Acts 23

Paul fronta di huol Jewish Kongsl

1Paul luk striet pahn di memba dem a di Kongsl ahn seh, “Bredrin, op tu dis die Ai gat wan klier kanshans fronta God.” 2Wen ihn hier dis, di Hai Priis Ananias tel som man weh wende stan op saida Paul fi lik'im iina ihn mout. 3Den Paul seh tu im, “God gwain lik yo dong, yuu hipokrit weh jos laik wan waal wid wait pient! Yu waahn joj mii wid di Laa, bot dah yuu deh brok di Laa, wen yu aada demya man fi lik mi pahn mi mout.”

4Den, dem weh wende stan op deh, seh: “Les naiz! Yu kyaahn taak laik dat tu di Hai Priis weh God put deh!”

5Paul seh, “Bredrin, Ai neva nuo seh him dah wehn di Hai Priis. So, Ah sary, bikaaz di Skriptyo seh wi no fi taak bad bout wi liida dem.”

6Now, Paul riiyalaiz seh som a di man dem weh wehn dedeh dah wehn Sadducee liida ahn som dah wehn Pharisee. So ihn hala out seh, “Bredrin, Ai dah wan Pharisee ahn di son a wan Pharisee! Dah bikaaz a weh Ah biliiv seh di ded gwain riez bak tu laif, wai dehn haal mi iina dis kuot!” 7Wel, wen dehn hier dis, wan aagyoment brok out bitwiin di Pharisee ahn di Sadducee liida dem. 8Yu si, di Sadducee dem seh no rezorekshan no deh, ahn no ienjel, ahn non spirit niida; bot di Pharisee dehn biliiv aala dat.

9So big rokshan wehn dedeh. Ahn som a di tiicha a di Laa weh dah paat a di Pharisee gruup dehn get hat ahn jomp op deh seh, “Wii no fain notn rang wid dis man. Sopuoz dah wan spirit or wan ienjel deh taak tu im? Den, dat wuda eksplien evryting!” 10Ahn wail di aagyoment get hata ahn hata, aala dem grab Paul. Som a dem wende pul im wan wie, ahn som a dem pul im di ada wie. At laas, di komanda disaid fi du somting, bikaaz ihn wehn fried seh dehn wehn gwain tier Paul tu piisiz. So ihn aada ihn suoldya dem fi get Paul outa deh ahn ker im bak dah di baraks.

11Di neks nait, di Laad kom tu Paul, stan bai im ahn seh, “No gi'op, Paul. Di siem wie how yu wiknis bout mi yah dah Jerusalem, dah di siem wie yo gwain wiknis bout mi dah Rome.”

Som Jew put dehn hed tugeda fi kil Paul

12Di neks maanin, som Jew kom tugeda ahn dehn mek wan vow seh dehn no gwain iit notn, nar drink notn, til dehn kil Paul. 13Dah wehn uova forty a dem weh mek dis vow. 14Aala dem kom tugeda ahn gaan fronta di chiif priis ahn di ada Jewish rilijos liida dem fi tel dem weh dehn disaid fi du. Dehn seh, “Wii vow mongs wiself seh wi no gwain iit ahn wi no gwain drink notn til wi kil Paul. 15So weh unu kyan du dah priten seh unu waahn fain out muo fahn im bout dis huol mata. So unu —lang wid di houl Kongsl— aks di kyapm if ihn kyan sen im bak fi unu kwestyan im. Bot bifuor ihn iivn kom fronta unu, wii gwain mek wiself redy fi kil im.”

16Bot Paul nefyo hier bout di plan, ahn siem taim ihn gaan dah di baraks, gaan tel ihn onkl.

17Den Paul kaal wan a di aafisa dem ahn tel im, “Ker dis yong man dah di komanda; ihn gat somting impuotant fi tel im.”

18So di aafisa ker im tu di komanda ahn eksplien seh, “Di prizna weh niem Paul aks mi fi ker dis yong man tu yu, bikaaz ihn gat somting fi tel yo.”

19Di komanda huol di bwai han ahn ker im wan-said so nonbady kuda hier im, ahn ihn aks im, “Dah weh yu waahn tel mi?”

20Paul nefyo tel im, “Som Jew gwain aks yu fi ker Paul dah dehn Kongsl tumaara ahn priten seh dehn waahn aks im som kwestyan fi get muo informieshan, 21bot dah no chruu; so no du'ih. Muo an forty man gwain deh haid lang di wie fi jomp pahn im ahn kil im. Dehn iivn vow mongs demself seh dehn no gwain iit ahn dehn no gwain drink notn til mi onkl ded. Dehn don gat evryting set op; dehn ongl deh wiet di ansa fahn yuu.”

22Den di komanda waan di yong bwai seh, “No mek nonbady nuo seh yu tel mi dis.”

Wan Roman komanda sen Paul tu Caesarea

23So di komanda kaal two a ihn aafisa ahn tel dem seh, “Get tugeda two hundred suoldya fi go dah Caesarea, ahn seventy haas-bak raida, ahn two hundred suoldya wid laans weh gwain travl pahn fut. Ah waahn dem redy fi maach bai nine aklak tinait. 24Paul gwain niid haas tu, fi ker im sief tu Felix, di govana.”

25So di komanda rait wan leta weh seh somting laik dis:

26Fram Claudius Lisias,

Tu ihn Ekselensy Govana Felix:

Griitinz.

27Dis dah wan man weh wehn get grab bai som Jew weh waahn kil im, bot siem taim Ai kom wid mi suoldya dem ahn reskyu im. Ah wehn laan seh ihn dah wehn wan Roman sitizn, so Ah mek shuor fi ker im tu siefty.

28Afta dat, Ah ker im fronta dehn Jewish Kongsl fi trai fain out dah weh dehn dinouns im fah. 29Ahn Ah suun fain out seh dah wehn somting weh gat fi du wid fi dem rilijos laa. Bot dah wehn notn weh wehn dizorv det nar jiel. 30Lieta, sombady kom tel mi bout wan plan fi kil im, so siem taim Ah sen im tu yu. Now Ah don tel di Jew dem seh wateva dehn gat gens him dehn fi bring tu yu.

Dah yuu inchaaj now.

31So, dat nait di suoldya dem ker Paul dah Antipatris sity, jos laik how dehn wehn aada dem fi du. 32Den di neks die, dehn ton bak ahn gaan tu dehn baraks iina Jerusalem, wail di haas-bak raida dem ker im tu Caesarea. 33Wen dehn get dah Caesarea, dehn ker Paul ahn di leta striet tu Govana Felix. 34Ihn riid ih ahn den ihn aks Paul dah weh kontry ihn kom fram. Paul seh, “Cilicia.”

35“Wel, Ah gwain hier yo kies az suun az dem weh deh gens yo kom.” Den di govana aada seh dehn fi lak'op Paul iina di prizn dah di paat a Herod palis weh dehn kaal di Praetorium.

Currently Selected:

Acts 23: NTIC

Highlight

Copy

Compare