Jesoiya 50
50
Es 50. Gabiddel.
Israel Iahra Sind
1Dess is vass da Hah sawkt:
“Vo sinn eiyah maemm iahra divorce babiahra,
selli es ich gyoost habb fa see fatt shikka?
Adda zu vemm habb ich eich fakawft
es ich in di shuld voah?
Gukket moll, es voah deich eiyah sinda es diah fakawft voahret;
un eiyah maemm voah fatt kshikt deich eiyah ivvah-dreddes.
2Favass voah nimmand datt vo ich kumma binn?
Vo ich groofa habb, favass hott nimmand andvat gevva?
Voah mei oahm zu katz fa eich frei setza?
Voah ich zu shvach fa eich zrikk hohla?
Gukket moll, yusht bei zanka, dann drikkel ich da say uf,
un mach di revvahra in en vildahnis,
iahra fish gayn doht un fafaula,
si fadashta unni vassah.
3Ich glayt di himla mitt dunkelheit,
un dekk si zu mitt sekk-glaydah.”
Em Hah Sei Gnecht
4Gott da Hah hott miah di zung gevva
funn selli es gland sinn,
fa vissa vels vatt es selli helft es matt sinn.
Eah vekt mich uf alli meiya,
eah vekt mei oah uf fa heahra
vi aynah es am lanna is.
5Gott da Hah hott mei oah uf gmacht,
un ich habb mich nett geyyich een kshteld
adda zrikk gedrayt.
6Ich habb mei bukkel zu selli gedrayt
es mich fashlauwa henn,
un mei bakka zu selli es mei boaht grobt henn.
Ich habb mei ksicht nett vekk gedrayt
funn selli es mich fashpott un fashpautzt henn.
7Veil Gott da Hah miah helft,
dann binn ich nett fashohmd.
Fasell habb ich mei ksicht ksetzt vi en flint-shtay,
un ich vays es ich nett fashohmd vatt.
8Sellah es mich gerecht hayst is nayksht,
so veah zayld ebbes geyyich mich bringa?
Vella mitt-nannah fannich da richtah shtay.
Veah fashuldicht mich?
Loss een fannich miah shtay!
9Gukket moll, Gott da Hah helft miah.
Veah is sellah es mich fadamd?
Si veahra awl aus vi glaydah,
di shawva fressa si.
10Veah is unnich eich es da Hah fircht,
un heicht di shtimm funn seim gnecht?
Veah lawft im dunkla
un hott kenn licht?
Loss een sei fadrauwa in da Hah du,
un sich falossa uf sei Gott.
11Gukket moll, awl diah es en feiyah ohshtekket,
diah es feiyah-shtekka drawwet;
lawfet in di helling funn sellem feiyah,
in di helling funn di feiyah-shtekka es diah ohkshtekt hend.
Dess is vass diah greeya zaylet funn mei hand;
diah zaylet anna leiya in shmatza.
Currently Selected:
Jesoiya 50: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
