1KƆLĨITIƐ 8

Maa‐niini gala‐kɔɔ laa‐mii ŋɛnii

1Yá lii na ga maa‐niini galagitiɛ‐wɔɔ mii ŋɛnigi wɔɔ laa vele, de kwɛ̃ni ga “kele‐ɣele ka de pɛ de ya.” “Kele‐ɣele” ka nu maʋaa wɔɔlɔ ƃɔɔ ɣaazu, kɛ̀ wõila ɣa yá nu wɔɔlɔ tuo vele vagɔ‐woga zu. 2Ani tɔ nu ta nɛpɛ ki su ga é faa ta wɛ̃ni, pagɛ manui kwɛ̃ ga nii maa nɛɛ é kwɛ̃ ɛ́ lɛ dɛ kwɛ̃ɛni. 3Kɛ̀ ani nu ta wõivɛ ga Gala, manui wɛ̃ɛgɛ Gala bɛ. 4Na ma daa‐mii ŋɛnii nii ta maa‐niini galaga wɔɔ la, a lii na ga na mii ʋai wɔɔ laa vele, de kwɛ̃ni ga “maa‐niini gala gɛ lɛ ma ɔ́ ɣɛ ga ʋulu‐su ŋɛni ƃɔɔƃɔɔ.” Kwɛ̃ɛgɛ de vɛ wɔnɔ ga “Gala ta ƃɔnɔ nɛpɛ gɛ lɛ ma, tɔ nɔ ɣilekpu.” 5To mu ɣee ta ŋɛnia lamaa ta ɣɛ na tiɛ te lili ga “gala” gee‐zuvɛ ɔɔ zui ma, è ɣɛ velei sa “galaga” lamagɛi la numaa ya te maliɣia lamagɛi. 6Kɛ̀ na pɛ ge ɣɛɛvɛ, da dɛi de ɣaazu Gala ka nɔ ɣile. Na ɣa ga de ɣeeai nii ŋɛni pɛ kuloai zéea de wuloai ŋetea ga de ɣɛ bá. Na ɣa ɣɛɛ na de maliɣii ɣa ɣile. Na ɣa ga Ziizɛ Kolai nii ŋɛni pɛ ge sáala zu de ŋeteai zu sáala zu.

7Na pɛ ge ɣɛɛvɛ, nu pɛ ge lei nii maɣele‐ɣelegi ɔ́ ɣɛ zeéa. Kɛ̀ nui taniga ta ɣɛ daa‐mii ŋɛni miizu é te ɣigi zu ga ƃɔɔƃɔɔ su ga maa‐niini gala kɔɔvɛ la. Toku ge zei ga maa‐niini gala zeke‐kɛɛ ɣa é yɛga ga te ɣɛɛ ʋaa é yɛga su é ziitia zai ŋɛ ni ma. Tei tɔwɔ ta ɣi‐gaa‐ziɛ ʋii ƃɛi te maa woolagɛ na mavele ma. 8Daa‐mii ŋɛni lɛ de ɣɛɛ ga nu vagɔ Gala gaazu. Ani kɔnɔ da laa mii na, nà lɛ de luo vele vaga ɔ́ leve nii va de kɛɛzu. Dɛ lɛ ɣɛ laa miini, nà lɛ de luo vele yowũa ɔ́ leve nii va de kɛɛzu. 9A kɛsɛ nɔ kɛɛ ʋaa ma wo yee‐laa‐ʋũigi bogɛi daa‐mii ŋɛni‐mii ʋaa zu nà mɛ lɛ ɣɛ ga ŋɛnii yá ƃesa niitiɛ luo ta yee‐la‐mai ʋii ƃɛi. 10Su‐wulo‐zu ɣa ga nii.? Ani yài è ga nui kele‐ɣele ge zéea, nui nii ná ki‐gaa‐ziɛi ʋii ƃɛi yá è vɛtɛ na zeini maa‐niini gala‐feli wɔta walai wu yìɛ laa mi na, kɛ̀bɛ manui yii ɣa lɔ ga é maa‐niini gala‐kɔɔ mii ŋɛnigi ta mi, kɛlɛɛ? 11Nii mavele ma yà ɣele‐ɣelegi ɣa kɛ nui nii ná zee‐la‐mai ʋii ƃɛi é ga a de wɔi nii Kolai zaa maʋaa ma sú ƃɔnɔ wo. 12Na ma wa faa yowũ ɣɛɛ na ga wo vaitiɛ, ta ɣi‐gaa‐ziɛi nii fii ƃɛi wiɛ kãla‐ŋala, Kolai ɣa na wa ɣɛ faa yowũ ɣɛɛzu la. 13Na mazaƃui ma ani daa‐mii ŋɛni ta ɣa ɣɛ na ga zaƃu bɔ̀ɔ nu ziɣi pele va, gɛ̀ lɛ wɔlɔ‐wɔlɔ mia, kɛɛ ʋaa ma gè mɛ lɛ ɣɛ ga zaƃu bɔ̀ɔ nu ɔ́ ziɣi pele va.

Currently Selected:

1KƆLĨITIƐ 8: DN1971

Highlight

Copy

Compare