Jesoiya 28
28
Es 28. Gabiddel.
Ephraim (Israel) Zayld Falla
1Vay zumm frecha krohn funn di siffah funn Ephraim,
zu selli hallich blumm es am favelka is,
dee es am evvahsht end funn en fruchtboahri valley hokt,
zu selli shtatt es so hohch ohksenna is bei leit
es am unnah gay sinn deich vei!
2Gukket moll, da Hah hott ebbah es greftich un shteik is,
ebbah es kumma zayld vi en shlohsa-shtoahm un en mechtichah vind,
vi en reyyah-shtoahm es alles unnich vassah macht,
un eah shmeist alles nunnah uf da bodda.
3Sellah frech krohn funn di siffah funn Ephraim
zayld nunnah gedredda vadda unnich di fees.
4Selli hallich blumm es am favelka is,
selli es am evvahsht end funn en fruchtboahri valley hokt,
zayld sei vi en freeyi frucht es zeidich is eb zeit,
un ebbah saynd si, nemd si in di hand un est si kshvind.
5No endlich zayld da Awlmechtich Hah selvaht
en hallichah krohn sei,
en krohn funn shayni blumma,
fa sei leit es ivvahrich sinn.
6Zu selli es im richtah-shtool hokka
zayld eah da geisht gevva es si feah richta.
Eah zayld graft gevva
zu selli es di feinda zrikk dreiva am doah.
7Allaveil avvah doon di brofayda un preeshtah ksoffa rumm lawfa funn vei.
Si henn so feel shteik drinkes un vei gedrunka
es si fashtatzt sinn un nett grawt lawfa kenna.
Si sinn zu ksoffa fa di visions fashtay es Gott shikt,
un si shtolbahra vann si richta.
8Iahra dish henn kotz ivvahrawlich druff,
un's is nix sauvahres ennich vo.
9Si frohwa, “Veah maynd eah es eah am lanna is?
Veah vill eah dess vatt fashtay macha?
Zu kinnah es nimmi millich drinka,
zu selli es yusht vekk gnumma sinn funn di brusht?
10Eah sawkt, ‘Du dess un du sell, du dess un du sell,
un macht adning noch adning, un adning noch adning,
bissel do un bissel datt, bissel do un bissel datt.’”
11Siddah es si nett heicha, dann bringd Gott
fremdi leit rei mitt fremdi shprohcha,
un deich si shvetzt eah zu dee leit.
12Eah hott ksawt zu eena,
“Dess is da roo-blatz, losset selli es meet sinn roowa,
un do is da blatz fa roowa.”
Avvah si henn eem nett abkeicht.
13Fasell zayld's vatt fumm Hah zu eena sei:
du dess un du sell, du dess un du sell,
dee adning un selli adning, dee adning un selli adning,
bissel do un bissel datt, bissel do un bissel datt—
so es si gayn un falla hinnahsich,
vadda vay gedu, shtolbahra in di fall un vadda kfanga.
14Fasell heichet's vatt fumm Hah, diah shpoddah,
diah es dee leit funn Jerusalem roolet.
15Diah hend ksawt, “Miah henn en bund gmacht mitt em doht,
un mitt em grawb.
Vann si moll gans ivvahraus uf uns lohs gayn,
dann zayld's uns fafayla,
fa miah henn di leek un falshheit unsah fashtekkel-blatz gmacht.”
16So dess is vass da Awlmechtich Hah sawkt,
“Gukket moll, ich layk en shtay in Zion
en shtay es ausbroviaht is,
en keshtlichah ekk-shtay es goot gegrund is;
veah in een glawbt, brauch nee nett angsht havva.
17Ich mach eahlich richtes da bendel fa messa,
un gerechtichkeit da level.
Shlohsa keahra vekk awl di leeya es diah eich falosset druff,
un hohch vassah lawft ivvah eiyah fashtekkel-blatz.
18Eiyah bund mitt em doht un em grawb
zayld nix veaht sei.
Vann si moll ivvahraus uf uns lohs gayn,
dann zayla si gans ivvah eich shtamba.
19Alli-mohl es si deich kumma,
vi hohch vassah nemma si eich vekk;
meiya noch meiya un deich dawk un nacht,
kumma si un drawwa eich vekk.
Vann diah fashtaynd vass dess maynd,
zaylet diah fagelshtaht sei.”
20Es bett is zu katz fa ebbah sich ausshtrekka,
un di dekk zu eng fa sich eivikla.
21Da Hah zayld uf shtay vi eah hott am Berg Perazim,
un zayld sich ufshtadda vi im Deich funn Gibeon;
so es eah sei eahvet du kann, en eahvet es fremd is zu uns,
en eahvet es nett bekand is.
22Nau heahret uf shpodda,
adda eiyah kedda vadda noch shveahra,
fa da Hah, da Awlmechtich Hah hott mich vissa glost,
es es gans land fadauva gay zayld.
23Heichet ab zu mei shtimm,
heichet un meiket vass ich sawk.
24Vann en bavvah blookt fa ebbes blansa,
dutt eah ohhalda bloowa?
Hald eah yusht oh bloowa un ayya?
25Vann's land fei gmacht is
dutt eah nett dill un kimmel sayya?
Dutt eah nett vaytza in ay blatz,
geahsht in en anra blatz,
un spelt in en anra blatz im feld?
26Sei Gott veist eem
un land een vass recht is.
27Dill is nett gedrosha mitt en dresha-shlayf,
un en vauwa-rawt is nett ivvah kimmel gedrivva,
avvah dill is gedrosha mitt en root,
un kimmel mitt en shtekka.
28Frucht muss gmawla sei fa broht macha,
avvah ma hald nett on's dresha fa'immah,
veil di reddah fumm vauwa's famawla dayda.
Du mawlsht nett frucht mitt di geil un veyya!
29Awl dee veisheit kumd fumm Awlmechticha Hah,
sei roht is vundahboah mitt grohsi veisheit.
Currently Selected:
Jesoiya 28: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
