Abaramuzi 8
8
Gideoni okwita abagabe b'Abamidiani
1 #
Bar 12:1; 2 Sam 19:41. Abashaija ba Efuraimu baamubuuza bati: Otutuzire ki okutatuhuruza, nooza kurwana n'Abamidiani? Baamutonganisa munonga. 2Nawe yaabagarukamu ati: Nkozire ki ekirikwingana n'ebi mukozire? Emizaabibu y'empumbano eya Efuraimu terikuhita icwa ryona ery'emizaabibu ya Abiezeeri? 3#Enf 15:1. Ruhanga ahaireyo abanyiginya ba Midiani Orebu na Zeebu omu mikono yaanyu. Mbwenu shi nyowe eki nkozire ekirikukira ebi mukozire niki? Ku yaabagambiire ekyo, ekiniga kyabo kyaikaikana.
4Gideoni yaija yaayambuka Yorudani n'abo bantu magana ashatu, abu yaabaire aine, bagwire enshazi kwonka babakuratiire. 5Yaagira abantu ba Sukoosi ati: Naabeeshengyereza mumpeere aba bantu bankuratiire emigaati, ahakuba baagwa enshazi, kandi nkibingire Zeeba na Zalumuuna, abagabe ba Midiani. 6#1 Sam 25:11. Abategyeki ba Sukoosi baagira bati: Zeeba na Zalumuuna waabakwatsire, tukabona kuheereza engabo zaawe ebyokurya? 7Gideoni yaagira ati: MUKAMA ku araaheyo Zeeba na Zalumuuna omu mikono yangye, emibiri yaanyu niinyija kugitaaguza amahwa g'omu ihamba n'ag'emikwata-ngwe. 8Yaarugayo, yaaza Penueli, nabo yaabagambira ebigambo nk'ebyo; kandi aba Penueli bamugarukamu nk'eby'aba Sukoosi. 9Yaagambira aba Penueli ati: Ku ndaabe naagarukire n'obusingye, niinyija kusheenya ogu munaara.
10 #
Bar 7:12. Obwo Zeeba na Zalumuuna bakaba bari Karikoori n'engabo zaabo akakumi kamwe n'enkumi itaano, abaahonokire aha ngabo zoona ez'eihe ry'ab'oburugwa-izooba; ahabw'okuba hakafa abantu akasiriira kamwe n'obukumi bubiri, enkwata-rurara. 11#Bar 18:27; 1 Tes 5:3. Gideoni yainamuka, yaatoora omuhanda ogurikuraba omu bantu abaabaire batuura omu mahema aha rubaju rw'oburugwa-izooba bwa Nooba na Yogibeha, yaasingura eryo ihe; ahakuba rikaba ryehugiireho. 12#Zab 83:11. Zeeba na Zalumuuna abagabe bombi ba Midiani baahunga, yaababinga, yaabakwata, kandi engabo zaabo zoona yaazihahaaza emitima, zaataataana.
13Bwanyima Gideoni mwene Yoashi yaatabaaruka omu rugamba, yaaraba aharikwinamuka Heresi; 14yaakwata omutsigazi wa Sukoosi, yaamubuuza abategyeki n'abakuru ba Sukoosi, onu yaamuhandiikira amaziina gaabo, abashaija makumi mushanju na mushanju. 15Atyo yaija aha ba Sukoosi, yaagira ati: Mureebe Zeeba na Zalumuuna, abu munteerereireho enaku, nimugira muti, Zeeba na Zalumuuna waabakwatsire, tukabona kuha engabo zaawe ezirikugwa enshazi eby'okurya? 16Yaatwara abakuru b'orurembo, n'amahwa g'omu ihamba n'ag'emikwatangwe, yaageegyesesa aba Sukoosi. 17Kandi yaasheenya omunaara gwa Penueli, yaita abashaija b'omuri orwo rurembo.
18Bwanyima yaabuuza Zeeba na Zalumuuna ati: Abashaija abu mwaitiire Tabora bakaba nibashusha ki? Baamugarukamu bati: Nk'oku orikushusha, nabo nikwo baabaire nibashusha. Buri omwe akaba naashusha omwana w'omugabe. 19Yaagira ati: Abo bakaba bari bakuru bangye, abaana ba maawe. Nindahira MUKAMA ahuriire, kuri noogira ngu mukabakiza, naanye tinkubaitsire. 20Yaagambira Yeseri omujigaijo gwe, ati: Imuka, obaite. Kwonka omutsigazi ogwo tiyaihayo rurara ye; yaatiina, ahabw'okuba akaba akiri omutsigazi. 21Bwanyima Zeeba na Zalumuuna nikwo kumugira bati: Imuka, obe niiwe waatwita, ahakuba nk'oku omuntu arikwingana, n'amaani ge nikwo gaingana. Atyo Gideoni yaimuka, yaita Zeeba na Zalumuuna, yaajuura engamira zaabo ebirezi ebi zaabaire zijwaire omu bitsya.
Gideoni okwanga kwemekwa
22Bwanyima Abaisraeli baagambira Gideoni bati: Otutegyekye, iwe na mutabani waawe, na mwijukuru waawe; ahabw'okuba otukirize Abamidiani. 23#1 Sam 8:7; 10:19; Isa 26:13; Hos 13:10. Gideoni yaabagarukamu ati: Tindibategyeka, na mutabani wangye taribategyeka; kureka MUKAMA niwe aribategyeka. 24#1 Tim 6:10. Gideoni yaabagira ati: Nyine eki ndikubashaba; buri muntu ampe empeta z'omu matu ezi anyagire. (Ahakuba Abamidiani bakaba bajwara empeta z'ezaabu omu matu, ahabw'okuba bakaba bari Abaishimaeli.) 25Baamugarukamu bati: Twaza kuzikuha n'omutima gwekundiire. Baayara omwenda ahansi, buri muntu yaanagaho empeta z'omu matu ezi anyagire. 26Oburemeezi bw'empeta zaabo ez'ezaabu z'omu matu ezi yaashabire bwaba shekeli z'ezaabu rukumi na magana mushanju, otabariiremu birezi n'eby'okwehunda n'ebijwaro bya bujwa ebyabaire bijwarwa abagabe ba Midiani, kandi otataireho mikuufu ey'omu bitsya by'engamira zaabo. 27#Bar 17:5; 18:14, 17; Kur 23:33; Zab 106:39. Gideoni yaabikoramu efodi, yaagita omu rurembo rwe orurikwetwa Ofura; Abaisraeli boona baaguma nibazayo kugiramya nk'abarikuraaya; yaaba omutego ahari Gideoni n'ab'omu ka ye. 28Batyo Abamidiani baasingurwa Abaisraeli, tibaagaruka kwimutsya mutwe obundi. Ensi yaahuumura okumara emyaka makumi ana omu busingye bwa Gideoni.
29Yeruba-baali mwene Yoashi yaagyenda, yaatuura omu nju ye ey'obutaka. 30#Bar 9:2, 5. Gideoni akaba aine abaana b'aboojo makumi mushanju, abu yaayezaariire; ahabw'okuba akaba aine abakazi baingi. 31Kandi akaba aine omukazi w'ekinyanshunju omuri Shekemu; nawe yaamuzaarira omwana w'omwojo, yaamweta Abimeleki. 32Bwanyima Gideoni mwene Yoashi yaafa yaahikire omu ngingo zaabukuru, yaaziikwa Ofura ey'aba Abiezeeri omu kituuro kya Yoashi ishe.
33 #
Bar 2:19; 9:4. Ahonaaho Gideoni ku yaaherize kufa, Abaisraeli baagaruka baaramya Baabaali nk'abarikuraaya, kandi baahindura Baaliberisi ruhanga waabo. 34#Zab 78:11; 106:13-21; Yer 2:32. Abaisraeli tibaijuka MUKAMA Ruhanga waabo, owaabaire abaiha omu mikono y'abazigu baabo boona, abaabaire baba babeehinguririize; 35#Bar 9:16; Mub 9:14, 15. kandi tibaagirira mbabazi ab'enju ya Yeruba-baali, niwe Gideoni, ahabw'ebirungi byona ebi yaakoreire Israeli.
Currently Selected:
Abaramuzi 8: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
