Shpricha 22
22
Es 22. Gabiddel.
1En goodah nohma is may veaht es feel reichheit,
un goodi eah is bessah es silvah un gold.
2Di reicha un di oahma sinn gleicha in ay ding;
da Hah hott si awl gmacht.
3En mann es denkt, saynd di kfoah un fashtekkeld sich,
avvah di dumma gayn on un missa leida difoah.
4Daymoot un di furcht fumm Hah,
bringa reichheit, eah un layva.
5In di pawt funn di gottlohsa sinn danna un fang-shtrikka,
avvah sellah es sich vatsht hald sich veit vekk funn eena.
6Lann en kind vi eah gay soll,
un vann eah moll ald vatt drayt eah nett vekk difunn.
7Di reicha roola ivvah di oahma,
un sellah es laynd is en gnecht zu sellah es eah glaynd hott difunn.
8Veah unrecht sayt, eahnd druvvel,
no kumd di root funn seim zann zu en end.
9En mann es geahn gebt zayld ksaykend vadda,
fa eah gebt funn seim broht zu di oahma.
10Dreib da shpoddah naus, un shtreit gayt aw naus,
no vatt's zarres un veeshti kshvetzah aw kshtobt.
11Veah en rein hatz leebt un gnaydich shvetzt,
zayld em kaynich sei freind sei.
12Di awwa fumm Hah vatsha ivvah eisicht,
avvah di vadda funn di unshtandhafticha vadda ivvah-kshmissa.
13En faulah mensh sawkt, “'Sis en layb draus;
ich mecht doht gmacht vadda in di shtrohsa.”
14Es maul funn en huah is vi en deef loch,
sellah es Gott zannich is mitt fald datt nei.
15Dumheida sinn im hatz funn kinnah,
avvah da shlayk-shtekka dreibt's aus eena.
16Sellah es di oahma nunnah drett fa sich selvaht reich macha,
adda sellah es kshenkah gebt zu di reicha—si vadda awl zvay oahm.
Veisheit Shreives
17Heich ab, un ich lann dich di vadda funn selli mitt veisheit;
nemm zu hatz vass ich dich lann.
18Fa's zayld leeblich sei vann du dee vadda im sinn haldsht,
un si awl grisht haldsht uf dei leftz.
19Ich lann dich dee vadda heit,
so es du dei hofning in da Hah dusht.
20Habb ich nett feel goodi sacha kshrivva fa dich
es roht un lanning gevva?
21Habb ich nett dee kshrivva fa veisa vass recht un voah is,
so es du en voah andvat gevva kansht
zu selli es dich kshikt henn?
22Rawb di oahma nett veil si oahm sinn,
un drett selli nett nunnah am richts-doah es in noht sinn;
23fa da Hah zayld ufshtay fa si,
un nemd's goot layva vekk funn selli es iahra recht vekk nemma.
24Mach dich nett en freind mitt en zannichah mann,
hald dich nett uf mitt aynah es kshvind bays vatt,
25adda du mechsht sei vayya lanna
un dei aykni sayl in en fall greeya.
26Sei nett ayns funn selli es en bund macha,
un fashprech nett fa goot shtay fa ebbah sei shulda;
27vann du nix hosht fa's betzawla,
dann vatt dei ayya bett unnich diah vekk gnumma.
28Moof nett da ald meik-shtay
es di foah-feddah datt anna ksetzt henn.
29Saynsht du en kshiktah mann am sei eahvet du?
Eah zayld fannich kaynicha shtay;
eah zayld nett fannich niddahri leit shtay.
Currently Selected:
Shpricha 22: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
