Isaaya 33
33
Oku Ruhanga arikurwansa engobya n'abanyagi
1 #
Isa 21:2; Hab 2:8. Oryakareeba, iwe orikunyaga,
Haza otakanyagwaga,
Iwe orikugobya otakagobezibwaga!
Ku oriheza kunyaga, naiwe oryanyagwa;
Kandi ku oriheza kugobya, naiwe oryagobezibwa.
2Ai MUKAMA, otugirire embabazi, tukutegyereize;
Otubeere amaani buri kasheeshe,
Kandi otubeere okujunwa omu biro by'enkau.
3Amahanga gabingirwe enduuru z'okwimukirira,
Kandi oimukire, amahanga gaataataana.
4Baryateerana eminyago, nk'oku kanyananga eshanguruza,
Bagyeshukyemu nk'enzigye.
5 #
Zab 97:9. MUKAMA naahimbisibwa, ahabw'okuba atuura ahaiguru,
Aryaijuza Saayuuni eby'oburyo n'okuhikiirira.
6 #
Isa 39:8; Enf 1:7. Omu biro byawe aryaba okuhama kwawe,
Okujunwa kwawe kwingi, obwengye n'okumanya;
Okutiina MUKAMA niryo itungo rya Saayuuni.
7 #
2 Bag 18:37. Reeba, amamanzi gaabo nigaboroogyera aheeru,
Entumwa z'okushaba obusingye nizirira munonga,
8 #
Bar 5:6; 2 Bag 18:14-17. Emihanda rugyendwa erimu busha,
Omugyenzi takigirabamu.
Endagaano ziriire,
Baakareebi nibagaywa,
Omuntu takyetwaho.
9Ensi neecura, neehwerera,
Lebanooni eshobeirwe, ehotokire;
Sharooni ni nk'eihamba,
Bashani na Karumeeli nizikunkumuka amababi.
10 #
Zab 12:5. MUKAMA naagira ati: Hati naimuka,
Naaza kweta ahaiguru, nsingizibwe hati hati.
11Muryatwara enda y'ebishushunga, muzaare ebitsintsi by'embuba,
Omwitsyo gwanyu gube omuriro oguribootsya.
12Amahanga garyayokibwa, gacwekye einoni,
Gabe nk'oku amahwa gatemwa, gakookibwa omu muriro.
Oku Mukama arijuna abantu be
13Imwe abari hare munonga, muhurire eki nkozire;
Naimwe abari haihi, mwikirize amaani gangye.
14 #
Isa 66:15; Heb 12:29. Abasiisi b'omuri Saayuuni nibatiina,
Abatarikutiina Ruhanga bakwatsirwe orutetema.
N'oha omuriitwe owaakubaasa kutuura n'omuriro gurikurya busha?
N'oha omuriitwe owaakubaasa kutuura n'omuriro gurikwotsya ebiro byona?
15 #
Zab 24:4; 119:27. Orikugyendera omu kuhikiirira, akagamba ebihikire,
Orikwanga amagoba g'okuhata,
Orikukunkumura engaro ze, ngu zitakaaakwata enguzi,
Orikwekwata aha matu, ngu atahurira eby'okusheesha eshagama,
Orikuhumiza amaisho ngu atareeba ekibi.
16 #
Isa 30:23, 25. Ogwo niwe arituura omu myanya y'ahaiguru,
Omwanya gwe gw'okwerindiramu guryaba oguzitiirwe amabaare;
Aryaguma agaburirwe eby'okurya,
N'amaizi g'okunywa tigarimuburira.
17 #
Isa 6:5. Amaisho gaawe garyareeba omugabe aine oburungi,
Gareebe n'ensi eyaaririkire okuhika hare.
18 #
2 Bag 18:14. Omutima gwawe guryateekateeka aha birikutiinisa;
Ogire oti: Owaabazire emitoijo,
Akagipima, arahi?
Owaabazire eminaara, we arahi?
19 #
Isa 28:1; Yer 5:15; Bir 28:49, 50. Torigaruka kureeba ihanga eririkushaarira
Ery'engambo etarikwetegyerezibwa,
Ei otarikubaasa kumanya,
Ery'orurimi rw'enduga-mahanga oru otarikubaasa kuhurira.
20Yetegyereze Saayuuni, orurembo oru twabaire tukoreramu amagyenyi agaatairweho;
Amaisho gaawe garyareeba Yerusaalemu,
Oshangye eri obutuuro bucureire,
Eihema ryayo tiririfururwa,
Enkondo zaaryo tizirikuurwa ebiro byona,
N'omurunga gwaryo na gumwe tiguricweka;
21 #
Zab 46:4, 5. Kureka okwo niyo MUKAMA ariguma naitwe aine ekititiinsia,
Omwanya gw'emigyera mihango n'emikye,
Etarirabwamu maato agarikuvugisibwa engahi,
N'obu yaakuba emeeri y'ekitiinisa.
22 #
1 Sam 12:12; Zek 9:9; Yak 4:12. Ahakuba MUKAMA niwe muramuzi waitu, kandi omutegyeki waitu;
MUKAMA niwe Mugabe waitu: aryatujuna.
23Emigoye yaawe eyugire,
Tekibaasa kuhamya murongooti omu mwanya gwagwo,
N'obu kwakuba okureega amatanga;
N'ahabw'ekyo eminyago n'ebinyagirwe bingi biryabaganwa,
Nangwa n'ebirema nabyo biryatwara eminyago.
24 #
Isa 1:5, 6; Yer 50:20. Kandi tihaine mutuuzi waayo origira ati: Ndwaire,
Abantu abatwireyo baryasaasirwa okutahikiirira kwabo.
Currently Selected:
Isaaya 33: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
