Mat MALOŴE GANDANDA
MALOŴE GANDANDA
Ngani Syambone sya Yesu Klistu syakulembedwa ni Mateyu sikusala ya ngani syambone syakuti Yesu ni Mkulupusyo jwakulocesyedwa jula, kupitila mwa jwalakwejo Mlungu atesile yosope yiŵasasile mu Cilanga cakwe ciŵacitesile kwa ŵandu ŵakwe m'Malangano gakala. Yesu ŵapagwile mu lukosyo lwa Ayuda ni kutama pasikati pa jemanjajo umi wakwe wosope. Ngani syambonesi nganisiŵa sya Ayuda pewo; nambo soni sili sya ŵandu ŵa pacilambo cosope capasi.
Buku ja Mateyu jikusala cenene ngani syakwe mwakusamalicisya mnope. Jikutanda ni kupagwa kwa Yesu, jikulondesya soni ya ubatiso ni kulinjikwa kwakwe, kaneko jikusala soni ya utumiki wakwe, majiganyo ni kwaposya ŵandu ŵakulwala ku Galileya. Piyamasile yeleyi, Ngani Syambone syakwamba Yesu Klistu sikusala soni ya ulendo wakwe kutyoka ku Galileya kuja ku Yelusalemu soni yindu yiyatendekwe pa cijuma cambesi yele yiyatendekasisye kuti jwalakwejo ŵakolecedwe pa msalaba ni kwimuka soni ku ŵawe.
Wele Utengawu ukulosya kuti Yesu ali Mwalimu jwamkulungwa, jwakwete ulamusi wakugopolela cenene Malamusi ga Mlungu, nipo soni ulamusi wakwiganyicisya ya Ucimwene wa Mlungu. Majiganyo ga Yesugo ŵagasongenye m'makuga msano pakuyicisya mitwe jakwe: (1) Lijiganyo lya petumbi, lyalikusala ya Ucimwene wa kwinani, ndamo sya alukosyo ŵakwe, yakuŵajilwa jemanjajo kutenda, upile wawo, yambone yele yitacipocela pasogolo (mitwe ja 5 mpaka 7); (2) Ya kwakalamusya ŵakulijiganya likumi ni ŵaŵili pa masengo gawo (mtwe 10); (3) Yitagu yakwamba Ucimwene wa kwinani (mtwe 13); (4) Kwiganya ya kugopolela kwakuŵa jwakulijiganya (mtwe 18); (5) Kwiganya ya kumala kwa mpago awuno ni yakwika kwa Ucimwene wa kwinani (mitwe 24 mpaka 25).
Mitwe ja ya mkatimu
Ya acinangolo ŵa Yesu Klistu ni kupagwa kwakwe 1:1—2:23
Kulalicila kwa Yohane M'batisi 3:1-12
Yesu ŵabatisidwe ni Yohane nipo ŵalinjidwe ni Satana 3:13—4:11
Yesu ŵalalicile, kwiganya ni kwaposya ŵandu ku Galileya 4:12—18:35
Ulendo wa Yesu wakuja ku Yelusalemu kutyocela ku Galileya 19:1—20:34
Cijuma cakumalisya ku Yelusalemu 21:1—27:66
Kwimuka ku ŵawe ni kuwonecela kwa ŵakulijiganya ŵakwe 28:1-20
Currently Selected:
Mat MALOŴE GANDANDA: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014