Yoshua 7

Abaisraeli okuteera Ai, n'okubingwa

1 # Yos 22:20. Kwonka Abaisraeli baacumura omu byabiikiirwe MUKAMA; ahakuba Akani, mwene Karumi, mwijukuru wa Zabudi, mwene Zeera, ow'omu ruganda rwa Yuda, akatwara aha bibiikirwe; MUKAMA yaagirira Abaisraeli ekiniga, kyayaka nk'omuriro. 2Yoshua yaatuma abantu ari Yeriko kuza Ai haihi na Besaveeni, aha rubaju rw'oburugwa-izooba bwa Beseeli, naabagira ati: Mwinamukye mutate egyo nsi. Abashaija abo baagyenda baatata Ai. 3Bwanyima baagaruka ahari Yoshua, baamugira bati: Abantu boona batazayo, kureka hagyende abantu nk'enkumi ibiri nari ishatu, babe nibo baateera Ai, otaruhiza busha abantu boona, ahabw'okuba abantu baayo ni bakye. 4#Bir 28:25; Isa 30:17. N'ahabw'ekyo hainamukayo abantu nk'enkumi ishatu; ku baahikireyo, aba Ai baababinga. 5#Lev 26:36. Baabaitamu abantu nka makumi ashatu na mukaaga; baabaiha omu maisho g'amarembo gaabo, bababingire baabahitsya Shebariimu, baabaitira aha kashuumo. N'ahabw'ekyo emitima y'abantu yaayaga, yaaba nk'amaizi.

Yoshua okutakira Mukama, n'okumubuuza ekyababingisa

6 # Kub 14:5, 6; Ezr 9:3-5; 1 Sam 4:12. Yoshua ku yaakihuriire, yaataagura eby'okujwara bye, yaagwa ahansi, yaajuumara omu maisho ge'shanduukye ya MUKAMA okuhitsya omu mwabazyo, we n'abakuru b'Abaisraeli; baayeshuka eiju omu mutwe. 7#Kur 5:22. Yoshua nikwo kugira ati: Ai bambe, MUKAMA Ruhanga! aba bantu okabambukiza ki Yorudani okutuhayo omu mikono y'Abaamori kutuhwerekyereza? Haakiri kuri twagumire seeri ya Yorudani! 8Ai MUKAMA, mbwenu ngambe ki, obu Abaisraeli baateire abazigu baabo amabega! 9#Zab 83:4; Kub 14:13. Ahakuba Abanyakanaani n'abatwire omu nsi egi nibaija kukihurira, batukubire ahagati, bamare eiziina ryaitu omu nsi. Mbwenu oryakora ki ahabw'eiziina ryawe erikuru?

10MUKAMA yaagambira Yoshua ati: Imuka! N'enki ekikujuumaize ahansi? 11Abaisraeli bacumwire, baita endagaano yangye, ei naabahaire; baatwara aha bibiikirwe, baiba, kandi baaryaraya, baabita omu bintu byabo. 12#Kub 14:45; Bar 2:14. Nikyo Abaisraeli batarikubaasiza kusyamirana n'abazigu baabo; nibabahunga ahabw'okuba bahindukire abakyeenirwe. Kandi tindiguma naimwe bundi, kureka biri mwahwerekyereza ebibiikiirwe MUKAMA ebiri omuriimwe. 13#Yos 3:5. Imuka, oyeze abantu, kandi obagire oti; Mweyeze ahabw'eizooba rya nyencakare; ahakuba MUKAMA Ruhanga wa Israeli naagira ati: Imwe Baisraeli 'mwe, omuriimwe harimu ebibiikiirwe MUKAMA; timurikubaasa kusyamirana n'abazigu baanyu, okuhitsya obu muraihe omuriimwe ebibiikirwe. 14#1 Sam 10:19-21; Enf 16:33; Byak 1:24-26. N'ahabw'ekyo omu kasheeshe nimwija kureetwa haihi omu nganda zaanyu; kandi oruganda oru MUKAMA araatoorane nirwija kwija nk'emiryango yaarwo oku eri; kandi omuryango ogu MUKAMA araatoorane nigwija kwija nk'amaju gaagwo oku gari; kandi enju ei MUKAMA araatoorane hagume nihaija omuntu omwe-omwe. 15#Kut 34:7. Kandi oraakwatwe aine ebintu ebibiikirwe naija kwokibwa n'ebi aine byona; ahakuba aitsire endagaano ya MUKAMA, yaakora ekirikuhemura omu Baisraeli.

Akani okukwatwa n'okwitwa

16Yoshua yaaguruka kare omu kasheeshe, yaateeranira hamwe Abaisraeli omu nganda zaabo; oruganda rwa Yuda rwatooranwa; 17yairiza haihi emiryango ya Yuda, haatooranwamu omuryango gwa Zeera; yairiza haihi ab'enju ya Zeera omwe-omwe, Zabudi yaatooranwa; 18#Kub 32:23; Byak 5:1-10. yairiza haihi ab'enju ya Zabudi omwe-omwe, haatooranwa Akani mwene Karumi, mwijukuru wa Zabudi, mwene Zeera ow'omu ruganda rwa Yuda. 19#Kub 5:6, 7. Yoshua yaagira Akani ati: Mwana wangye, ninkweshengyereza, heereza MUKAMA Ruhanga wa Israeli ekitiinisa, omwaturire; kandi ongambire hati mbwenu eki okozire, otakinshereka. 20Akani yaagarukamu Yoshua, naagira ati: N'eky'amazima ncumwire ahari MUKAMA Ruhanga wa Israeli, kandi eki nikyo nkozire. 21#2 Bag 5:20-27; Enf 15:27; Luk 12:15; 1 Tim 6:10. Ku ndeebire omu minyago ekijwaro kirungi kya Shinaari na shekeli magana abiri z'efeeza kandi n'omuhimba gw'ezaabu ogwine oburemeezi bwa shekeli makumi ataano, naabyetenga, naabitwara; na mbwenu bisherekire omu itaka, biri omu ihema ryangye ahagati, n'efeeza eri ahansi yaabyo.

22Yoshua nikwo kutuma entumwa, zikairuka, zikataaha omu ihema, zikashanga besherekire omu ihema rye n'efeeza eri ahansi yaabyo; 23bakabiihamu bakabireetera Yoshua n'Abaisraeli boona, bakabita ahansi omu maisho ga MUKAMA. 24Yoshua n'Abaisraeli boona baatwara Akani mutabani wa Zeera n'efeeza n'ekijwaro n'omuhimba gw'ezaabu n'abatabani na bahara be n'ente ze n'endogoya ze n'entaama ze n'eihema rye n'ebi yaabaire aine byona, baabishuumya omu ruhanga rwa Akori. 25#1 Bag 18:17; 1 Bus 2:7. Ku baahikireyo, Yoshua yaamubuuza ati: Otwitiire ki kubi? Naiwe MUKAMA yaaza kukwita kubi eri izooba. Abaisraeli boona baamuteera amabaare; ku baaherize kubateera amabaare, baabootsya n'omuriro. 26#2 Sam 18:17; Bir 13:17; Isa 65:10; Hos 2:15. Bwanyima baamurundaho omutuumo muhango gw'amabaare, ogukiriho n'eri izooba. Okuruga obwo MUKAMA yaayegarukamu, yaareka ekiniga kye kingi. Na mbwenu omwanya ogwo nigukyetwa Oruhanga rwa Akori n'okuhitsya hati.

Currently Selected:

Yoshua 7: RR64

Highlight

Copy

Compare