Jesoiya 48
48
Es 48. Gabiddel.
Shteibahrich Israel
1“Heichet dess ab, diah leit fumm Jakob,
diah es Israel kaysa sind,
un es kummet fumm Juda sei nohch-kummashaft;
diah es shveahret im nohma fumm Hah,
un es baydet zumm Gott funn Israel,
avvah nett in voahheit un gerechtichkeit.
2Si sawwa es si sinn funn di heilich shtatt,
un falossa sich uf da Gott funn Israel,
sei nohma is da Awlmechtich Hah.
3Lang zrikk habb ich di sacha foahksawt katt
es blatz gnumma henn,
mei maul hott si ksawt un si vissa gmacht,
no bletzlich habb ich's gedu, un's voah so.
4Fa ich habb gvist vi dikk-kebbich es diah sind,
di flexa in eiyah hels sinn vi eisa,
eiyah shtanna sinn vi bronze.
5Fasell habb ich eich dee sacha ksawt lang zrikk;
ich habb si ksawt eb si blatz gnumma henn,
so es diah nett sawwa kennet,
‘Unsah abgettah henn dess gedu;
unsah kshnitzeld gleichnis un gegossanah abgott henn's gedu.’
6Diah hend dee sacha keaht, nau gukket si awl oh.
So favass vellet diah si nett glawva?
Funn nau on sawk ich eich neiyi sacha,
fashtekkeldi sacha es diah nett visset.
7Si sinn kshaffa nau, nett lang zrikk;
diah hend nett keaht funn dee sacha eb heit.
Dess is so es diah nett sawwa kennet,
‘Yau, miah henn gvist diveyya.’
8Diah hend nett keaht diveyya, adda's fashtanna,
eiyah oahra voahra nett uf even lang zrikk.
Ich habb goot gvist es diah nett gedraut sei kennet,
un es diah ivvah-dreddah voahret funn muddahs-leib.
9Fa di eah funn meim nohma loss ich mei zann nett lohs;
ich hayb en zrikk so es ich gepreist va,
un so es ich eich nett abshneit.
10Gukket nau, ich habb eich greinicht,
avvah nett vi ma silvah reinicht.
Ich habb eich broviaht im offa mitt druvvel.
11Fa mei eah, ich du dess fa mei aykni eah.
Vi kend ich mei nohma faleshtaht vadda lossa?
Ich gebb mei hallichkeit zu nimmand shunsht.
Israel Is Frei Gmacht
12Heich mich ab, oh Jakob,
un Israel, dich es ich groofa habb:
Ich binn een;
ich binn da eahsht un da letsht.
13Mei aykni hand hott di eaht gegrund,
un mei rechtsi hand hott di himla auskshtrekt;
vann ich si roof,
shtayn si awl zammah uf.
14Fasamlet eich un heichet:
Veah unnich eena hott dee sacha foahksawt?
Da Hah hott een leeb,
deah es em Hah sei villa ausdrawwa zayld geyyich Babylon,
sei oahm zayld geyyich di Chaldayah sei.
15Ich, yau, ich habb kshvetzt;
yau, ich habb een groofa.
Ich habb een raus gebrocht
un eah zayld sei eahvet ausdrawwa.
16Kummet do zu miah, un heichet dess:
Fumm alli eahshta habb ich nett hinna rumm kshvetzt.
Funn di zeit es es blatz nemd, binn ich datt.”
Un nau da Awlmechtich Hah hott mich kshikt mitt seim Geisht.
17Dess is vass da Hah, dei Frei-Shtellah,
sellah es heilich is, sawkt:
“Ich binn da Hah dei Gott,
deah es dich land vass es besht is fa dich,
deah es dich fiaht im vayk es du gay solsht.
18Vann du yusht acht gnumma hetsht funn mei gebodda,
dann veah dei fridda gvest vi en revvah,
un dei gerechtichkeit vi di vella fumm say.
19Dei nohch-kummashaft veah gvest vi da sand,
un dei kinnah vi di sand kanna.
Iahra nohma veah nee nett abkshnidda vadda,
un veah nee nett zu nix gebrocht
vadda fannich miah.”
20Falosset Babylon,
shpringet funn di Chaldayah!
Greishet dess naus mitt frayt
un losset's vissa.
Shikket's vatt naus zu's end funn di eaht,
un sawwet, “Da Hah hott sei gnecht da Jakob
frei-kshteld.”
21Si voahra nett dashtich
vo eah si deich di vildahnis kfiaht hott;
eah hott's vassah gmacht aus em shtay lawfa.
Eah hott da shtay kshpalda,
un's vassah is raus gloffa.
22“Avvah fa di gottlohsa,
hott's kenn fridda,” sawkt da Hah.
Currently Selected:
Jesoiya 48: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
