Acts 18

Paul iina Corinth sity

1Afta dis, Paul gaan fahn Athens tu Corinth. 2Wentaim ihn get deh, ihn bok'op pahn wan Jew weh niem Aquila, weh wehn baan iina Pontus lan. Ihn wehn jos kom fahn Italy wid ihn waif Priscilla, bikaaz di Empara Claudius gi aadaz seh aal di Jew dem hafy get outa Rome. So Paul gaan weh dehn deh, gaan si dem. 3Ahn ihn stie deh work wid dem, bikaaz aala dem yuuztu mek tent fi wan livin. 4Now, evry Sabat die Paul yuuztu go iina di sinigag, go taak tu di Jew ahn di Greek dem, deh trai fi kanvins dem seh weh ihn wende seh dah chruut.

5Den, wen Silas ahn Timothy get deh fahn Macedonia, Paul wende yuuz aal ihn taim deh priich di mesij wid aal ihn haat tu di Jew dem deh seh Jesus dah di Mesaya. 6Bot, wen dehn get'op gens im ahn staat kors im, Paul shiek aaf di dos aafa ihn kluoz#18.6 Nuotis seh: Wen di apasl dem shiek di dos aafa dehn fut or dehn kluos, dah laik wan sain a jojment gens di pipl dem weh no waahn aksep dehn mesij. ahn tel dem seh, “Unu blod deh pan tapa unu uon hed; mii no respans fi unu no muo. Fahn now aan Ah gwain tu di Gentile pipl dem.” 7So ihn gaan, gaan liv iina wan Gentile man hous weh niem Justus, weh yuuztu waaship God tu. Dis man hous wehn stie saida di sinigag. 8Ahn wan man niem Crispus, huu dah wehn liida fi di sinigag, staat chros iina Jesus wid aal ihn famaly; ahn plenty ada pipl fahn Corinth biliiv ahn get baptaiz tu. 9Now wan nait Paul get wan vizhan weh God deh tel im seh, “No fried, Paul; Ah waahn yo kantinyo deh priich ahn no stap, 10bikaaz mii deh wid yo aalwiez. Ahn nonbady no gwain atak yo fi du yo haam, bikaaz Ah gat plenty pipl iina dis sity.” 11So Paul stie deh fi wan yier ahn a haaf deh tiich di pipl dem God Wod.

12Bot wentaim Gallio get fi bii di Roman ruula uova Achaia, di Jewish liida dem get tugeda gens Paul ahn ker im tu kuot. 13Dehn seh, “Dis man deh tel pipl fi waaship God iina wan wie weh deh gens fi wi Laa.” 14Bot, wen Paul wehn gwain taak, Gallio seh tu di Jew dem, “If unu wehn kom, kom taak bout som bad tingz weh dis man du, Ah wuda hier unu Jew pipl. 15Bot bikaaz dah wan aagyoment bout wod ahn ada likl tingz weh iina fi unu uon laa, unu trash'ih out mongs unuself. Mii no deh joj demya kain a tingz.” 16Ahn ihn ron dem outa ihn kuot-haal. 17Den aala dem grab Sosthenes, di liida fi di sinigag, ahn biit'im op fronta di kuot-yaad. Bot Gallio neva pie dat no main.

Di Apasl dem ton bak tu Antioch

18So Paul stie plenty diez iina Corinth wid di chorch breda dem. Afta dat, ihn lef dem ahn siel tu Syria wid Priscilla ahn Aquila. Bot bifuor dehn lef, ihn mek wan vow#18.18 Nuotis seh: Wan vow dah wan pramis tu God dat dehn gwain du somting fi him; ahn dehn yuuztu kot aal dehn hier aaf fi shuo seh dehn miin wat dehn wehn seh. iina Cenchrea, ahn baal ihn hed. 19Wen dehn get dah Ephesus, Paul lef Priscilla ahn Aquila. Den ihn gaan iina di sinigag ahn aagyo wid di Jew dem. 20Dehn aks im fi stie wid dem fi wan lang taim, bot ihn seh ihn kudn du'ih. 21So, wen ihn wende lef out, ihn tel dem seh: “Ah gwain kom bak, kom si unu agen if God sehso.”#18.21 Nuotis seh: Wan uol kapy a dis leta seh, “Ah hafy get dah Jerusalem iin taim fi di fiis weh deh kom; bot Ah gwain kom bak, kom si unu agen, if di Laad sehso.” Afta dis, ihn siel out fahn Ephesus. 22Wen ihn get dah Caesarea, ihn gaan op tu Jerusalem, gaan hiel di chorch pipl dem; ahn afta dat, ihn gaan dong dah Antioch.

Paul third mishonery trip

23Paul spen som taim deh, ahn den ihn lef out so gaan aal uova Galatia ahn Phrygia lan fi go gi korij tu aal di Kristyan dem.

24Now, wan Jew man weh niem Apollos, weh baan iina Alexandria, kom tu Ephesus. Ihn dah wehn wan gud priicha, ahn ihn wehn nuo ihn Baibl#18.24 Or: “…ahn ihn wehn strang iina di Skriptyo.” tu. 25Som taim abak dehn wehn tiich im bout di wie weh di Laad tel wi fi fala, so sins ihn kuda priich, ihn taak uova gud bout Jesus, bot ihn ongl wehn nuo til John baptizam. 26Ihn staat taak strang iina di sinigag; ahn wen Priscilla ahn Aquila hier im, dehn tek im wan-said ahn eksplien im muo beta di wie weh God wehn tel wi fi fala. 27Den, wen Apollos wehn waahn go tu Achaia, di chorch breda dem rait wan leta deh tel dem fi risiiv im. Ahn wen ihn get deh, ihn help plenty a di biliiva dem, weh wehn ton Kristyan chruu God lov. 28Now Apollos wehn so waiz ahn taak so strang non a di Jew dem kuda kom gens im poblikly, bikaaz ihn shuo wid di Skriptyo seh Jesus dah di Mesaya fi chruut.

Currently Selected:

Acts 18: NTIC

Highlight

Copy

Compare