Jesoiya 51
51
Es 51. Gabiddel.
Drohsht Fa Jerusalem
1“Heichet mich oh, diah es am gukka sind fa gerechtichkeit,
un es am da Hah sucha sind.
Gukket zumm felsa aus demm es diah kakt sind,
un's loch es diah raus gegrawva voahret.
2Gukket zumm Abraham, eiyah faddah,
un zu di Sara, dee es diah geboahra sind ditzu.
Vo ich een groofa habb voah eah yusht aynah,
avvah ich habb een ksaykend un een feel gmacht.
3Da Hah zayld Zion drayshta,
un zayld bamhatzich sei zu iahra veeshti bletz;
eah macht iahra vildahnis vi Eden,
un iahra drukka land vi em Hah sei goahra.
Frayt un fraylichkeit vatt kfunna datt,
un aw dankboahkeit un di yacht funn singes.
4Heichet mich oh, mei leit,
un heichet vass ich sawk, mei folk:
Es zayld en ksetz ausgay funn miah,
un mei adning un vass ich's recht hays,
zayld en licht vadda zu di Heida.
5Mei gerechtichkeit is nayksht,
mei saylichkeit is uf em vayk,
un mei eahm zayla di heida richta.
Lendah veit ab sinn am gukka fa mich,
un sinn am voahra uf mei oahm.
6Machet eiyah awwa uf zu di himla,
gukket an di eaht unna droh;
di himla zayla fagay vi shmohk,
di eaht zayld ausveahra vi glaydah,
un selli es drinn voona
zayla shteahva un doht gay vi mukka.
Avvah mei saylichkeit bleibt fa'immah
un mei gerechtichkeit unni end.
7Heichet mich ab, diah es di gerechtichkeit visset,
diah leit es mei ksetz in eiyah hatz hend.
Feichet eich nett vann leit eich nunnah doon,
seind nett grikt vann si kshvetzah macha veyyich eich.
8Fa di shawva fressa si vi glaydah,
un di veahm fressa si vi vull.
Avvah mei gerechtichkeit bleibt fa'immah,
un mei saylichkeit funn layves-zeit zu layves-zeit.”
9Vekk uf, vekk uf, mach dich shteik,
du oahm fumm Hah.
Vekk uf, so vi in di alda dawwa,
so vi in di layves-zeida funn lang zrikk.
Voah's nett dich es Rahab fahakt hott,
es es dracha-diah deich kshtocha hott?
10Voah's nett dich es da say ufgedrikkeld hott,
sell grohs, deef vassah,
un es en vayk deich da deef say gmacht hott,
so es di saylicha drivvah nivvah gay henn kenna?
11Selli es frei gmacht sinn beim Hah, kumma zrikk,
si kumma zu Zion am singa;
ayvichi frayt is uf iahra kebb.
Si vadda froh un zayla fraylich sei,
dreebsawl un heiles gayt vekk.
12“Ich, yau ich, binn sellah es eich draysht.
Veah bisht du es sich feicht veyyich mensha es shtauva,
un veyyich mensha-kinnah es yusht sinn vi graws?
13Hosht du da Hah fagessa es dich gmacht hott,
deah es di himla auskshtrekt hott,
un da grund glaykt hott fa di eaht,
un bei een fagessa, dich kfeicht hosht alli dawk,
veyyich em zann fumm nunnah-dreddah,
deah vo's im sinn katt hott fa dich umbringa?
Vo is nau da zann fumm nunnah-dreddah?
14Sellah es kfanga is, vatt glei sei aylend lohs,
eah zayld nett shtauva im kellah-kfengnis,
un zayld aw nett unni broht sei.
15Fa ich binn da Hah dei Gott es da say ufshtatt,
so es di vella rausha—
da Awlmechtich Hah, is sei nohma.
16Ich habb mei vadda in dei maul gedu,
un dich fashtekkeld im shadda funn mei hand.
Ich habb di himla in da blatz gedu
un da grund glaykt fa di eaht,
un binn sellah es sawkt zu Zion,
‘Diah sind mei leit.’”
Jerusalem Brauch Nimmi Leida
17Vekk uf, vekk uf,
un shtay uf, Jerusalem,
du es fumm Hah sei hand
sei kobli funn zann gedrunka hosht,
du es da letsht drobb gedrunka hosht,
un's hott dich shtaekkahra gmacht.
18Funn awl iahra kinnah
es see geboahra hott, voah's nimmand fa see fiahra.
Es voah nimmand fa see nemma bei di hand,
unnich awl di kinnah es see ufgezowwa hott.
19Dee zvay sacha sinn ivvah dich kumma:
faveeshtung un shawdes,
hungahs-noht un's shvatt.
Veah kann dich drayshta?
Yau, veah kann dich drayshta?
20Dei kinnah sinn ummechtich,
si leiya am ekk funn alli shtrohs
vi en hash es kfanga is in en net.
Si sinn foll mitt em zann fumm Hah
un em zank funn deim Gott.
21So dann, heich dess ab,
du es aylendich un ksoffa bisht,
avvah nett mitt vei.
22Dess is vass dei Awlmechtichah Hah sawkt,
dei Gott es ufshtayt fa sei leit:
“Gukk moll, ich habb's kobli aus dei hand gnumma,
es kobli es dich ksoffa macht.
Du solsht nimmi aus sellem kobli funn zann drinka.
23Ich du's kobli in di hand funn dei nunnah-drikkah,
selli es ksawt henn zu diah,
‘Layk dich anna so es miah ivvah dich lawfa kenna.’
Un du hosht dei bukkel gmacht vi da grund,
vi en shtrohs es leit drivvah lawfa.”
Currently Selected:
Jesoiya 51: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
