Eky'Ebiragiro 27
27
Amabaare mahango agarihandiikwaho eby'emigisha n'eby'emikyeeno
1Musa n'abakuru b'Abaisraeli baaragiira abantu nibagira bati: Mukwate ebiragiro byona ebi ndikubaragiira eri izooba. 2#Yos 4:1. Kandi aha izooba eri muryambukiraho Yorudani kutaaha omu nsi ei MUKAMA Ruhanga waanyu arikubaha, muryabyara amabaare mahango, mugasiigye einoni, 3mugahandiikyeho ebigambo byona eby'ebiragiro ebi, ku muriheza kwambuka n'okutaaha omu nsi ei MUKAMA Ruhanga waanyu arikubaha, ensi y'amate n'obwoki, nka MUKAMA, Ruhanga wa baashwenkuriimwe, oku yaabaraganiise. 4#Yos 8:30-32. Ku muriheza kwambuka Yorudani, ago mabaare agu naabaragiira eri izooba, muryagabyara aha rushozi Ebali, mugasiigye einoni. 5Kandi okwo niyo muryombekyera MUKAMA Ruhanga waanyu eitambiro ry'amabaare; mutarigabaizisa ekyoma kyona. 6Eryo itambiro rya MUKAMA Ruhanga waanyu muryaryombekyesa amabaare agatabaizire; kandi muritambirireho MUKAMA Ruhanga waanyu ebitambo by'okwotsya; 7kandi muhongye empongano z'okusiima ahabw'obusingye, muriireyo; mushemerererwe omu maisho ga MUKAMA Ruhanga waanyu. 8Kandi muryahandiika ahari ago mabaare ebigambo byona eby'ebi biragiro, bihwezibwe gye.
9Musa n'abanyamurwa Abaleevi baagambira Abaisraeli boona bati: Imwe Baisraeli 'mwe, muhuname, muhurire. Eri izooba mwahinduka eihanga rya MUKAMA Ruhanga waanyu. 10Nikyo mushemerereire kuhurira eiraka rya MUKAMA Ruhanga waanyu, mukoorobera ebiragiro bye n'ebyatairweho, ebi ndikubaragiira eri izooba.
11Musa yaayehanangiriza abantu eryo izooba, naagira ati: 12#Bir 11:29. Ku muriheza kwambuka Yorudani, aba nibo baryemerera aha rushozi Gerizimu okushabira abantu omugisha; ab'oruganda rwa Simeoni, orwa Leevi, orwa Yuda, orwa Isakaari, orwa Yosefu n'orwa Benyamiini; 13kandi aba nibo baryemerera aha rushozi Ebali ahabw'okukyeena; ab'oruganda rwa Reubeeni, orwa Gaadi, orwa Asheri, orwa Zebuluuni, orwa Daani n'orwa Nafutaali.
14 #
Yos 8:33; Dan 9:11. Kandi Abaleevi baryagambira Abaisraeli boona n'eiraka rihango, nibagira bati:
15 #
Kur 20:4; Isa 44:9; Hos 13:2. Omuntu orikora ekishushani ekibaizire nari ekiheesirwe, eki MUKAMA ayangira kimwe, ekikozirwe omunyamwoga, akakyemereza bwesherekye, akyeenwe! Abantu boona baikirize nibagira bati: Amiina.
16Orikugaya ishe nari nyina akyeenwe! Abantu boona baikirize nibagira bati: Amiina.
17 #
Enf 22:28. Orikwirizayo ekiti ky'omwatano gwa mutaahi we akyeenwe! Abantu boona baikirize nibagira bati: Amiina.
18 #
Lev 19:14; Enf 28:10. Orikuhabya empumi, akagiiha omu muhanda akyeenwe! Abantu boona baikirize nibagira bati: Amiina.
19 #
Mal 3:5. Orikwita orubanja rw'omunyaihanga, orw'efuuzi n'orw'omufaakazi akyeenwe! Abantu boona baikirize nibagira bati: Amiina.
20 #
1 Kor 5:1. Orikubyama na muka ishe akyeenwe, ahabw'okuba naaba ajwekire ishe busha. Abantu boona baikirize nibagira bati: Amiina.
21Orikubyama n'enyamaishwa yoona akyeenwe! Abantu boona baikirize nibagira bati: Amiina.
22Orikubyama na munyaanya owa ishe nari owa nyina akyeenwe! Abantu boona baikirize nibagira bati: Amiina.
23Orikubyama na nyina-zaara akyeenwe! Abantu boona baikirize nibagira bati: Amiina.
24 #
Lev 24:17. Orikwita mutaahi we bwesherekye akyeenwe! Abantu boona baikirize nibagira bati: Amiina.
25 #
Bir 11:3; Gal 3:10. Orikurya enguzi kwita otaine rubanja akyeenwe! Abantu boona baikirize nibagira bati: Amiina.
26 #
Yer 11:3; Gal 3:10. Otarikuhamya bigambo by'ebiragiro ebi omu kubikora akyeenwe! Abantu boona baikirize nibagira bati: Amiina.
Currently Selected:
Eky'Ebiragiro 27: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
