Matayo 18

Ebirikusiimwa n'ebirikwangwa omu bukama bwa Ruhanga

1 # Luk 9:46-48; Mak 9:33-47. Omu bunaku obwo abeegi bakaija ahari Yesu, baamubuuza bati: Omukuru omu bukama bw'omu iguru n'oha? 2Yaayeta omwana muto, yaamwemereza ahagati yaabo, 3#Yoh 3:3-5. yaagira ati: Buzimazima nimbagambira nti: Ku muriba mutahindukire, mukaba nk'abaana bato, timuritaaha mu bukama bw'omu iguru na kakye. 4Omuntu weena, orikwecureeza nk'omwana ogu omuto, niwe mukuru omu bukama bw'omu iguru. 5#Yoh 13:20. Kandi weena orikwakiira omwana muto nk'ogu omu iziina ryangye, biri niinye ayakiire; 6#Luk 17:1, 2. klwonka weena orireetera omwe ahari aba abato abarikuunyikiriza kukora ekibi, haakiri omuntu ogwo okubohwa orubengo ruhango omu bitsya, akanagwa ahagati omu nyanja. 7Ensi eryakareeba ahabw'ebirikugwisa abantu. Ebirikugwisa tibiribura kwija; kwonka origwisa abandi, aryakareeba. 8Omukono gwawe nari shi ekigyere kyawe ku kiraakureetere kukora ekibi, okitemeho, okinagye hare; haakiri iwe okutaaha omu magara, ori ekirema nari noocumbagira, okukira okunagwa omu muriro ogutaraara oine emikono yombi nari ebigyere byombi. 9Kandi n'eriisho ryawe ku riraakureetere kukora ekibi, oriihemu orinagye hare; haakiri iwe okutaaha omu magara oine eriisho rimwe, okukira okunagwa omuri Gehena ey'omuriro oine amaisho gombi.

10 # Heb 1:14. Mwerinde murekye kugaya omwe ahari aba abato; ahakuba nimbagambira nti: Omu iguru baamaraika baabo bareeba obutoosha ahamaisho ga Tata ori omu iguru. 11Ahabw'okuba Omwana w'omuntu akaija kujuna ekyabaire kibuzire. 12#Luk 15:4-7. Nimuteekateeka muta? Omuntu ku aba aine entaama igana, emwe aharizo yaarara, tatsiga ziri makumi mwenda na mwenda aha mugongo, akaza kusherura egyo erazire? 13Kandi ku agibona, buzimazima nimbagambira nti: Agishemerererwa okukira ziri makumi mwenda na mwenda ezaaba zitarazire. 14Nikwo na Tata ori omu iguru atarikwenda omwe ahari aba bato kuhwerekyerera.

Oku Ekanisa eshemereire kutwaza oyangire kuhanwa

15 # Luk 17:3; Lev 19:17; Gal 6:1. Mwene waanyu ku araakukore kubi, gyenda omumanyise eki akushagiize muri mwembi. Ku araakworobere, biri waabona mwene sho. 16#Bir 19:15. Ku araayangye kukworobera, otware ondiijo nari babiri, ngu ekigambo kyona kihamibwe baakareebi babiri nari bashatu. 17#1 Kor 5:13. Nabo ku araayangye kuboorobera, okugambire ekanisa; kandi ku araayangye kworobera ekanisa, abe nk'omunyaihanga n'omuhooza ahariiwe. 18#Yoh 20:23. Buzimazima nimbagambira nti: Ebi muriboha omu nsi byona, biryabohwa n'omu iguru; kandi ebi murikomoorora omu nsi byona, biryakomoororwa n'omu iguru. 19Kandi nimbagambira nti: Babiri ahariimwe ku barikwatansia omu nsi, baashaba ekintu kyona, kiryabakorerwa Tata ori omu iguru. 20#Yoh 14:23. Ahabw'okuba babiri nari bashatu ku bariteeranira ahamwe omu iziina ryangye, naanye ndyaba ahagati yaabo.

Eby'okusaasirana

21Bwanyima Petero yaija, yaamubuuza ati: Mukama wangye, mugyenzi wangye ku araagume nanshaagiza, mmusaasire kangahi? Mpitsye emirundi mushanju? 22#Luk 17:4. Yesu yaamugarukamu ati: Tindikukugira nti, Ohitsye emirundi mushanju, kureka nti, Ohitsye emirundi makumi mushanju emirundi mushanju.

23N'ahabw'ekyo obukama bw'omu iguru nibushushanisibwa n'omugabe owaayenzire kubara #18:23 Omu Rugriika n'omuhuuku. n'abambari be ebintu ebi yaabaire ababiikize. 24Ku yaatandikire kubara, baamureetera omwe owaabaire aine eibanja rye ery'etalanta kakumi. 25Ku yaabuzire eky'okwihura, makama we yaaragiira ku bamutunda, we n'omukazi we n'abaana be n'ebi yaabaire aine byona, ngu abone kumara eibanja. 26#18:26 Omu Rugriika n'omuhuuku. Omwambari ogwo nikwo kumukwata amaguru akamweshengyereza, naagira ati: Mukama wangye, nyihuza mpora, naanye ndyakwihura byona. 27Mukama #18:27 Omu Rugriika n'omuhuuku. w'omwambari ogwo ahabw'embabazi ze yaamurekura, yaamusaasira eibanja eryo.

28Kwonka omwambari ogwo, ku yaashohoire, yaabugana omwambari mugyenzi we, owaabaire aine eibanja rye ery'edenaari igana; yaamukwata, yaamutq aha munigo, naagira ati: Nyihura eibanja ryangye. 29Ogwo mwambari mugyenzi we yaamukwata amaguru, yaamweshengyereza ati: Nyihuza mpora, niinyija kukwihura. 30We yaayanga, yaagyenda, yaamuta omu kihome, okuhitsya obu araaheze eibanja. 31Mbwenu abambari bagyenzi be, ku baareebire ebyabaho, baamugwerwa kubi munonga; baagyenda baabigambira mukama waabo byona. 32Mukama waabo nikwo kumutuma, akamujuukirira ati: iwe mwambari 'we omubi, nkusaasiire eibanja eryo ryona ahabw'okuunyeshengyereza; 33naiwe toshemereire kusaasira omwambari mugyenzi waawe, nk'oku nkusaasiire? 34#Mat 5:26. Mukama we yaamugwerwa kubi, yaamuhayo omu mikono y'abarinzi, okuhitsya obu ariihura eibanja ryona. 35#Mat 6:14, 15. Nikwo Tata ow'omu iguru aribagira atyo, ku muriba mutasaasiire bagyenzi baanyu, mwihire aha mutima.

Currently Selected:

Matayo 18: RR64

Highlight

Copy