Psalm 136
136
Da 136. Psalm.
En Dank-Leet Fa Gott Sei Sayya
1Danket da Hah, fa eah is goot;
fa sei shtandhaftichi-leevi bleibt ayvichlich.
2Danket da Gott funn awl di gettah,
fa sei shtandhaftichi-leevi bleibt ayvichlich.
3Danket da Hah funn awl di hahra,
fa sei shtandhaftichi-leevi bleibt ayvichlich;
4deah laynich es grohsi vundahra dutt,
fa sei shtandhaftichi-leevi bleibt ayvichlich;
5deah es mitt veisheit di himla gmacht hott,
fa sei shtandhaftichi-leevi bleibt ayvichlich;
6deah es di eaht ivvah di vassahra auskshtrekt hott,
fa sei shtandhaftichi-leevi bleibt ayvichlich;
7deah es di grohsa lichtah gmacht hott,
fa sei shtandhaftichi-leevi bleibt ayvichlich;
8di sunn es ivvah da dawk roold,
fa sei shtandhaftichi-leevi bleibt ayvichlich;
9da moon un di shtanna es ivvah di nacht roola,
fa sei shtandhaftichi-leevi bleibt ayvichlich;
10deah es di Egyptah iahra eahsht-geboahrani kshlauwa hott,
fa sei shtandhaftichi-leevi bleibt ayvichlich;
11un hott Israel aus Egypta kfiaht,
fa sei shtandhaftichi-leevi bleibt ayvichlich;
12mitt en shteiki hand un en auskshtrektah oahm,
fa sei shtandhaftichi-leevi bleibt ayvichlich;
13deah es da Roht Say in zvay fadayld hott,
fa sei shtandhaftichi-leevi bleibt ayvichlich;
14un hott Israel deich di mitt difunn gebrocht,
fa sei shtandhaftichi-leevi bleibt ayvichlich;
15avvah eah hott da Pharao un sei greeks-gnechta in da say kshmissa,
fa sei shtandhaftichi-leevi bleibt ayvichlich;
16deah es sei leit deich di vildahnis kfiaht hott,
fa sei shtandhaftichi-leevi bleibt ayvichlich;
17deah es grohsi kaynicha nunnah kshlauwa hott,
fa sei shtandhaftichi-leevi bleibt ayvichlich;
18un hott mechtichi kaynicha doht gmacht,
fa sei shtandhaftichi-leevi bleibt ayvichlich;
19da Sihon, da kaynich funn di Amoriddah,
fa sei shtandhaftichi-leevi bleibt ayvichlich;
20un da Og, da kaynich funn Bason,
fa sei shtandhaftichi-leevi bleibt ayvichlich;
21un eah hott iahra land gevva fa en eahbshaft,
fa sei shtandhaftichi-leevi bleibt ayvichlich;
22en eahbshaft zu sei gnecht Israel,
fa sei shtandhaftichi-leevi bleibt ayvichlich;
23deah es uns nett fagessa hott vo miah nunnah gedredda voahra,
fa sei shtandhaftichi-leevi bleibt ayvichlich;
24un hott uns frei gmacht funn unsah feinda,
fa sei shtandhaftichi-leevi bleibt ayvichlich;
25deah es ess-sach gebt zu alles levendiches,
fa sei shtandhaftichi-leevi bleibt ayvichlich.
26Danket da Gott fumm himmel,
fa sei shtandhaftichi-leevi bleibt ayvichlich.
Currently Selected:
Psalm 136: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
