1KƆLĨITIƐ 6

Kpolo‐laa ʋaa‐wo‐bo fai niitiɛ ya tɛ lɛ ga Kolai maa vea

1?Ani wo ta ɣɛɛ‐zɔ ka ɣɛ na bɔɔ wuu zu, ɛ́ lɛ ga manu na mɛni‐masa‐kɛ̃ɛ ʋaa ga é ƃe daa ʋaa va Gala na dɔ numaitiɛ vɛ, kɛ̀ to mu é maa ƃolo la niitiɛ ma tɛ lɛ ga Gala na dɔa? 2?Wɛ lɛ kwɛ̃ni ga Gala na numaitiɛ ɣa te vaazu ŋeteai zu ʋaa‐wogi wosu? ?Ani tɔwɔ wa ɣa wo ga ŋeteai zu ʋaa‐wogi‐wo bea, fai niitiɛ tɛ lɛ ga faa maa nɛɛ natiɛ ɣa wɛ lɛ zooga wɔ te wo? 3?Wɛ lɛ kwɛ̃ni ga a da vaazu Gala ta ɣeelaitiɛ ta ʋaa‐wo bosu? ?Faa zɛƃɛ liigo ɣa sa yá vile ŋeteai nii va dɛ lɛ zooga dɔ bo? 4Ani na ɣavele ʋaa‐wogi ta ɣa vile na wo laa wu, wa leve ɣɛ le wo da numai niitiɛ vɛ tɛ lɛ Gala pɛlɛi ɣaazu ga ŋɛni‐ɣɛɛ ŋɛni? 5Fai nii gè bosu tɔ ga wa wũfe faa. ?Nu ta nɛpɛ gɛ lɛ wo zaama ʋaa ve ɔ́ ɣele‐ɣele ɔ́ kulo ɣɛɛ wo ga waitiɛ wo kuuwu ɣilagi zu ɔ́ ɣɛ wa ʋaa‐wo bosu? 6?Kɛni nɔ wa letelega wa ɣɛ ɣiini maa ƃolo laazu niitiɛ ma tɛ lɛ Kolai ʋaa ziɣini ga gaama? 7Kpolo‐laa ʋai ʋɔlɔ wiɛ ɣiini ma su‐wulo‐zu ɣa ga wo ɣalea ƃɔɔ wu. Zɛƃɛi é ba wɛ lɛ teɣa mu ƃega ba ƃaa‐wo‐ma ʋaa ɔ́ ɣɛ ga wiɛ? Zɛƃɛ ʋaa zu wɛ lɛ mu teɣa ƃega ba woia gɔ lɔ wo ma? 8Wa mu wa ƃɔɔ wiɛ ƃaa‐wo maʋaa ɣɛ wiɛ woia tuo wo, wiɛ ʋɔlɔ kɛ ƃalaa ga wo vaitiɛ. 9?Wɛ lɛ kwɛ̃ni ga tele‐bo tala luo‐wo bea te weli gɛ lɛ ɣɛɛ ga Gala na masadai? A mɛ lɛ ƃe ba gaa‐wɔlɔ gɔ wo ga wiɛ. Ƃaa‐wulo‐ma wɛ̃ɛ‐yeke‐kɛɛ vea, maa‐niini gala‐feli vea, ŋaza‐kɛɛ vea ƃɔga zini‐bɛ veai niitiɛ ta wɛ̃ɛ zo, zinai niitiɛ ta te vaa zinaa ɣɛ ga te ŋazaa, 10wũmɔ vea, ŋɛni‐wõi bea, dɔɔ‐ƃakpa‐ƃoale vea, niitiɛ ta numaa laa woo zu loo ga yowũa, taitiɛ ta numaa weli kulo te ya ga gaa‐ƃaa — te pɛ te ta weli gɛ lɛ ɣɛɛ ga Gala na masadai. 11Tɔwɔ vele ɣa na wo taniga wo ɣɛni la. Kɛ̀ wo wuovɛ sa, wo wuloai su ga tee ga Gala na dɔa, wo ga nui nii kɛɛ‐zɔ yowũi lɛ vɛɛ ba ga faa de maliɣii Ziizɛ Kolai na daa‐zeigi zu. Nii ɣa ɣɛ a da Ɣalagi vaa ŋinɛgi zaala zu.

A ƃaa la Gala ma ga wo lɔtɔi zu vele

12Ɣee ta nu ta ɣa bo yíɛ ɣɛ tea, “Zèe laa ʋũigɛ ga gè faa mazii ta nɛpɛ kɛ.” Tɔwɔ fai pɛ ge lei ɔ́ ɣɛ ga nu na kpɔ‐ba ʋaa. “Nà kagi zèe laa ʋũigɛ ga gè faa mazii ta nɛpɛ kɛ,” kɛ̀ faa ta nɛpɛ gɛ lɛ kolo kpaga. 13Bogɛ ga “Daa‐mii ŋɛni ɣa nɔ nu ƃudɛgi ʋaa ma, nu ƃudɛgi wɔ é daa‐mii ŋɛni ʋaa ma.” Kɛ̀ tɔwɔ Gala ka felegɔ pɛ kãla‐ŋala. Towaa daa‐mii ŋɛni ŋala‐ŋala é nu ƃudɛgi ŋala‐ŋala. Nu lɔtɔi lɛ nɔ ƃaa‐wulo‐ma wɛ̃ɛ‐yeke‐kɛɛ ʋaa laa ma, kɛ̀ tɔ de maliɣii maʋaa ma, de maliɣii wɔ ge faa ma. 14Tɔwɔ Gala ge de maliɣii wu ziɣini saa ya. Tɔ kɔnɔ ƃalaa yá de wu ziɣi saa ya ná gaa‐ƃai mavele ma. 15?Wɛ lɛ kwɛ̃ni ga wo malɔtɔitiɛ ta ga Kolai vaa vekega? A ɣɛ na ŋɛ na mu, gà zoo gè Kolai vaa vekegitiɛ ziɣi gè te ɣɛ su ɣile ta ŋaza nui nii é ƃɔɔ ɣɛɛ ga yawo? Na lɛ wɔlɔ‐wɔlɔ ɣɛɛ! 16?Wɛ lɛ kwɛ̃ni ga nui é vilega ŋaza nui nii wulu é ƃɔɔ ɣɛɛ ga yawo manui ƃɔga yawo ŋaza nui te lɔtɔi ɣɛɛ su ɣilekpu? Ƃɔvɛlaale ponɛvɛ Gala kɔlɔi zu mawoi ga “Te nu felegɔ ta ɣɛ ga ŋɛni ɣilekpu.” 17Tɔwɔ nui ta de maliɣii ta ɣɛ su ɣile, ta tɔ ta ɣi‐gaa‐ziɛi ɣa ɣɛ su ɣile. 18A ƃe teve ƃaa‐wulo‐ma wɛ̃ɛ‐yeke‐kɛɛ ʋaa va! Faa yowũi zɔitiɛ ɣaazɔ nu ɣa kɛ towaa kɛ ga lɔtɔi wulu vele. Kɛ̀ nui é ƃaa‐wulo‐ma wɛ̃ɛ‐yeke kɛɛzu, manui ɣa faa yowũ ɣɛɛzu ga ƃɔɔ lɔtɔi. 19?Wɛ lɛ kwɛ̃ni ga wo lɔtɔi ɣa ga Gala‐feli wɔta wala baa ŋinɛgi ʋaa ma é wo yii zu, nii kuloai Gala zeea wo maa zɔlɔ wo? Wɛ lɛ ga ƃɔɔ wo. 20Wo ɣeeavɛ ga tɔnɔ‐ba ŋɛni. Na ma a ƃaa la Gala ma ga wo lɔtɔi zu vele.

Currently Selected:

1KƆLĨITIƐ 6: DN1971

Highlight

Copy

Compare