3. Mosi 27
27
Es 27. Gabiddel.
Adninga Veyyich Fashprechnissa Zumm Hah
1Da Hah hott viddah kshvetzt zumm Mosi un hott ksawt,
2“Shvetz zu di Kinnah-Israel un sawk eena, ‘Vann ebbah en fashprechnis macht un gebt ebbah ivvah zumm Hah, un diah misset ausmacha vass sellah mensh veaht is,
3do is vi diah's ausmacha sellet: Vann en mann zvishich zvansich un sechtzich yoah ald is, setzet's an fuftzich shtikkah silvah fumm fasamling-tent-geld.
4Vann's en veibsmensh is, setzet's an dreisich shtikkah silvah.
5Vann's en mensh zvishich fimf zu zvansich yoah ald is, un's is en boo, dann setzet's an zvansich shtikkah silvah, un fa en maydel an zeyya shtikkah silvah.
6Vann's en mensh zvishich en moonet un fimf yoah ald is, un's is en boo, setzet's an fimf shtikkah silvah, un fa en maydel an drei shtikkah silvah.
7Vann en mensh sechtzich adda may yoah ald is, un's is en mann, setzet's an fuftzay shtikkah silvah; un fa en fraw setzet's an zeyya shtikkah silvah.
8Vann ebbah es dess fashprechnis gmacht hott zu oahm is fa's betzawla, dann soll eah da mensh zumm preeshtah nemma, un eah setzt no vass eah veaht is so vi da mann's afoahra kann es dess fashprechnis gmacht hott.
9Vann's fashprechnis en diah is es gopfaht sei kann zumm Hah, dann vatt's diah heilich es zumm Hah gevva is.
10Avvah eah soll no nett en anres gevva difoah, en goodes fa en shlechtes adda en shlechtes fa en goodes; vann eah sell dutt dann vadda si awl zvay heilich.
11Vann eah en unrein diah fashprecht, ayns es nett gopfaht sei kann zumm Hah, dann soll eah's diah zumm preeshtah bringa.
12No dutt da preeshtah ausmacha eb's goot adda shlecht is. Vass-evvah es da preeshtah sawkt, sell is vass es veaht is.
13Vann da ayknah ausmacht fa's diah zrikk havva, dann muss eah en fimfdel may betzawla es es veaht is.
14Vann ebbah sei haus ivvah-drayya vill fa's heilich macha zumm Hah, dann muss da preeshtah ausmacha eb's goot adda shlecht is. Vass da preeshtah ausmacht, sell is vass es veaht is.
15Vann da mann es sei haus ivvah-gedrayt hott, es viddah zrikk havva vill, muss eah en fimfdel may betzawla es es veaht is. No vatt's viddah sei.
16Vann en mann en shtikk funn seim geahbda land zumm Hah gevva vill, soll's ksetzt sei vass es veaht is bei vi feel sohma es es nemd fa's eisayya. Sex bushel geahsht sohma is fuftzich shtikkah silvah veaht.
17Vann eah sei feld ivvah-drayt im Frei-Setz-Yoah, dann bleibt's am price es ksetzt is.
18Avvah vann eah sei feld ivvah-drayt noch em Frei-Setz-Yoah, dann muss da preeshtah ausmacha vass es veaht is bei vi feel yoahra es ivvahrich sinn biss es neksht Frei-Setz-Yoah.
19Vann da mann es sei land ivvah-gedrayt hott, ausmacht fa sei land zrikk havva, dann muss eah en fimfdel may gevva es es veaht is, no vatt's viddah sei.
20Avvah vann eah's nett zrikk kawft, adda vann eah's fakawft zu ebbah shunsht, dann kann's nimmi zrikk gekawft sei.
21Vann's land frei gmacht vatt am Frei-Setz-Yoah, dann vatt's heilich, vi en feld es raus ksetzt is zumm Hah; no is es di preeshtah iahra land.
22Vann en mann en feld zumm Hah gebt es eah gekawft hott, un es nett sei voah deich sei freindshaft,
23dann muss da preeshtah ausmacha vass es veaht is biss an's neksht Frei-Setz-Yoah. No muss eah sell geld betzawla sellah dawk, veil sell geld heilich is zumm Hah.
24Im Frei-Setz-Yoah soll sell feld zrikk gedrayt sei zu demm es eah's gekawft hott difunn, zu sellah es es aykend deich sei freindshaft.
25Awl di prices sella ksetzt sei bei em gvicht fumm fasamling-tent-geld; en shtikk silvah is zvansich glenni daylah veaht bei gvicht.
26Avvah nimmand dauf en eahsht-geboahra diah gevva veil's eahsht-geboahra diah shund zumm Hah heaht; dess is eb's en ox adda en shohf is, si sinn shund em Hah seini.
27Vann's en unrein diah is, dann dauf eah's zrikk kawfa am ksetzta price, avvah eah muss noch en fimfdel ditzu du. Vann eah's nett zrikk kawft, dann soll's fakawft vadda am ksetzta price.
28Avvah alles es en mann aykend, eb's en mann adda en diah adda sei land is, ennich ebbes es folshtendich ivvah-gevva is zumm Hah dauf nett fakawft vadda adda zrikk gekawft sei; es is es alli-heilichshta zumm Hah.
29Kenn mensh es folshtendich raus ksetzt is fa doht gmacht sei unnich leit, soll zrikk gekawft sei; eah muss doht gmacht sei.
30En zeyyadel funn alles es fumm land is, eb's frucht fumm grund is adda obsht fumm bohm, sell heaht zumm Hah. Es is heilich zumm Hah.
31Vann en mann sei zeyyadel zrikk kawfa vill muss eah en fimfdel may gevva es vass es veaht is.
32En zeyyadel fumm fee un di shohf heaht zumm Hah. Alli zeyyet diah es unnich em heedah sei shtekka gayt vann si gezayld vadda, is heilich zumm Hah.
33En mann dauf nett di gooda raus laysa funn di shlechta, un eah dauf nett ayns in da blatz du fumm anra. Vann eah ayns in da blatz dutt fumm anra, dann sinn si awl zvay heilich un kenna nett zrikk gekawft vadda.’”
34Dess sinn di gebodda es da Hah gevva hott zumm Mosi uf em Berg Sinai fa di Kinnah-Israel.
Currently Selected:
3. Mosi 27: pdcB
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible