Hosea 11
11
Es 11. Gabiddel.
Gott Sei Leevi Fa Israel
1“Vo Israel noch en kind voah
habb ich een leeb katt,
un habb een, mei sohn,
aus Egypta groofa.
2Avvah vi may es ich si groofa habb,
vi veidah vekk funn miah es si ganga sinn.
Si henn opfahra gmacht zu di Baals,
un henn insens gebrend zu abgott-gleichnisa.
3Ich habb da Ephraim gland fa lawfa,
un habb si in mei eahm gnumma;
avvah si henn nett gvist
es es mich voah es si kayld hott.
4Ich habb si als kfiaht mitt menshlichi shtrikk,
mitt shtrikk funn leevi;
ich habb's yoch ab funn iahra hals gnumma,
habb mich nunnah gebikt un si kfeedaht.
5Si zayla nett viddah nohch Egypta gay,
avvah Assur zayld iahra kaynich sei,
veil si's nett doon fa sich bekeahra.
6Es shvatt zayld ivvah iahra shtett kumma,
un di rikkel fabrecha in iahra doahra.
Si vadda ufkfressa
veil si iahra ayknah vayk ausshaffa vella.
7Mei leit sinn hatt ksetzt fa vekk drayya funn miah.
Si roofa zumm Alli-Haychshta,
avvah nimmand eaht een.
8Vi kann ich dich ufgevva, Ephraim?
Vi kann ich dich ivvah-drayya, Israel?
Vi kann ich du zu diah vass ich habb zu Adama,
adda vass ich habb zu Zeboim?
Mei hatz is gedrayt in miah,
un mei bamhatzichkeit lawft ivvah.
9Ich zayl mei gleedichah zann nett ausdrawwa,
un Ephraim viddah faveeshta.
Fa ich binn Gott un nett en mensh,
ich binn da Heilich Gott unnich eich,
ich zayl nett kumma in zann.
10Si zayla em Hah nohch-folka,
un eah zayld roahra vi en layb.
Vann eah roaht,
dann kumma sei kinnah am ziddahra
funn di west.
11Si kumma am ziddahra
vi fekkel funn Egypta,
vi dauva fumm land Assur.
Ich zayl si viddah in iahra haymeda voona lossa,”
sawkt da Hah.
Israel Un Juda Iahra Sinda
12Da Ephraim hott mich umringd mitt leeya,
un's haus funn Israel mitt falshheit.
Juda is alsnoch geyyich Gott,
geyyich da shtandhaftich Heilich Gott.
Currently Selected:
Hosea 11: pdcB
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
