Breddichah 5
5
Es 5. Gabiddel.
Vatsh Vass Du Sawksht Fannich Gott
1Gebb acht vann du an's haus funn Gott gaysht. Es is bessah fa gay un abheicha es vi fa dummi opfahra macha, so vi leit es nett vissa es si am letz du sinn.
2Sei nett kshvind mitt deim maul,
un aw nett mitt deim hatz,
fa ennich ebbes sawwa fannich Gott.
Gott is im himmel
un du bisht uf di eaht,
so loss dei vadda vennich sei.
3Shlechti drohma kumma mitt feel bekimmahnis,
so kumma dummi kshvetzah mitt feel vadda.
4Vann du ebbes fashprechsht zu Gott, du's nett ab fa's ausfiahra. Dummi leit sinn eem nett kfellich; gay un du vass du fashprocha hosht.
5'Sis bessah fa nix fashprecha es vi fa's nett ausdrawwa.
6Loss nett dei maul dich in sinda bringa. Sawk nett zumm engel, “Sell vass ich fashprocha katt habb, habb ich nett gmaynd.” Favass setsht du Gott bays macha bei nett du vi du fashprocha hosht, un een lossa alles fadauva es du gmacht hosht mitt dei hend?
7Feel drohma un vadda mayna nix. Avvah shtay fannich Gott mitt furcht.
Reich Sei Maynd Nix
8Vann du di oahma im land saynsht nunnah gedredda sei un si vadda grawbt funn iahra recht, dann fashtaun dich nett diveyya. En roolah is gvatsht bei aynah es ovvich eem is, un si sinn awl zvay gvatsht bei anri es ovvich eena sinn.
9Es goodes es ma grikt fumm land is fa alli-ebbah. Da kaynich grikt aw difunn.
10Veah-evvah es geld gleicht, hott nee nett genunk;
veah-evvah es reich sei vill, vatt nee nett genunk betzawld.
Dess hott aw kenn mayning.
11Vi may sacha es du griksht,
vi may leit es es sinn fa si essa.
Un vass goot dutt's diah no,
unni yusht es du's sach griksht zu sayna?
12Da shlohf is sees zu sellem es hatt shaft,
eb eah bissel adda feel est,
avvah's feel sach es da reich mann hott
alawbt eem kenn shlohf.
13Do is en veesht ding es ich ksenna habb unnich di sunn:
en reichah mann am sei shtoft hayva zu sei ayknah shawda,
14un deich en shlechtah handel hott eah's alles faloahra,
so es vann eah en boo hott,
is nix ivvahrich fa een.
15En mann kumd nakkich funn sei muddahs-leib,
un vi eah kumd, so gayt eah viddah.
Eah nemd nix mitt sich fa sei eahvet,
nix es eah drawwa kann in sei hand.
16Do is aw en veesht ding:
Vi en mann kumd, so gayt eah viddah,
un vass dutt's eem goot,
siddah es eah yusht kshaft hott fa da vind fanga?
17Sei layva lang est eah im dunkla un dreebsawl,
mitt feel aylenda, grankheit un zann.
18No habb ich auskfunna es es goot un recht is es en mann est un drinkt un frayt hott in sei eahvet unnich di sunn in di katz zeit es Gott eem gevva hott fa layva, fa dess is sei dayl.
19Un aw dess, vann Gott en mann reich macht mitt feel shtoft, un lost een essa un drinka difunn un frayt havva in sei eahvet—dess is en kshenk funn Gott.
20Eah denkt nett feel an di katz zeit funn seim layva, veil Gott een ufgnumma hald mitt di frayt in seim hatz.
Currently Selected:
Breddichah 5: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
