Jesoiya 35
35
Es 35. Gabiddel.
Di Fraylicha Kumma Zrikk
1Di vildahnis un's drukka land zayla sich froiya,
es veesht land zayld fraylich sei un zayld bleeya mitt blumma.
2Mitt blumma zayld's land vundahboah bleeya,
un mitt grohsi frayt zayld's singa.
Di hallichkeit funn Lebanon vatt zumm land gevva,
un da glitz funn Karmel un Sharon;
leit zayla em Hah sei hallichkeit sayna,
un di mechtich graft funn Gott.
3Mach di hend shteik es matt sinn,
un helf di vaklicha gnee uf shtay.
4Sawk zu selli mitt engshtlichi hatza,
“Seind shteik, feichet eich nett.
Gukket moll, eiyah Gott zayld kumma,
eah zayld kumma fa auseeva.
Gott kumd fa eich helfa,
eah macht's uf zu eich.”
5No vadda di awwa funn di blinda uf gmacht,
un di oahra funn di dawba zayla heahra.
6No zayla di lohma tshumba vi en hash,
un selli es nett shvetza kenna zayla singa.
Di vassahra zayla lawfa in di vildahnis,
un di grikka in di drukkana bletz.
7Da hays sand vatt en vassah-loch,
un's dashtich land kfild mitt shpringa.
Da blatz vo vildi hund als gleyya henn,
zayld ufvaxa mitt graws un vassah-shtengel.
8Es zayld en grohsah vayk datt sei,
un eah zayld da Heilich Vayk kaysa sei.
Nimmand unreines dauf datt druff gay,
da vayk is yusht fa sei leit;
selli unni veisheit lawfa nett druff.
9Kenn layb zayld datt sei,
un kenn rawsich diah gayt druff,
si vadda nett kfunna datt.
Yusht di saylicha zayla datt lawfa.
10Selli es da Hah frei gmacht hott kumma zrikk.
Si gayn in Zion nei am singa,
un ayvichi frayt zayld uf iahra kebb sei.
Si sinn ufgnumma mitt freyyaheit un frayt;
dreebsawl un heiles is fabei.
Currently Selected:
Jesoiya 35: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
