Det 34

Ciwa ca Mose

1Mose* ŵakwesile Litumbi lya Nebo, kutyocela ku yiŵata ya Mowabu. Ŵajile kwika mpaka pacanya Petumbi lya Pisiga lili kungopoko lyuŵa kwa Yeliko kwele AMBUJE* ŵamlosisye cilambo cosope ca Giliyadi mpaka ku cilambo ca Dani, 2Cilambo cosope ca Nafutali, yilambo yosope ya Efelemu ni Manase, ni cilambo ca Yuda mpaka kuja kwika ku Nyasa ja Mediteleniyani. 3Ŵamlosisye soni mbali ja kum'mwela kwa Negebu ni ciŵata cele cikasaja kwika mpaka ku Yeliko, msinda wa yitela ya migwalangwa mpaka ku Sowali. 4AMBUJE ŵamsalile Mose kuti, “Celeco ni cilambo cinaŵisile cilanga* ni Abulahamu,* Isaki ni Yakobo* kuti tinjicipeleka kwa yisukulu yawo. Namkundile m'mwejo kuti mcilole, nambo nganimkunda m'mwejo kuti mkajinjile.”#Gen 12:7; 26:3; 28:13

5Myoyo Mose, jwakutumicila jwawo AMBUJE ŵawile kweleko, mcilambo ca Mowabu, mpela mwele AMBUJE ŵamsalilile. 6AMBUJE ŵamsicile Mose m'malembe ku Mowabu kukoko, m'ciŵata mwakulolegana ni musi wa Beti Piyoli. Nambo pangali mundu jwalijose jwakugamanyilila malo gasyesyene palili lilembelyo. 7Mose ŵawile ali ni yaka 120 nipo ŵaliji ŵaciŵela ŵamacili, soni meso gakwe galiji ciŵela mkulola mwamacili. 8Aisalaeli ŵalisile malilo gakwe m'masiku makumi gatatu m'Ciŵata ca Mowabu cila.

9Yoswa mwanace jwa Nuni, jwagumbalilwe ni lunda ligongo Mose mkinawe ŵamsajice magasa kuti ajinjile m'malo mwa jwalakwe. Aisalaeli ŵampikanile Yoswa, ni kugakuya malamusi gosope gele AMBUJE ŵagapelece kupitila mwa Mose. 10Kutandilila pelepo, paliji pangali soni jwakulocesya* jwine juŵapali jwakulandana ni Mose. AMBUJE ŵaliji mkuŵecetana najo meso ni meso.#Eks 33:11

11Pangali jwakulocesya jwalijose juŵatesile yindu yakusimonjeka ni yamacili mpela yele AMBUJE ŵamsalile Mose kuti ayitende pameso pa Mwenye jwa ku Iguputo, ni acakulungwakulungwa ŵakwe ni ŵandu wosope ŵa mcilambo mwakwe. 12Pangali jwakulocesya jwine jwalijose jwele juŵatesile yindu yekulungwa ni yakogoya mpela yele yiŵatesile Mose pameso pa Aisalaeli wosope.

Currently Selected:

Det 34: YAWO

Highlight

Copy

Compare