Abaleevi 20
20
Ebifubiro ebishemereire abarikushiisha ebiragiro
1MUKAMA yaagira Musa ati: 2#2 Bus 33:6. Garuka ogambire Abaisraeli ebigambo ebi: Omuntu weena ow'omu Baisraeli nari ow'omu banyamahanga abarikubashuhuukiramu, oritambira Moleki omwe aha b'omu ruzaaro rwe, ashemereire kwitwa, ab'omuri egyo nsi bakamuteera amabaare. 3#Kub 19:20. Naanye ndyareeba kubi ogwo mushaija, mmucwe omu ihanga rye, nimmutura okuha Moleki omwe aha b'omu ruzaaro rwe, n'okushiisha Omwanya gwangye ogurikwera, akajumisa eiziina ryangye eririkwera. 4Abantu b'omu nsi egyo ku baryehuzya ogwo mushaija, ohaire Moleki omwe aha b'omu ruzaaro rwe, bataamwita, 5ndyaguma nindeeba kubi ogwo mushaija hamwe n'ab'omu ka ye, mmucwe omu ihanga ryabo hamwe n'abandi boona abarikumukuratira, bakeehongyera Moleki, bakamuramya nk'abarikuraaya.
6Kandi omuntu oriimuurira aha bantu abarikubandwa emizimu n'abarogi, abarikubakuratira nk'abarikuraaya, ndyareeba kubi ogwo muntu, mmucwe omu ihanga rye. 7#Mat 5:48; Kol 3:12. N'ahabw'ekyo mweyeze, mube abarikwera; ahakuba Niinye MUKAMA Ruhanga waanyu. 8Mugume mworobere ebiragiro byangye, kandi mukore ebi naataireho. Niinye MUKAMA orikubeeza. 9#Mat 15:4. Omuntu weena orikyeena ishe nari nyina aitwe; ahabw'okukyeena ishe nari nyina, orubanja rw'eshagama ye rube ahariwe.
10Omuntu ku arishambana na muka mutaahi we, bombi kishambana na kishambanisibwa, baitwe. 11#Bir 27:23. Omushaija ku aribyama na muka ishe, aryaba ajwekire ishe busha; bombi baitwe; orubanja rw'eshagama yaabo rubabeho. 12Omuntu ku aribyama n'omukaamwana, bombi baitwe; baryaba bakozire ekitakorwa; orubanja rw'eshagama yaabo rubabeho. 13Omushaija ku arihindura mugyenzi we omukazi, bombi baryaba bakozire ekihagaro, baitwe; orubanja rw'eshagama yaabo rubabeho. 14Omushaija ku arishwera omukazi na nyina, kiryaba kiri ekibi kihango, we nabo bookibwe, ekibi kyona kirekye kuba omuriimwe. 15#Bir 27:21. Omushaija ku aribyama n'enyamaishwa, aitwe, kandi mwite n'egyo nyamaishwa. 16Omukazi ku arihika enyamaishwa, yaabyama nayo, mwite ogwo mukazi n'egyo nyamaishwa; buzima bishemereire kwitwa; kandi orubanja rw'eshagama yaabyo rukabibaho.
17Omuntu ku aritwara munyaanya, owa ishe nari owa nyina, baareebana bajwaire busha, kiryaba ekihemu; babacwere omu maisho g'eihanga ryabo; ahakuba ajwekire busha munyaanya; orubanja rw'okutahikiirira ruryamugumaho. 18Omushaija ku aribyama n'omukazi ori omu kwezi, yaamujweka busha, aryaba ajwekire busha okujwa kwe, n'omukazi nawe aryaba ajwekire busha okujwa kwe; bombi bacuubwe omu ihanga ryabo. 19Otarijweka busha nyokwento nari shwenkazi; ahabw'okuba okwo n'okujweka busha ow'obuzaare bwa haihi; mwembi orubanja rw'okutahikiirira ruryabagumaho. 20Omushaija ku aribyama na muka ishento, aryaba ajwekire busha ishento; baryagiibwaho ekibi kyabo, bafe bucwekye. 21Omushaija ku aritwara muka mwene ishe, kiryaba kiri okweshiisha; aryaba ajwekire busha mwene ishe; baryafa bucwekye.
Omutaano gw'Abaisraeli n'abandi
22N'ahabw'ekyo mugume mworobere ebiragiro byangye byona n'emigyenzo ei naataireho yoona, mubikore, ensi ei ndikubatwara kutuuramu erekye kubatanaka. 23Mutaritooreza emicwe y'eihanga eri ndikubinga omu maisho gaanyu; ahakuba ebyo byona nibyo baakozire, bikandeetera okubangira kimwe. 24#Bir 7:6; 1 Pet 2:9. Kwonka imwe nkabagira nti: Muryahungura ensi yaabo, ngibahe, ebe eyaanyu, ensi ey'amate n'obwoki. Niinye MUKAMA Ruhanga waanyu owaabataaniise n'agandi mahanga. 25N'ahabw'ekyo mushemereire kutaanisa omu nyamaishwa ezitarikuzira n'ezirikuzira, n'enyonyi ezitarikuzira n'ezirikuzira; mutaryesiisisa enyamaishwa nari enyonyi nari ekintu kyona ekirikugyendera ahansi, eki naabataaniise nakyo, ngu kigume kiri ekirikuzira ahariimwe. 26#Zab 99:5; Tit 2:14. Muryaba abarikwera ahariinye; ahabw'okuba Nyowe MUKAMA ndi orikwera, kandi nkabataanisa n'amahanga agandi, ngu mubone kuba abantu bangye.
27 #
1 Sam 28:7. Omushaija nari omukazi orikubandwa emizimu nari orikuroga, aitwe; babateere amabaare; orubanja rw'eshagama yaabo rubabeho.
Currently Selected:
Abaleevi 20: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
