Okushuuruurirwa 12

Eby'omukazi owaazaire omwana, kandi n'eby'ekijoka

1Eky'okutangaaza kihango munonga kikareebwa omu iguru, omukazi ajwaire eizooba, n'okwezi kuri ahansi y'ebigyere bye, n'aha mutwe gwe hariho ekirunga ky'enyonyoozi ikumi na ibiri. 2#Mik 4:10. Omukazi ogwo akaba aine enda; yaarumwa, yaatakibwa ebisha by'okuzaara. 3Kandi eky'okutangaaza ekindi kyareebwa omu iguru, ekijoka kihango ekirikutukura, ekiine emitwe mushanju n'amahembe ikumi, kandi kiine ebirunga mushanju aha mitwe yaakyo. 4#Dan 8:10. Omukira gwakyo gwayeyerera ekicweka kya kashatu ky'enyonyoozi z'omu iguru, gwazinaga aha nsi. Ekyo kijoka kyayemerera omu maisho g'omukazi owaabaire naayenda kuzaara ngu, ku araaheze ati kuzaara, kishonshomere omwana we. 5#Zab 2:9; Kush 19:15. Yaazaara omwana w'omwojo oritegyekyesa amahanga goona enkoni y'ekyoma; kwonka omwana ogwo yaashahurwa, yaatwarwa ahari Ruhanga n'aha kitebe ky'obukama bwe; 6#Kush 11:2, 3. kandi omukazi yaahungira omu ihamba ei Ruhanga yaamuteekateekyeire omwanya, ngu babone kumuriisizayo okumara ebiro rukumi na magana abiri na makumi mukaaga.

Orugamba rwa Mikaeli n'Ekijoka

7 # Dan 10:13, 21. Hakabaho orugamba omu iguru, Mikaeli na baamaraika be nibarwanisa ekijoka; kandi ekijoka na baamaraika baakyo baabarwanisa; 8baabingwa, kandi okuruga obwo tibaratungire mwanya omu iguru obundi. 9#Kut 3:1, 14; Yoh 12:31. Ekijoka ekyo ekihango ekya ira, ekirikwetwa Omuregi kandi Sitaane, orikugobeza ensi yoona, yaanagwa aha nsi hamwe na baamaraika be. 10#Yob 1:11; Luk 22:31. Kandi naahurira eiraka rihango omu iguru nirigira riti: Hati mbwenu okujuna kwa Ruhanga waitu n'amaani ge n'obukama bwe n'obushoboorozi bwa Kristo we biizire, ahakuba omuregi w'ab'eishe-emwe anagirwe ahansi, obarega nyomushana na nyekiro omu maisho ga Ruhanga waitu. 11#Rom 8:37. Bakamusingura ahabw'eshagama y'Omwana gw'entaama n'ahabw'ekigambo ky'obujurizi bwabo, nangwa n'okufa bakakwemera. 12#Kush 13:5. N'ahabw'ekyo, iwe eiguru naimwe abarituuramu, naiwe enyanja, muryareeba enaku ahabw'okuba omuregi yaabaizira n'ekiniga kingi, ahakuba naamanya ku aine omwanya mukye.

Ekijoka okuhiiga omukazi n'oruzaaro rwe

13Ekijoka ku kyareebire kyanagwa aha nsi, kyahiiga omukazi owaazaire omwana w'omwojo. 14#Dan 12:7. Kwonka omukazi yaaheebwa amapapa abiri g'eishemba rihango, ngu agurukye ahungire ekyo kijoka omu ihamba, omu mwanya ogu aririisizibwamu okumara omwanya n'emyanya n'ekicweka ky'omwanya. 15Ekijoka kyacwera amaizi agarikwingana omwegyemure enyima y'ogwo mukazi, ngu gamutware; 16kwonka ensi yaahwera omukazi, yaayashama, yaamira omwegyemure, ogu ekyo kijoka cyacweire. 17#Kush 13:7; Kut 3:15. Ekijoka nikwo kugirira ogwo mukazi ekiniga, kikaza kurwanisa oruzaaro rwe orutsigaireho, orurikworobera ebiragiro bya Ruhanga, rukahamya ebya Yesu; kikeemerera aha musheenyi gw'enyanja.

Currently Selected:

Okushuuruurirwa 12: RR64

Highlight

Copy

Compare