Jeremia 12
12
Es 12. Gabiddel.
Em Jeremia Sei Gebayt
1Du bisht immah gerecht, oh Hah,
vann ich mich faglawk zu diah.
Doch, muss ich dich frohwa veyyich dei gerichtes:
Favass gayt's goot mitt di gottlohsa?
Favass gayt alles di unglawvicha iahra vayk?
2Du hosht si geblanst, un si sinn ausgvatzeld;
si vaxa un bringa frucht.
Du bisht uf iahra leftz,
avvah bisht veit vekk funn iahra hatz.
3Doch, du kensht mich, oh Hah;
du saynsht mich un broviahsht di gedanka in meim hatz veyyich diah.
Shlayf si vekk vi shohf es gebutshaht vadda!
Setz si raus fa da shlacht-dawk!
4Vi lang zayld's land so drukka shtay
un's graws in alli feld ufdrikla?
Veil selli es drinn voona ungettlich sinn,
sinn awl di diahra un fekkel doht ganga.
Un di leit sawwa,
“Eah zayld nett sayna vass es gebt mitt uns.”
Gott Sei Andvat Zumm Jeremia
5“Vann du kshprunga bisht mitt di mennah unni geil,
un si henn dich meet gmacht,
vi kansht du ufhalda mitt geil?
Vann du anna falsht im land vo kenn kfoah is,
vi zaylsht du du in di dikka hekka fumm Jordan Revvah?
6Fa even dei breedah un dei aykni family,
even si henn dich falossa
un shvetza laut geyyich dich.
Drau eena nett,
even vann si shay shvetza zu diah.
7Ich habb mei haus Israel falossa,
un habb mei eahbshaft ufgevva;
ich habb sell es mei sayl leeb hott,
in di hend funn iahra feinda gevva.
8Mei eahbshaft is zu miah vadda
vi en layb draus im bush.
See roaht geyyich mich,
un fasell hass ich see.
9Mei eahbshaft is vadda zu miah vi en shekkichah awdlah;
di anra awdlah sinn drumm rumm fa fechta.
Gay un geddah awl di vilda diahra,
bring si bei fa helfa fressa.
10Feel shohf-heedah henn mei vei-goahra fadauva,
si henn mei feld nunnah kshtambt;
si henn mei shay feld,
in en vildahnis gmacht.
11Si henn's alles faveesht,
es leit fadauva fannich miah;
es gans land is fadauva un blutt,
veil nimmand ebbes drumm gebt.
12Uf awl di hohcha un bludda bletz in di vildahnis
kumma selli es fadauva,
fa es shvatt fumm Hah zayld uf fressa
funn aym end fumm land biss an's anra,
nimmand zayld fridda havva.
13Si zayla vaytza sayya, avvah danna eahnda;
si veahra sich aus, avvah greeya nix difoah.
Deich em Hah sei gleedichah zann,
missa si sich shemma veyyich iahra eahn.”
14Dess is vass da Hah sawkt veyyich mei ungettlichi nochbahra es di eahbshaft nemma es ich mei leit Israel gevva habb. “Ich zayl si ufvatzla funn iahra land, un zayl's haus funn Juda aus di mitt funn eena reisa.
15Avvah noch demm es ich awl dee leit ufgvatzeld habb un vekk gnumma habb funn iahra land, zayl ich bamhatzich sei zu eena, un zayl si viddah zu iahra eahbshaft bringa in iahra aykna land.
16Un's kumd zu vann si da vayk funn mei leit recht lanna, un lanna fa shveahra bei meim nohma, un sawwa, ‘So voah es da Hah laybt,’ grawt vi si eahshtah mei leit gland henn fa shveahra zumm abgott Baal—no zayla si viddah ufgebaut vadda unnich mei leit.
17Avvah vann ennichi leit in dee lendah nett heicha, dann zayl ich si gans aus di vatzel reisa un si umbringa,” sawkt da Hah.
Currently Selected:
Jeremia 12: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible