Hosea 10
10
Es 10. Gabiddel.
Da Hah Richt Israel
1Israel is en greenah drauva-shtokk,
es sei frucht drawkt fa sich selvaht.
Vi may frucht es eah grikt hott,
so feel may awldahra hott eah gebaut;
vi bessah es es land vadda is,
so feel shennah hott eah di shtay-gleichnisa gmacht.
2Iahra hatz is fafiahrich,
un nau zayla si shuldich kfunna sei.
Da Hah zayld iahra awldahra nunnah reisa,
un iahra shtay-gleichnisa zu nix bringa.
3No sawwa si, “Miah henn kenn kaynich
veil miah da Hah nett kfircht henn.
Avvah ennichah, vass kend en kaynich du fa uns?”
4Si fashprecha feel sacha,
un bei falsh shveahra macha si bunda;
so, letzah roht fa di leit iahra recht
kumd uf vi giftich veetz in en geblookt feld.
5Di leit es in Samaria voona
feicha sich fa's abgott-kalb faliahra an Beth-Aven.
Di leit heila drivvah
un so doon di preeshtah,
selli preeshtah es sich kfroit henn ivvah demm kalb sei hallichkeit,
veil's vekk gnumma vadda is.
6Dess kalb vatt noch Assyria gedrawwa,
es en kshenk fa da grohs kaynich.
Ephraim vatt fashohmd,
un Israel muss sich shemma veyyich
iahra holsichah abgott.
7Samaria iahra kaynich
vatt vekk gedrawwa
vi en shtikk hols uf em vassah.
8Di hohcha-bletz funn Aven vadda nunnah grissa,
dess is vo Israel sich fasindicht hott.
Danna un dishtla vaxa uf
un dekka di awldahra zu.
No sawwa si zu di berga, “Dekket uns zu!”
un zu di hivla, “Fallet uf uns!”
9“Siddah di dawwa funn Gibea
hosht du ksindicht, oh Israel,
un in dee sinda shtaynd diah noch.
Zayld nett greek di sindah
in Gibea ivvah-nemma?
10Vann ich moll vill, zayl ich si shtrohfa;
heida-lendah fasamla sich zammah geyyich si
un shtrohfa si fa iahra zvay sadda sinda.
11Da Ephraim is vi en gebrocha rind
es gleicht dresha;
so doon ich en yoch
uf iahra shaynah hals.
Ich zayl da Ephraim eishpanna,
Juda muss bloowa,
un da Jakob muss da grund ayya.
12Sayyet gerechtichkeit fa eich selvaht,
eahndet di frucht funn shtandhaftichi-leevi,
un bloowet eiyah neiyah grund;
fa's is zeit fa da Hah sucha,
biss eah kumd un reyyaht gerechtichkeit uf eich.
13Avvah diah hend ungettlichkeit geblanst,
hend evil geahnd,
un hend di frucht funn leeya gessa.
Veil du dich falossa hosht uf dei aykni graft,
un uf dei feel greeks-gnechta,
14dann vatt di yacht funn greek
uf kumma geyyich dei leit,
so es dei feshti shtett nunnah grissa vadda
vi da Shalman Beth-Arbeel
nunnah grissa hott uf em dawk fumm greek,
un vo di muddahra un iahra kinnah in shtikkah grissa voahra.
15Sell is vass es gebt zu diah, oh Beth-El,
veil dei ungettlichkeit grohs is.
Vann sellah meiya kumd
zayld da kaynich funn Israel folshtendich umkumma.”
Currently Selected:
Hosea 10: pdcB
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
