Shpricha 20
20
Es 20. Gabiddel.
1Vei is en shpoddah, un shteik drinkes macht em vild,
veah-evvah es fafiaht vatt dibei is nett shmeaht.
2Da zann funn en kaynich is vi en layb am roahra,
veah een fazand dutt sei layva in di kfoah.
3'Sis en eah zu en mann es sich vekk hald funn shtreit,
avvah ennich ebbah dummes kann en fecht shteahra.
4Da faul mann dutt nett bloowa im shpoht-yoah,
so hott eah nix un muss bedla an di eahn.
5Vass en mann im sinn hott fa du, is vi ebbes in deef vassah,
avvah en fashtendichah mann kann's raus zeeya.
6Feel leit sawwa vi shtandhaftich es si sinn,
avvah's is hatt fa ebbah finna es gedraut sei kann.
7Da gerecht mann fiaht en unshuldich layva,
un ksaykend sinn sei kinnah noch eem.
8Da kaynich es uf em kaynich-shtool hokt fa richta,
sift raus awl's evil mitt sei awwa.
9Veah kann sawwa, “Ich habb mei hatz sauvah gmacht,
un ich binn rein funn mei sinda?”
10Dess sinn zvay sacha es da Hah hast,
uneahlichi gvichtah fa veeya, un uneahlichi ksharra fa messa.
11Even en kind veist vass es is bei vass es dutt,
bei gukka kann ma sayna eb's eahlich un goot is.
12Miah henn awwa fa sayna un oahra fa heahra,
un da Hah hott si awl zvay gmacht.
13Leeb da shlohf nett, so es du nett oahm vasht;
hald dei awwa vakkah so es du genunk broht hosht.
14“'Sis nix veaht, 'sis nix veaht,” sawkt da kawfah,
avvah no gayt eah un braekt veyyich vass eah gekawft hott.
15'S hott feel gold un's hott feel keshtlichi shtay,
avvah leftz es shvetza mitt eisicht sinn may keshtlich.
16Vann ebbah fashprocha hott fa goot shtay fa en fremdah sei shuld,
dann nemm sei glayt un hald's biss di shuld betzawld is.
17Broht es uneahlich grikt vatt, is sees zu en mann,
avvah eah end uf mitt en maul foll graevvel.
18Mach aus vass du du vitt bei goodah roht greeya;
eb du greek machsht, frohk anri diveyya.
19Ebbah es kshvetzah drawkt, kann nix hinna rumm halda,
so bleib vekk funn ebbah es zu feel shvetzt.
20Vann ebbah sei maemm adda sei daett faflucht,
sei licht vatt ausgedu im shvatz dunkla.
21En eahbshaft es kshvind grikt voah am ohfang,
zayld nett ksaykend sei am end.
22Sawk nett, “Ich zayl evil zrikk betzawla.”
Voaht uf da Hah, un eah zayld diah helfa.
23Da Hah hast unnahshidlichi gvichtah fa veeya,
un en falshi vohk is nett goot.
24En mann sei shritt sinn kfiaht beim Hah,
vi kann en mann sei ayknah vayk vissa?
25'Sis en fall fa zu kshvind en opfah fashprecha zu Gott,
un no shpaydah eahsht drivvah denka.
26En kaynich mitt veisheit sift di ungettlicha raus,
un eah dreibt's dresha-rawt ivvah si.
27Da geisht fumm mensh is es licht funn Gott,
un dess licht sucht alles aus im innahlicha mensh.
28Di voahheit un shtandhaftichkeit heeda da kaynich,
un gerechtichkeit hald een uf seim kaynich-shtool.
29Di hallichkeit funn yungi leit is iahra grefta,
un di eah funn aldi leit is iahra veis-grohwi hoah.
30Haddah shtrohf butzt evil vekk,
un eahnshtlichi shtraych macht's innahlicha sauvah.
Currently Selected:
Shpricha 20: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
