Di Offenbarung 15

Es 15. Gabiddel.

Di Sivva Engel Mitt Di Sivva Blohwa

1No habb ich noch en zaycha ksenna em Himmel es grohs un vundahboah voah. Es voahra sivva engel mitt di letshta sivva blohwa. Mitt denna is Gott sei zann no faddich gmacht.

2Ich habb ksenna vass gegukt hott vi en say funn glaws gmixt mitt feiyah, un selli vo's diah ivvah-kumma sinn, un aw ivvah sei abgott-gleichnis, sei meik un's nambah funn sei nohma. Si henn am say kshtanna mitt harfa funn Gott in iahra hend.

3Si henn's leet fumm Mosi, Gott sei gnecht, ksunga, un's leet fumm Lamm, un henn ksawt,

“Grohs un vundahboah sinn dei verka,

oh Hah Gott, du Awlmechtichah.

Gerecht un voahlich sinn dei vayya,

du Kaynich funn di leit funn alli lendah.

4Veah soll sich nett feicha funn diah, oh Hah,

un dei nohma preisa?

Fa du laynich bisht heilich.

Di leit funn alli lendah zayla kumma

un dich ohbayda.

Fa dei gerechti verka sinn gvissa gmacht.”

5Noch demm habb ich gegukt, un da tempel im Himmel mitt em zeiknis-tent voah uf gmacht.

6Un di sivva engel mitt di sivva blohwa sinn aus em tempel kumma. Si voahra geglayt mitt sauvahri, sheinichi glaydah, gmacht funn linnen duch un si henn en goldich band um iahra brusht rumm katt.

7No hott ayns funn di levendichi diahra sivva goldichi shisla gevva zu di sivva engel. Di sivva shisla voahra foll mitt em zann funn Gott, deah vo laybt fa immah un immah.

8Un da tempel voah kfild mitt shmohk funn di hallichkeit funn Gott un funn sei graft. Nimmand hott in da tempel gay kenna biss di sivva blohwa funn di sivva engel faddich gmacht voahra.

Currently Selected:

Di Offenbarung 15: pdcB

Highlight

Copy

Compare