Highlight

Copy

Compare