Eky'Ebiragiro 13

Ebya baanabi b'ebishuba

1 # 2 Tes 2:9. Omuriimwe ku hariimukamu nabi nari omurootsi w'ebirooto, yaabakorera akamanyiso nari eky'okutangaaza, 2#Yer 28:9; Mat 7:22. kandi ako kamanyiso nari eky'okutangaaza ekyo eki abagagambiireho kyahikiirira, yagaruka yaagira ati: Ka tukuratire baaruhanga abandi abu mutakamanyaga, tubaheereze; 3#Mat 24:24; 1 Kor 11:19. mutarihurira ebigambo bya nabi ogwo nari eby'ogwo murootsi w'ebirooto; ahakuba MUKAMA Ruhanga waanyu aryaba naabagyeza, kumanya ku muraabe nimukunda MUKAMA Ruhanga waanyu n'omutima gwanyu gwona n'amagara gaanyu goona. 4#2 Bus 34:31; 2 Yoh 1:6. Muryaguma mukuratire MUKAMA Ruhanga waanyu, mumutiine, mukwate ebiragiro bye, muhurire eiraka rye, mumuheereze, kandi mumuhamireho. 5#1 Bag 18:40; Yer 14:15; 2 Bag 10:18-28. Kandi nabi ogwo, nari ogwo murootsi w'ebirooto, aryaitwa, ahabw'okubagambira eby'okugomera MUKAMA Ruhanga waanyu, owaabaihire omu nsi ya Misri, akabacungura omu nju y'obuhuuku, n'ahabw'okubateishura omuhanda ogu MUKAMA Ruhanga waanyu yaabaragiire kugyenderamu. Ku muritwaza mutyo, muryaiha ekibi omuriimwe.

6Murumuna waawe, omwana wa nyoko, nari mutabani waawe, nari muhara waawe, nari omukazi waawe ow'aha mukono, nari munywani waawe ow'aha mara, ku arikwosyosya omu mubonano naagira ati: Ija, tuze kuheereza baaruhanga abandi, abu otakamanyaga, n'obu baakuba baashwenkuru, 7baaruhanga b'amahanga agabeehinguririize, agari haihi naimwe, nari agabari hare, okuruga aha muheru gw'ensi, okuhika aha gundi; 8#Enf 1:10; Gal 1:8, 9. otarimwikiriza n'obu kwakuba okumuhurira; otarimureebesa eriisho ry'esaasi, otarimusaasira, kandi otarimushereka, 9#Bir 17:7. kureka buzimazima oryamwita; omukono gwawe gube nigwo gwamubanza, bwanyima hateho ey'abandi boona; 10oryamuteera amabaare, afe, ahabw'okuba ayenzire kukubeihabeiha, ngu akwihe ahari MUKAMA Ruhanga waawe, owaakwihire omu nsi ya Misri, omu nju y'obuhuuku. 11Kandi Abaisraeli boona baryakihurira, batiine, tibarigaruka kukora kibi ekirikwingana kityo omuriimwe.

12 # Yos 22:11. Ku orihurira amakuru ahari rumwe aha ndembo zaawe, ezi MUKAMA Ruhanga waawe yaakuhaire kutuuramu, ngu, 13#2 Kor 6:15; 1 Yoh 2:19. hariho abantu babi abarugire omuriimwe, bakoosyosya abatwire omu rurembo rwabo, nibagira bati: Ka tugyende tuheereze baaruhanga abandi, abu mutakamanyaga; 14obibuuririze, obikuratirire, obicondooze; ku orishanga biri eby'amazima bitarikubanganisibwa, ku ekihagaro ekirikushusha kityo kikoreirwe omuriimwe, 15otaribura kwitsa ab'omuri orwo rurembo rurara, okarucwekyerereza kimwe n'ebirimu byona hamwe n'amatungo gaamwo. 16Eminyago yaamwo yoona oryagirunda ahu emihanda erikuteeranira, oyotsye orwo rurembo n'eminyago yaamwo yoona, nk'oku bootsya ekitambo eky'okwokyeza kimwe ekitambiirwe MUKAMA Ruhanga waanyu; orwo rurembo ruryaguma ruri omutuumo ebiro byona; tiruryombekwa bundi. 17#Yos 6:18; 7:1. Otarigira ekintu kyona eki waagumya omu ngaro ahari ebyo ebyashorooreirwe MUKAMA, abone kureka ekiniga kye kingi, akugirire embabazi n'esaasi, akukanyise, nk'oku yaaraganiise baashwenkuru naarahira; 18ku origuma noohurira eiraka rya MUKAMA Ruhanga waawe, nookwata ebiragiro bye byona, ebi ndikukuragiira eri izooba, nookora ebirikusiimwa MUKAMA Ruhanga waawe.

Currently Selected:

Eky'Ebiragiro 13: RR64

Highlight

Copy

Compare