1KƆLĨITIƐ 4

Ziizɛ na keelaitiɛ ta lii

1Pelei pagɛi nu ɣi gaa ziɛ la é vile gé va tɔ ga é gé ziɣi ga Kolai yee‐wu vea ta Gala zeea ʋaitiɛ te loowugɛi yɛga te maʋaa‐ƃaso bea. 2Na ɣa wulo na su, nu ɣi ka zeke‐maʋaa‐ƃaso bea va ga te ɣɛ ga nui niitiɛ nu ɣa la ga tiɛ. 3Kɛ̀ ani nà dɛi ve, tɔ ga fai gwala vɛnɛi gàazu ga wo nà faa‐wo bo ɔɔ é wo nu ƃuse yaa wuuti ta nɛpɛ su. Gɛ̀ lɛ ʋɔlɔ ƃalaa ɣi gaa ziɛzu ga ani kɛ̀ɛ‐zɔ ka bà ƃaa kɛ̀ɛ‐zɔ gɛ lɛ bà. 4Kì gɛ lɛ faa ta nɛpɛ ba ga kɛ̀ɛ‐zɔ. Tɔwɔ nà lɛ kɛ̀ɛni ga nui bogɛi ga faa lɛ yɛni ma. De maliɣii ɣa yá nà faa‐wo bo. 5Na ma a mɛ lɛ kui yɛ na wulu wɔ faa‐wo gaa leve. A mɛ lɛ gaa leve de maliɣii ɔ́ vɛɛ vaazu, nui nii yá fai niitiɛ wulo podo ɣala‐kala ga te loowugɛi zai ŋɛ ni. Na ɣa ɣɛɛ na é nu ƃuse wuu‐zu ɣigi wulo kɛnɛ ma. Na maʋolo ɣa nu ɣile‐giledai ɣa daa‐maa‐lɛi nii zɔlɔ wo da Gala zeea nii kuloai bu bɛ́ ga é sɔlɔ wo.

6Nà numaa, gá ƃɔga Apɔɔla ɣa gè gé lɛɛ ga po‐kɔ̃ɔ fai nii ɣaazɔ ʋaa ma bogɛi bɛ̀ gìɛ kɛ wa wulo‐nu‐ma ʋaa ma, kɛɛ ʋaa ma wiɛ faa maa woli ga masa pele gé ma wiɛ ŋeteai ɣɛ ga ziɛ vele ga Gala kɔlɔi laa woi wo ta mɛ lɛ yee la nu ma ɔ́ ɣɛ yoka tevezu ga bɔɔ. 7Toku ge zei ga zɛƃɛ ɣa nu ɣa wɛlɛ ba wo ta maʋaa va maa ʋeligɛi baa va? Zɛƃɛ ɣa é wo ya ɛ́ lɛ wuloni nu ta ya wɔ vɛɛ maa zɔlɔ wosu? Ani tɔwɔ kulovɛ nu ta ya wo maa zɔlɔ wo, wa leve ɣɛ le wo mayoka teve è ɣɛ ɛ́ lɛ ɣɛ ɣɛ wo vɛ ga faa‐nɛɛ? 8Kɛ̀bɛ wo yee laa ʋegɛ sa! Kɛ̀bɛ wo ƃɛtɛɛ! Wo gé yɛga wulu wo ɣɛ ga ɣalasoga! È ɣɛ kpa wa sa ɣalasodai ƃɔɔ ɣɛɛzu, kɛɛ ʋaa ma gé vɛɛ wo va gé gá dɔ laa ɣɛ! 9Kìgi zu Gala ge gé wuloa é gé loo kpanagala, gái gé ga Ziizɛ na keelaa, gé loai ga nu pɛ pulu vele è ɣɛ numai niitiɛ deʋeai ga te za. Ƃɔvɛlaale gé ɣɛɛ ga pɛtɛ ŋɛni ŋetea ga nu ƃusea ƃɔga Gala ta ɣeelaa tiɛ wɛlɛ gé va. 10Gá ga titi bea Kolai mazaƃu ma, kɛ̀ wo ɣigi zu wa ga kele‐ɣele bea wo ɣɛɛ vele ma su ɣilekpu wa Kolaini. Zobo gɛ lɛ gé vɛ, kɛ̀ wo ɣigi zu zobo ka wo vɛ. Wo ɣigi zu wũfe‐ma ɣa wo vɛ, kɛ̀ gá dɛi ƃaa wulovɛ gé ma. 11É wɛ̃ɛ ga zai ŋɛ ni gá pulu ziɣizu kpoale‐wõi yìɛ gé zo seɣe zaɣa gé ma gíɛ dowa maa zɔlɔ wo gé ɣɛɛ‐zu lɛ ma. 12Na ɣa ɣɛɛ na gá mɔɔlɛzu gá ƃɔɔ gíɛ ƃɔɔ lii ɣɛ. Ta gé laa woo zu loo na ga yowũa, gá tuuyiɛ loo mavea ma. Ta gé ƃɔɔla na, gá yii la gá. 13Ta gé laa wo na ga yowũa, gá ɣaa ƃaa gé gé yɔɔzu ƃɛtɛ gá tiɛni. Gé ɣɛɛ ga tulu‐ga ŋɛnia zui ʋaa ma. Gá sa le. Gá ɣa gé ga maa yɛ̃ɛlɛ ŋɛnia ŋɛni pɛ saama.

14Gɛ̀ lɛ nii wonɛzu ga gè wo wũfe. Kɛ̀ gà wo lɛnɛsu ga velei wo la ga ẁõila lea. 15Ƃɔvɛlaale nui lamavɛ ƃalaa kpi tiɛ pele wulo ga wiɛ wo ɣɛɛ vele ma su ɣilekpu wa Kolaini, wo ɣeea lɛ lamani te zu. Gè ɣɛɛni ga wo ɣeea a de ɣɛɛ vele ma su ɣilekpu da Kolaini woo niinɛ vagɔi zaala zu gè boga wo ma. 16Na ma gà daazu wiɛ ga wo ɣɛ ga dàa‐wo‐kɔ̃ɔ bea. 17Nii mazaƃui ma gè Temete leveni wo wɔ vɛ, nii é ga ẁõila lui é ga nui nu ɣa laa la te ɣɛɛ vele ma su ɣilekpu ta de maliɣii, kɛɛ ʋaa ma é wo ɣi too tùo velei zu gé ɣɛɛ vele ma su ɣilekpu gá Kolai, na ɣa ga velei gà te lɛɛ la ŋadɛi ɣaazɔ Gala pɛlɛi ɣaazɔ wu. 18Nui taniga ƃɔɔ ʋaa wɔɔlɔvɛ te ɣaazu, yà ka è ɣɛ gɛ̀ lɛ ɣɛ vaazu wo wɔ. 19Kɛ̀ su lɛ woozasu gè va wo wɔ vɛ, ani Gala ka ʋaa na bu. Na ɣa ɣɛɛ na gà sa gà kpɔɔ‐ʋaa‐wɔɔlɔ‐gaazu veai niitiɛ ta ɣaa‐ƃai maʋaa wu ɣaa ziɛ. Ɛ́ lɛ ga te yɛpɛ woi. 20Ƃɔvɛlaale Gala na masadai lɛ zɛpɛ woo zu. Tɔ ga gaa‐ƃaa. 21Zɛƃɛ ɣa wo wõini? ?Gè va wo wɔ ga kɔlɔ ƃaɣa, ƃaa gè va wo wɔ ga wõila gè wo zɛ‐sɛ bo?

Currently Selected:

1KƆLĨITIƐ 4: DN1971

Highlight

Copy

Compare