Jesoiya 32
32
Es 32. Gabiddel.
En Gerecht Kaynich-Reich
1Gukk moll, es zayld en kaynich kumma
es sei reich fiaht mitt gerechtichkeit,
un sei mitt-helfah zayla richta vass recht is.
2Yaydahs funn eena zayld sei vi en blatz aus em vind,
vi en blatz es ma sich fashtekla kann fumm shtoahm,
vi en vassah-grikk es lawft in en drukka land,
un vi da shadda funn en grohsah felsa in en drukkanah blatz.
3No doon selli es sayna kenna, iahra awwa nett zu macha
un selli es heahra kenna, zayla goot abheicha.
4Di meinds funn di ungeduldicha zayla no sacha recht fashtay,
un di zunga es shtoddahra zayla sacha recht sawwa.
5Selli unni veisheit zayla nimmi fanumma sei fa veisheit havva,
un di uneahlicha fa eahlich sei.
6Sellah unni veisheit sawkt dummi sacha,
un sei meind denkt evili sacha.
Eah gayt ungettlichi sacha nohch,
un sawkt letzi sacha veyyich em Hah,
di hungahricha lost eah hungahrich,
un funn di dashticha hald eah's vassah vekk.
7Da fafiahrah dutt ungettlichi sacha,
eah shkeemd fa evil du,
mitt leeya hald eah di oahma funn iahra recht greeya,
even vann si sawwa vass voah is.
8Avvah da eahlich mensh dutt eahlichi sacha,
un eah shtayt fa sell vass recht is.
Di Veibsleit Funn Jerusalem Sinn Gvand
9Diah veibsleit es so en faul layva fiahret,
nemmet acht, un heichet mich ab,
diah mayt es so unbekimmaht sinn,
heichet vass ich zu sawwa habb!
10In bissel may es en yoah funn nau,
zaylet diah es unbekimmaht sinn ziddahra;
es zayld kenn drauva-eahn sei,
un aw kenn annah obsht.
11Ziddahret, diah veibsleit es en faul layva fiahret,
druvlet eich, diah unbekimmahdi mayt!
Nemmet eiyah glaydah ab,
un doond sekk-glaydah um eich rumm.
12Heilet un shlauwet uf eiyah brisht,
fa di shayni feldah
un di fruchtboahra vei-goahra,
13un fa's land funn mei leit,
dess es ivvah-gvaxa sei zayld
mitt hekka un danna.
Yau, heilet fa di heisah mitt fraylichi leit,
un fa di fraylich shtatt.
14Es kaynich-haus zayld falossa sei,
un di shtatt mitt feel leit vatt leah,
da hivvel un da vatsh-tavvah vadda ayvichlich foll lechah fa diahra,
en blesiah fa di vilda aysla, un vayt fa's fee,
15biss da Geisht ausgleaht is uf uns funn in di hay,
un di vildahnis en fruchtboah feld vatt,
un's fruchtboah feld gukt vi en bush.
Fridda In Gott Sei Reich
16Eahlich richtes zayld no in di vildahnis sei,
un gerechtichkeit im fruchtboahra feld.
17Di frucht funn gerechtichkeit zayld fridda sei,
un sell vass aus gerechtichkeit kumd
is shtilli roo un fadrauwes fa'immah.
18Mei leit zayla in fridda voona,
mitt goodi haymeda,
un in bletz funn shtilli roo.
19Even vann shlohsa di busha fadauva,
un di shtatt nunnah gebrocha vatt,
20vi ksaykend zayla diah sei,
veil diah eiyah sohma bei awl di grikka sayya kennet,
un eiyah fee un aysla ivvahrawlich vayda kennet.
Currently Selected:
Jesoiya 32: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
