Okubara 11
11
Abaisraeli okugaya emaanu; n'okushaba Musa enyama
1 #
Kur 15:23, 24; 16:2, 3; Bir 9:22; Tonz 3:39. Bwanyima abantu baayetomboita ahabw'ebibabaireho, MUKAMA yaabihurira; ku yaabihuriire, yaabagirira ekiniga kingi; omuriro gwa MUKAMA gwabaakamu, gwayotsya ebicweka bimwe ebirikuhereerukayo omu rusiisira. 2#Yak 5:16. Abantu baatakira Musa; Musa yaashaba MUKAMA; omuriro gwaraara. 3Omwanya ogwo gwayetwa Tabera, ahabw'okuba omuriro gwa MUKAMA gukabaakamu. 4#Kur 12:38; 1 Kor 10:6. Omutwe gw'ebijwangye by'abanyamahanga abaabaire bari omuribo baatandika kwetenga; Abaisraeli nabo baagaruka baarira, nibagira bati: N'oha oraatuhe enyama y'okurya? 5#Mat 6:24-34; Rom 8:7. Twaijuka eby'enyanja, ebi twabaire turiira busha, tukiri omuri Misri, emyongo, ebihaaza, obutunguru bw'ebibabi n'obw'ebitakuri, na katunguricumu; 6mbwenu twomire, titwine kindi kyona eki turikureeba kureka emaanu egi yonka.
7Kandi egyo maanu ekaba neeshusha otujuma tw'obunyaatsi oburikwetwa gaadi; enshusha yaayo ekaba eri nk'amakanca g'ebiti agarikwetwa budola. 8Abantu bakaba bagyenda, bagitorotoora, bagisa aha mengo, nari bagishekura omu shekuro, bagiteeka omu nyungu, bagikoramu twakeeki; okunura kwayo kukaba kuri nk'okw'otukeeki otukozirwe n'amajuta. 9Orume ku rwabaire rutonda omu rusiisira nyekiro, emaanu erutondaho.
10Musa ku yaahuriire abantu nibarira, buri muntu n'ab'eka ye nibaririra aha miryango y'amahema gaabo, MUKAMA yaagira ekiniga kingi munonga, Musa nawe yaaguubwa kubi. 11#Bir 1:12; Yer 20:7-18; 2 Kor 11:28. Musa yaagambira MUKAMA ati: Ahabw'enki oitsire kubi omwiru waawe? Ahabw'enki onkoreire oburemeezi bw'aba bantu boona, okanga kungirira embabazi? 12#Isa 40:11; 1 Tes 2:7. Niinye naatwaire enda y'aba bantu boona? Niinye naabazaire, waaza kungira oti: Obatwarire omu kifuba, nk'omurezi oku akiikira omwana orikwonka, obahitsye omu nsi ei naaraganiise baishenkurubo? 13#2 Bag 4:43; Mak 8:4. Nkaihire hi enyama y'okugaburira aba bantu boona? Ahakuba nibandirira omu maisho nibagira bati: Tuhe enyama y'okurya. 14#Kur 18:18. Tindikubaasa kuheeka aba bantu boona nyenka, ahabw'okuba n'omutwaro gurikundema. 15#1 Bag 19:4; Yon 4:3. Ku oraabe nooyenda kuntwaza otyo, ninkweshengyereza, nyita ndugyeho, ku oraabe nongirira embabazi, ndekye kureeba enaku ezirimbaho.
MUKAMA okuha Musa abahwezi makumi mushanju
16 #
Kur 24:1, 9. MUKAMA yaagira Musa ati: Nteeranira abantu makumi mushanju omu bakuru b'Abaisraeli, abu orikumanya ngu n'abakuru b'abantu, n'abategyeki baabo, obareete aha Ihema ry'okubugaabuganiramu, beemerereho naiwe. 17#1 Sam 10:6. Naanye niinyija kushuuma, ngambireyo naiwe; nyihe aha mwoyo oguri ahariiwe, ngubateho; nabo bagume baheekye naiwe omutwaro gw'abo bantu, orekye kuguheeka wenka. 18#Byak 7:39. Kandi ogambire abantu oti: Mweyeze ahabw'eizooba rya nyencakare, nimwija kurya enyama; ahakuba muririire omu matu ga MUKAMA, nimugira muti: N'oha oraatuhe enyama y'okurya? Ahakuba tukaba turi gye omuri Misri. N'ahabw'ekyo MUKAMA naija kubaha enyama, nimugirya. 19Timurigirya izooba rimwe, nari amazooba abiri, nari ataano nari ikumi nari makumi abiri, 20kureka nimwija kugirya okwezi kwona, okuhitsya obu eribareetwa omu nyindo, ekabatama; ahabw'okuba mugayire MUKAMA ori omuriimwe, mwamuririra omumaisho nimugira muti: Tukaba twarugira ki Misri? 21Musa yaagira ati: Abantu abu ntuuramu n'abashaija obusiriira mukaaga abarikugyendesa ebigyere; kandi waagira oti: Niinyija kubaha enyama, bagirye okumara okwezi kwona. 22#2 Bag 7:2; Mat 15:33. Nibaija kubaagirwa amasyo g'entaama n'ag'ente g'okubahaazya? Nari shi eby'enyanja byona nibiija kuteeranirwa hamwe ahabw'abo kubahaazya? 23#Isa 50:2; Ezk 12:25. MUKAMA yaagambira Musa ati: Noogira ngu omukono gwa MUKAMA gubaire mugufu? Mbwenu noija kureeba ekigambo kyangye ku kiraabe nikiija kuhikiirira ahabwawe nari kitarikwija kubakwo.
24Musa yaashohora, yaagambira abantu ebi MUKAMA yaamugambira; bwanyima yaateerana abashaija makumi mushanju ab'omu bakuru b'abantu, yaabata omu myanya okwehinguririza Eihema ry'okubugaabuganiramu. 25#1 Sam 10:5, 6; Yoel 2:29; 1 Kor 14:1. MUKAMA yaashuumira omu kicu, yaagamba na Musa, yaiha aha mwoyo ogwabaire gumuriho, yaaguta ahari abo bakuru makumi mushanju; omwoyo ku gwabagiireho, baaragura; kwonka tibaagaruka kukora batyo obundi. 26Kwonka omu rusiisira hakaba hatsigaramu abashaija babiri, omwe orikwetwa Eludaadi n'ondi orikwetwa Medadi; ogwo mwoyo gwabazaho; kandi bakaba bari omu mubaro gw'abahandiikirwe, kwonka batarugire aho kuza aha Ihema; baaragurira aho omu rusiisira. 27Omutsigazi yaagyenda nairuka, yaagambira Musa ati: Eludaadi na Medadi nibaragurira omu rusiisira. 28#Mak 9:38; Yoh 3:26. Yoshua mwene Nuuni omuheereza wa Musa, omwe aha bashaija be b'entoore, yaamugira ati: Mukama wangye Musa, bazibire. 29#Byak 26:29; 1 Kor 14:5. Musa yaamugarukamu ati: Waagira eihari aha bwangye? Nkaabaasibwa ki abantu ba MUKAMA boona baba baanabi, MUKAMA abaha omwoyo gwe. 30Musa yaagaruka omu rusiisira, we n'abo bakuru b'Abaisraeli.
MUKAMA okubareetera endahi n'okubaitamu baingi
31 #
Zab 78:26-31. Omuyaga gwaruga ahari MUKAMA, gwareeta endahi zaaruga aha nyanja, zaagwa haihi n'orusiisira okurwehinguririza, zaahitsya omwanya ogu omuntu arikubaasa kugyenda eizooba ryona buri rubaju, nizigyendera omu mwanya nk'ogwa mikono ebiri okuruga ahansi. 32Abantu baimuka, baarenzya eryo izooba, baaseesa ekiro, baarenzya erindi izooba nibazikwata; owaakwatsire enkye, yaakwata homeri ikumi, baazeeyanikira embaju zoona ez'orusiisira. 33Enyama ku yaabaire ekibari omu kanwa, batakagimizire, MUKAMA yaabagirira ekiniga kingi, yaajuumikiza abantu orufu rwingi munonga. 34#Bir 9:22. Omwanya ogwo gwayetwa Kibiroosi-hatava, ahabw'okuba niho baaziikire abantu abaayetengire.
35Abantu baimuka Kibiroosi-hatava, baaza Hazeroosi; baamarayo ebiro.
Currently Selected:
Okubara 11: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
