Jeremia 25
25
Es 25. Gabiddel.
Di Feinda Funn Di Natt
1Im fiahda yoah fumm Joiakim, em Josia sei boo es kaynich funn Juda voah, is es vatt zumm Jeremia kumma veyyich awl di leit funn Juda. Sell voah's eahsht yoah es da Nebukadnezar kaynich voah funn Babylon.
2So hott da brofayt Jeremia ksawt zu awl di leit funn Juda un zu awl selli es in Jerusalem gvoond henn:
3Fa drei un zvansich yoah, fumm dreitzayda yoah es da Josia, em Amon sei boo kaynich funn Juda voah, biss deah do dawk is es vatt fumm Hah zu miah kumma, un ich habb ivvah un ivvah zu eich kshvetzt, avvah diah hend nett keicht.
4Un even noch demm es da Hah sei gnechta di brofayda ivvah un ivvah zu eich kshikt hott, hend diah nett keicht un si acht katt.
5Si henn ksawt, “Drayyet nau, alli-ebbah funn eich, funn eiyah evili vayya un verka, no kennet diah fa'immah un immah im land bleiva es da Hah zu eich un eiyah feddah gevva hott.
6Gaynd nett anri gettah nohch fa si deena un ohbayda; fazannet mich nett mitt sell vass eiyah hend gmacht henn. No doon ich eich nett shtrohfa.”
7“Avvah diah hend miah nett keicht,” sawkt da Hah, “un diah hend mich fa'eiyaht mitt vass eiyah hend gmacht henn, un hend shawda uf eich selvaht gebrocht.”
8Fasell sawkt da Awlmechtich Hah dess: “Veil diah mei vadda nett abkeicht hend,
9dann roof ich awl di leit funn di natt un mei gnecht da Nebukadnezar, da kaynich funn Babylon,” sawkt da Hah, “un ich bring si geyyich dess land un di leit es drinn voona, un geyyich awl di anra lendah drumm rumm. Ich fadaub si biss nix may ivvahrich is; ich mach si en kshpott, grausam un du si ayvichlich faveeshta.
10Ich nemm di fraylicha yachta vekk funn eena, un di shtimma fumm hochtzeidah un em hochtzich-maydel, di yacht funn meel-shtay un di helling funn lichtah.
11Dess gans land zayld fadauva leiya un awl dee leit zayla da kaynich funn Babylon deena fa sivvatzich yoah.
12Avvah vann di sivvatzich yoah moll ivvah sinn, zayl ich da kaynich funn Babylon, sei leit, un's land funn Babylon shtrohfa fa iahra shuld,” sawkt da Hah. “Ich zayl sell land faveesht leiya lossa fa'immah.
13Ich zayl awl di sacha uf sell land kumma lossa es auskshprocha voahra digeyya, awl di sacha es kshrivva sinn in demm buch un alles es gebroffetzeit voah beim Jeremia geyyich awl di lendah.
14Di leit funn Babylon zayla selvaht kfanga sei bei feel anri leit un shteiki kaynicha; ich zayl si zrikk betzawla fa vass si fadeend henn mitt di eahvet funn iahra hend.”
Gott Sei Gericht Un Zann
15Dess is vass da Hah, da Gott funn Israel ksawt hott zu miah: “Nemm dess kobli funn mei hand es kfild is mitt em vei funn mei zann un mach awl di leit's drinka es ich dich shikk ditzu.
16Vann si's drinka zayla si shtaekkahra un aus iahra meind gay fumm shvatt es ich unnich si shikka zayl.”
17So habb ich's kobli funn sei hand gnumma un habb awl di leit gmacht's drinka es eah mich kshikt hott ditzu, naymlich:
18Jerusalem, awl di shtett funn Juda un awl iahra kaynicha un foah-gengah henn's missa drinka, so es si faveesht vadda un en shpott un en fluch vadda vi si sinn heit;
19da Pharao, da kaynich funn Egypta, sei gnechta, sei foah-gengah un awl sei leit,
20awl di fremda leit datt; awl di kaynicha funn Uz; awl di kaynicha ivvah di Philishtah in di shtett Askalon, Gaza, Ekron un selli es ivvahrich sinn in Asdod;
21Edom, Moab un Ammon;
22awl di kaynicha funn Tyrus un Sidon; di kaynicha am say nohch un ivvah em say;
23Dedan, Thema, Bus un awl selli es veit ab sinn;
24awl di kaynicha funn Arabia un awl di kaynicha funn fremdi leit es in di vildahnis voona;
25awl di kaynicha funn Simri, Elam un Media;
26un awl di kaynicha funn di natt nayksht un veit ab, ayns noch em anra—awl di kaynich-reicha uf di gans eaht. Un noch eena zayld da kaynich funn Sheshach es aw drinka.
27“No sawk eena, ‘Dess is vass da Awlmechtich Hah, da Gott funn Israel, sawkt: Drinket, vaddet ksoffa un shmeiset ruff; fallet un shtaynd nimmi uf deich's shvatt es ich unnich eich shikka zayl.’
28Avvah vann si's nett doon fa's kobli funn dei hand nemma un drinka, dann sawk eena, ‘Dess is vass da Awlmechtich Hah sawkt: Diah misset's drinka!
29Gukket moll, ich binn am ohfanga fadauves uf di shtatt bringa es mei Nohma hott, so denket diah es diah zaylet unkshtrohft gay? Diah zaylet nett gay unni kshtrohft sei, veil ich en shvatt uf di gans eaht bringa zayl, sawkt da Awlmechtich Hah.’
30Nau broffetzei awl dee vadda geyyich si un sawk zu eena:
‘Da Hah zayld roahra funn drovva in di hay;
eah zayld dimla funn seim heilich gebei
un macht en mechtichah roah ivvah sei land.
Eah greisht vi en mann am drauva ausdredda,
geyyich awl selli es uf di eaht voona.
31Di yacht vatt keaht biss an's end funn di eaht,
da Hah zayld awl di heida pshuldicha;
eah zayld alli mensh richta,
un macht awl di ungettlicha doht.’”
So sawkt da Hah.
32Dess is vass da Awlmechtich Hah sawkt:
“Gukket, evil is am naus gay,
funn aym folk zumm anra;
en grohsah shtoahm is am uf kumma,
funn di endah funn di eaht.”
33An selli zeit zayla selli es doht gmacht voahra beim Hah, ivvahrawlich sei, funn ay end funn di eaht biss an's anra. Es zayld nimmand heila fa si un si zayla nett fagrawva vadda. Si zayla uf em bodda leiya vi misht.
34Brillet diah shohf-heedah, un heilet;
rollet eich in di esh, diah foah-gengah funn di drubb.
Eiyah zeit fa kshlacht sei is kumma;
diah zaylet falla un fabrocha sei vi keshtlich ksha.
35Di shohf-heedah henn neiyets es si anna shpringa kenna,
di foah-gengah funn di drubb kenna sich nett fashtekla.
36Heichet zu di shohf-heedah am brilla,
di foah-gengah funn di drubb iahra heiles,
veil da Hah am iahra vayt fadauva is.
37Di fridlicha bletz vadda faveesht,
deich da gleedich zann fumm Hah.
38Vi en layb falost eah da blatz vo eah sich fashtekkeld hott,
iahra land is leah un faveesht
deich's shvatt funn sellah es fadaubt,
un deich em Hah sei gleedichah zann.
Currently Selected:
Jeremia 25: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
