Eky'Ebiragiro 21

Ekarabo y'obwitsi obutamanyirwe

1 # Zab 9:12. Omu nsi ei MUKAMA Ruhanga waanyu arikubaha kukubuura, omutumbi gw'omuntu oitsirwe ku gurishangwa omu ishwa, omwitsire atarikumanywa, 2abakuru baanyu n'abaramuzi baryaija, bateere entambwe okuruga aha mutumbi gw'oitsirwe okuhika aha ndembo ezeehinguririizeho; 3abakuru b'orurembo oruri haihi n'ogwo mutumbi baryatwara enyana y'eruutsi etakakoresiibweho n'obu kwakuba okukurura ekintu kyona n'endiijo, 4bagishuumye omu ruhanga orurimu akagyera k'amaizi agarikugyenda, oruhanga orutahingirwe, kandi orutabibirwemu, bagihendere ebitsya omuri orwo ruhanga. 5#Bir 17:8, 9. Abanyamurwa beene Leevi bairire haihi; ahakuba nibo MUKAMA Ruhanga waanyu yaatooraine kumuheereza n'okushabira abantu omugisha omu iziina rya MUKAMA, kandi nibo bashemereire kucwa orubanja rw'empaka zoona n'orw'obuhuta bwona. 6#Zab 73:13; Mat 27:24. Bwanyima abakuru boona ab'orwo rurembo oruri haihi n'omutumbi gw'oitsirwe banaabire engaro zaabo ahari egyo nyana y'eruutsi, ei ebitsya byayo byahenderwa omuri orwo ruhanga; 7#2 Sam 3:28. beehakane nibagira bati: Emikono yaitu tiyo eseesire egi shagama, kandi n'amaisho gaitu tigagireebire neesheesheka. 8#Yer 26:15; Yon 1:14. Ai MUKAMA, saasira abantu baawe Israeli, abu waacungwire, otata orubanja rw'eshagama y'otaine rubanja aha bantu baawe Israeli; kureka basaasirwe orubanja rw'egyo shagama. 9Ku muritwaza mutyo, mwakora ebirikusiimwa MUKAMA, muryaiha omuriimwe orubanja rw'eshagama y'otaine rubanja.

Ekiragiro ky'okushwerwa kw'omukazi onyagirwe

10Ku orihurura kurwanisa abazigu baawe, MUKAMA Ruhanga waawe yaabahayo omu mikono yaawe, waabatwara bari enkwatwa, 11waabareebamu omukazi murungi, waamurigira, waayenda kumushwera, 12oryamutwara owaawe, amweise eishokye rye, acwe ebyara, 13#Zab 45:10. ajuure ebijwaro ebi akwatiirwemu, agume omu ka yaawe, amare okwezi kwona naaririra ishe na nyina; bwanyima obone kumushwera, obe iba, nawe abe omukazi waawe. 14Bwanyima ku otarimusiima, omurekye agyende, aze ahi arikwenda; kwonka otarimutunda empiiha, kandi otarimutwaza nk'omuzaana, ahabw'okuba oryaba omusiisire.

15 # Kut 29:33. Omushaija, ku ariba aine abakazi babiri, omwe ari enkundwakazi, n'ondi ari enyangwakazi, kandi bombi bamuzaariire abaana, enkundwakazi n'enyangwakazi; kandi omwana w'omwojo ow'okubanza ku ariba ari ow'enyangwakazi, 16#2 Bus 21:3. aha izooba eri ariragiraho abaana be ebi atungire, tariikirizibwa kuhindura omwana w'enkundwakazi kuba omwana we mukuru okukira ogwo ow'enyangwakazi owaabandize kuzaarwa; 17#Kut 25:5, 6, 31; 1 Bus 5:1. kureka aryaikiriza omwana w'enyangwakazi owaabandize kuzaarwa, ahabw'okumuraga emigabo ebiri y'ebi atungire; ahabw'okuba niwe maani ge ag'okuzaara gaatandikiireho; n'ebishemereire omwana w'okubanza n'ebye.

Ekifubiro ky'omwana empiga

18 # Kur 21:15, 17; Enf 1:8; 15:5; Efe 6:1. Omuntu ku ariba aine omwana w'omwojo empiga kandi omugomi, otarikuhurira ishe nari nyina, n'obu baakumuhana bata, 19ishe na nyina baryamukwata, bamutwarire abakuru b'orurembo rwabo aha irembo ryarwo, 20bagambire abakuru b'orwo rurembo bati: Ogu mwana waitu aba empiga kandi omugomi, tatuhurira; n'omunyamururu kandi omusinzi. 21Abashaija boona ab'omu ruembo rwabo baryamuteera amabaare, afe. Ku muritwaza mutyo, muryaiha ekyo kibi omuriimwe; Abaisraeli boona baryakihurira, batiine.

22 # Bir 22:26. Kandi omuntu ku arikora ekibi ekishemereire kumwitsa, bwanyima yaitwa, waamuhanika aha muti, 23#Yos 8:29; Yoh 19:31; Gal 3:13; Lev 18:25. omutumbi gwe gutariguraaraho, kureka omuziikye eryo izooba; ahabw'okuba ohanikwa aha muti, aba akyeenirwe Ruhanga-orekye kushiisha ensi, ei MUKAMA Ruhanga waawe arikukuha kuba obuhunguzi.

Currently Selected:

Eky'Ebiragiro 21: RR64

Highlight

Copy

Compare