Rom 9
9
Ahi mul rie lat meatin keil musil rendemien onen
1Navit maselus min kami usil tuak keil koa avi Siu. Asa koa namul naselus usili vi anatin. Navi onen Kristo ka Ninin Votut koa mul enau vit kilea minau keke narmultei maliluvos. 2Namul nalonge tisa houlu ka tinok mah 3ven meatin keil kati onak koa avi Siu. Ka veni tinok mah houlu ven keil, munak nakilea moumoni vakataun usite one, nikur vulie ka nimaen Ahi hesesenda enau ka hesakin inau nirkapiltei mun hetal min Kristo. Ka nasakras makur vulie. #Eks 32:32 4Mulamu, Ahi rie lat koakeil avi me-Isrel keil keke avi meatin keil onen. Kei mumon keil avi titan ka vothot en hetetamenien onen min keil. Kei mumon hatkatien takeih keil ral min keil ka san mengkatien keil onen min keil. Ahi visein keil en sakien koa mal avaha netan mini, ka san hatkatien tetahos keil houlu min keil. #Eks 4:22; Dut 7:6; 14:1-2 5Keil aka en ara onen vati avu keil one telamu suval Ebraham, Aesak ka Siekob. Ka navong Mesaea mita mai vi meatin koa aven mul, kei mai kistal ka en vatiamal one. Kei vi Ahi koa hetetamen imok en tounah vasi. Mal vinvin keke avahati lat isen vahina nesa lises ka lisenges. Anatin. #Mat 1:1-16; Luk 3:23-38; Sion 1:1; Sam 41:13; Rom 1:25
6Mulamu, Ahi vat kati keke voutut me-Isrel keil. Ka rovitei hatkatien onen Ahi koa mot. Veni rovitei me-Isrel vasi keil koa avi meatin keil kati onen Ahi. #Nam 23:19; Rom 2:28 7Ka rovitei koakeil vasi aka en ara onen Ebraham koa avi titan kati en meten Ahi. Veni Ahi viteni min Ebraham vit, “Vatiamal keil koa navat kati minuk, keil ikistal ika en Aesak.” (Sen 21:12) 8Koanek rie lati keke rovitei titiali vasi keil koa amusil ara koa akilea avahi natin Ahi. Ka vi titiali keil koa amusil hatkatien onen koa avi natnali keil kati en meten. #Kal 4:23 9Veni, Aesak, avasi musil hatkatien onen Ahi koa vit, “En avong ekek en sua koa hemai, Serah hekur natmali.” (Sen 18:10)
10Ka sakien enek kistal avong tamun, en avong koa avu telamu orer koa Aesak kur Rebekah, ka kei meas en maeh elu. #Sen 25:21 11-12Ka navong lumul veah en vangen mama onealu, Ahi viteni mini vit, “Tai koa hekatau hemai hemarite mok helin koa helamu.” (Sen 25:23) Kei viten koanik navong lurmumon etai veah tounah koa tahos vuo tisa. Koanek rie lati keke Ahi mul vise meatin keil musil rendemien onen ka romusiltei umen koa keil amumoni. 13Koanek suval asa koa Ahi viteni en Tus Votut vit, “Envatien onak mul en Siekob; ka Esao, naseseini.” (Mal 1:2-3)
14?Mukave, koanek rie lati keke Ahi mul mum romaltei? !Vuo, romukteinek! 15Veni kei viteni min Mosis vit,
“Inau enges nitie lat meatin sei koa ek hemahisi,
ka nikataun keil housil rendemien onak.” (Eks 33:19)#Dut 32:4
16Sakini, Ahi mul rie lat meatin keil musil enmahisien onen enges, ka romusiltei asa koa meatin keil ten out netan e vati vuo akilea avoumoni. #Efes 2:8 17Koanek suval asa koa Ahi viteni min asuv houlu ten out Isip en Tus Votut vit, “Inau nalinguk kovi asuv houlu keke nakilea matie lat keihoen onak vaka enuk keke hetetamenien ten isok kilea vaka vasi out en out netan.” (Eks 9:16) 18Sakini, mul en Ahi enges keke vatie lat isei keil ikur enmahisien onen, ka isei keil hesakin vatie hekeih keke avalong seseini. #Eks 4:21; 7:3; 9:12; 14:4,17
Ahi rie lat vurohien ka enmahisien musil rendemien onen
19Vahesa tai en kami vahiteni minau vahit, “?Munak Ahi enges mul rie lat isei hekur enmahisien onen ka isei helong seseini, hemukave Ahi kilea vahotini keke meatin sei mum romaltei? ?Isei kilea vating koe asa koa Ahi ling kati?” 20?Ka tuak, keik kovi isei keke kovasel vatal min Ahi? Veite koa meatin mumoni en tanhilhili sakras vasel mini vahit, “?Vensa komumonau mukok?” #Aes 29:16; 45:9 21 Veni meatin koa mul mumon veite keil en tanhilhili kilea voumon keil vousil rendemien onen. Mul en kei munak en vati voumon hati tanhilhili vamai vahi veite valu, tai ten more ale keil ka tamun ten avong vasis. #Ser 18:6
22Ka koanik suval asa koa Ahi mumoni. Kei en vati vatie lat vurohien onen vaha kat tisaen ka voumon meatin keil availea en keihoen onen. Ka avaseini mal vinvin keke hou lin tei en meatin keil koa mumoni ven tisaen one, rendemien onen tetaveah ka mul vuli kat vurohien onen va kat keil. #Ser 50:25 23Ka kei vuli kat vurohien onen vahothot eni keke kei vilelau en tahosien. Sakini, mutah tahosien en koakeil rie lat keil avakur enmahisien onen, veni kei sak mesein keil tuai avato vatal mini en muohien ten hetetamenien onen en out nesa. #Efes 1:3-12 24Ka ir emun rovi koakeil enek, koa kei vise ir ran Siu keil ka ran koakeil emun arvitei Siu. 25Koanik vi asa koa Ahi viteni ka en provet Hosea vit,
“Meatin keil koa ‘arvitei onak’
nihise revi keil en ‘meatin kati keil onak.’
Ka kei koa ‘envatien onak tovuol ien,’
nihise revi en ‘kei koa envatien onak mul ien.’” (Hos 2:23)
26 “Ka en out kati koa Ahi viteni min keil vit, ‘Kami mirvitei meatin keil onak,’
en out enek, ihise keil en ‘ehon keil onen Ahi koa moul.’” (Hos 1:10)
27Ka Aesea mun vit luvat tounah usil koakeil ten out Isrel vit,
“Avaseini me-Isrel keil avi houlu asuval veien ten atas,
Ahi houtut teis en keil.
28 Veni Ahi lei rahit usite onen meatin vasi keil en out netan tuai ka, hekalah,
hesani min keil mahien vasi keil housil asa koa kei lesi mal.” (Aes 10:22-23)
29Koanek suval asa koa Aesea viteni mulamu vit,
“Vahit Ahi Asuv ten keihoen vartie lattei enmahisien onen min ir ka varmaentei tei en titiali keil orer avamoul avales,
ir rokilea rovamai rovasuval out Sodom vuo out Komorah tuai koa vurohien onen Ahi sakin meatin tovuol emun avato ien.” (Aes 1:9)
Pol vis min Ahi en usite onen Siu keil koa asesein Iesu Kristo
30Sakini, rolesi keke koakeil arvitei Siu, koa arsak vistei keke avamai avamal en meten Ahi, keil varei arokoli ka akur maluen ka en sise ten demkatien. #Rom 10:20 31Ka me-Isrel keil koa asak visi avamai avamal en meten vaka en sise ten mengkatien keil, keil arkurtei. #Rom 10:2-3 32?Ka vensa varei arkurtei maluen? Veni keil armusiltei sise ten demkatien keke avahotini. Vuo, keil asak visi avahotini vaka en asa koa amumonis. Ka sakini, keil amusavoi en ahat koa Ahi lingi keke meatin keil amusavoi eni. #Aes 8:14 33Koanek suval koa Tus Votut viteni usil Kristo vit,
“!Allesi! Naling ahat tai en out Saeon luhu en me-Isrel keil keke isavoi eni ka imot.
Ka koakeil aling demkatien one eni, kei hersakintei keil imemou.” (Aes 28:16)#Rom 10:11; 1Pit 2:6,8
Currently Selected:
Rom 9: pma
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
