Shpricha 28
28
Es 28. Gabiddel.
Vanning Un Lanning
1Di gottlohsa shpringa fatt even vann nimmand eena nohch is,
avvah di gerechta sinn so shuah funn sich selvaht es en layb.
2Vann en land sindicht, hott's feel roolahs,
avvah vann's groold is bei en mann mitt goodah fashtand un eisicht,
dann shtayt's lang.
3En oahmah mann es di oahma nunnah drett,
is vi en shteikah reyya es kenn ess-sach ivvahrich lost im goahra.
4Selli es es ksetz falossa, lohva di gottlohsa,
avvah selli es es ksetz halda, shaffa geyyich si.
5Leit es evil doon, fashtayn nett vass feah is,
avvah selli es zumm Hah gukka, fashtayn's goot.
6'Sis bessah fa en oahmah mann sei es eahlich lawft,
es vi en reichah mann sei es uneahlich lawft.
7En boo es es ksetz hald hott veisheit,
avvah aynah es sich uf hald mitt fressah shohmd sei daett.
8Vann ebbah reich vatt bei zu feel indressa tsheahtsha,
sellah geddaht's fa ebbah shunsht es bamhatzich is zu di oahma.
9Ebbah es sei oah vekk drayt funn's ksetz heahra,
macht even sei gebaydah grausam.
10Ebbah es di ufrichticha in en evilah vayk fiaht,
zayld in sei aykni fall falla,
avvah di unshuldicha zayla en goodi eahbshaft greeya.
11En reichah mann maynd eah veah shmeaht in sei aykni awwa,
avvah en oahmah mann mitt eisicht kann deich een sayna.
12Vann di gerechta ivvah-hand henn, dann hott's grohsi hallichkeit,
avvah vann di gottlohsa in di macht kumma, dann doon leit sich fashtekla.
13Veah sei sinda fashtekkeld hald, zayld nett goot du,
veah si avvah bekend un falost, find bamhatzichkeit.
14Ksaykend is da mann es da Hah immah firchta dutt,
avvah sellah es sei hatz hatt macht kumd in druvvel.
15En gottlohsah roolah ivvah oahmi leit,
is vi en roahrichah layb un en hungahrichah beah.
16En roolah es kenn fashtand hott, drett leit nunnah,
avvah aynah es uneahlich geld hast, zayld lang layva.
17Ebbah es mensha-bloot shuldich is,
zayld sich fashtekkeld halda biss an's grawb;
loss nimmand eem helfa.
18Veah unshuldich lawft bleibt aus di kfoah,
avvah veah uneahlich is zayld bletzlich in en loch falla.
19Veah-evvah es sei land shaft, zayld feel broht havva,
avvah veah unaydichi sacha nohch gayt, zayld oahrich oahm sei.
20En shtandhaftichah mann zayld feel sayya havva,
avvah aynah es kshvind reich vadda vill, zayld nett unkshtrohft gay.
21Es is nett goot es en richtah unnahshitt macht fa ebbah,
avvah dayl doon letz fa en shtikk broht.
22En geitzichah mann is eahnshtlich fa reich vadda,
un vayst nett es eah glei oahm sei zayld.
23Ebbah es en mann grawt raus zankt, grikt shpaydah may dank,
es vi ebbah es en mann ohshmaycheld mitt di zung.
24Ebbah es sei maemm un daett rawbt,
un sawkt, “Sell is nett letz,”
is en freind zu selli es sacha fadauva.
25En greedichah mensh shtatt shtreit uf,
avvah veah sich uf da Hah falost zayld goot ab sei.
26Ebbah es sich falost uf sich selvaht is dumm,
avvah ebbah es lawft in veisheit bleibt aus di kfoah.
27Ebbah es gebt zu di oahma zayld kenn noht havva,
avvah veah sei awwa zu macht zu eena vatt feel faflucht.
28Vann di gottlohsa ivvah-hand henn, dann doon leit sich fashtekla,
avvah vann di gottlohsa umkumma, vadda di gerechta feel.
Currently Selected:
Shpricha 28: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
