Eky'Ebiragiro 11

Abaisraeli oku bashemereire kukunda Ruhanga n'okumworobera

1N'ahabw'ekyo oryaguma okunde MUKAMA Ruhanga waawe, orinde obutoosha ebi yaakukwatsize, n'ebyatairweho, n'ebyaragiirwe, n'ebiragiro bye. 2Eri izooba mumanye ebi, (ahakuba tindikugambira baana baanyu, abatakabimanyire n'obu kwakuba okubireeba), muteekateekye aha kuhana kwa MUKAMA Ruhanga waanyu, obukuru bwe, omukono gwe gw'amaani kandi ogubangire, 3obumanyiso bwe n'ebi yaakozire Faraho omugabe wa Misri n'ensi ye yoona omu nsi ya Misri; 4n'ebi yaakozire eihe rya Misri n'embaraasi zaabo n'ebigaari byabo; oku yaagarwire amaizi g'Enyanja erikutukura, gakabashweka babakuratiire, MUKAMA akabacwekyerereza kimwe, batagarukye kwimutsya omutwe n'okuhitsya hati; 5n'ebi yaabakozire muri omu ihamba, okuhitsya obu mwahikire aha; 6#Kub 16:1; Zab 106:17. n'ebi yaakozire Dasani na Abiraamu beene Eliabu, mutabani wa Reubeeni, oku eitaka ryayashamire, rikabamira n'ab'omu maka gaabo n'amahema gaabo n'ebintu byona ebihuriire ebi baabaire nibagyenda nabyo, bikacwekyererera ahagati y'Abaisraeli boona; 7ahakuba amaisho gaanyu gakeereebera ebikuru byona ebi MUKAMA yaakozire.

8Nikyo mushemerereire kukwata ebiragiro byona ebi ndikubaragiira eri izooba, mubone kuba ab'amaani, muze omu nsi ei murikuza kwambukamu kukubuura, ku eba eyaanyu, 9kandi mubone kuhangaarira omu nsi ei MUKAMA yaarahiire kuha baashwenkuriimwe n'oruzaaro rwabo, ensi ey'amate n'obwoki. 10Ahakuba ensi ei murikuzamu kukubuura ti nk'eya Misri ei mwarugiremu, ei mwabaire mubiba embibo, mukareetamu amaizi n'ebigyere byanyu, nk'oku bagira omusiri gw'emboga; 11#Bir 8:7. kureka ensi, ei murikuzamu kukubuura, n'ensi y'ebibungo n'empanga erikuguubwamu amaizi g'enjura erikuruga omu iguru, 12n'ensi ei MUKAMA Ruhanga waanyu arikutaho omutima; kandi MUKAMA Ruhanga waanyu atuura agitaireho amaisho, okwiha aha kutandika kw'omwaka okuhitsya aha muheru gwagwo.

13Ku muryezirika kworobera ebiragiro byangye, ebi ndikubaragiira eri izooba, okukunda MUKAMA Ruhanga waanyu, n'okumuheereza n'omutima gwanyu gwona n'amagara gaanyu goona, 14#Bir 28:12; Yoel 2:23. naanye ndyagwisiza ensi yaanyu enjura omu bunaku bwayo, ey'eibiba n'eya katumba, mubone kushaaruura engano zaanyu, na viinyo yaanyu n'amajuta gaanyu g'emizeituuni. 15#Zab 104:14. Ndyameza obunyaatsi omu mariisizo gaanyu ahabw'amatungo gaanyu, murye, mwigute. 16Mwerinde, emitima yaanyu etaribeihwa-beihwa, mukateishuka, mukaheereza baaruhanga abandi, mukabaramya, 17#2 Bus 6:26; 7:13. MUKAMA akabagirira ekiniga kingi, akakinga eiguru, enjura ekabura, ensi ekareka kweza emyaka yaayo, mukarahuka kuhwerekyerera, mukahwa omu nsi enungi ei MUKAMA arikubaha.

18N'ahabw'ekyo mute ebigambo byangye ebi aha mitima yaanyu n'omu magara gaanyu, mubikome aha mikono yaanyu, bibe akamanyiso, mubite aha buso bwanyu ahagati y'amaisho gaanyu. 19#Enf 22:6. Mugume mubyegyese abaana baanyu, mubigaaniireho mushutami omu maka gaanyu, nimugyenda omu muhanda, nimuza kubyama, kandi nimwimuka. 20Muryabihandiika aha biti by'emiryango y'amaju gaanyu n'aha nyigi z'amarembo gaanyu; 21#Enf 3:2; 4:10. ebiro byanyu n'eby'abaana baanyu bibone kukanya omu nsi ei MUKAMA yaarahiire kuha baashwenkuriimwe omwanya gwona ogu eiguru ririmara riri ahaiguru y'ensi. 22Ahakuba ku muryezirika kukwata ebiragiro ebi byona ebi ndikubaragiira, mwabyorobera, okukunda MUKAMA Ruhanga waanyu, n'okugyendera omu mihanda ye yoona, n'okumuhamiraho, 23#Bir 4:38. obwo MUKAMA aryabinga amahanga ago goona omu maisho gaanyu, kandi muryakubuura amahanga agarikubakira obukuru n'amaani. 24#Yos 1:3. Omwanya gwona ogu muriribatamu n'ebigyere byanyu guryaba ogwanyu; omwatano gwanyu guryatandikira aha ihamba na Lebanooni, n'aha mugyera Furaati, guhikye aha Nyanja y'oburengyerwa-izooba. 25#Bir 7:24. Tihaine muntu weena oribaasa kubaza omu kaso; MUKAMA Ruhanga waanyu aryaitsa obwoba ensi yoona ei muriribatamu, kandi agireetere okutiina ahabwanyu, nk'oku yaabaraganiise.

26 # Bir 30:1. Reeba, eri izooba ninta omu maisho gaanyu omugisha n'omukyeeno; 27#Bir 28:2. omugisha ku muryorobera ebiragiro bya MUKAMA Ruhanga waanyu, ebi ndikubaragiira eri izooba, 28#Bir 28:15. n'omukyeeno ku muryanga kworobera ebiragiro bya MUKAMA Ruhanga waanyu, mwateishuka omuhanda ogu ndikubaragiira eri izooba, mwakuratira baaruhanga abandi, abu mutakamanyaga. 29#Yos 8:33. Kandi MUKAMA Ruhanga waanyu ku aribahitsya omu nsi, ei murikuza kukubuura, muryata omugisha aha rushozi Gerizimu n'omukyeeno aha rushozi Ebali. 30Enshozi ezo tiziri seeri ya Yorudani, oburengyerwa-izooba bw'omuhanda omu nsi y'Abanyakanaani, abatwire omuri Araba, ahashungaine na Gilugaali, aha rubaju rw'emyela ya Moore? 31Ahakuba nimwija kwambuka Yorudani kuza omu nsi ei MUKAMA Ruhanga waanyu arikubaha kukubuura, kandi kwo muryagikubuura, mugituuremu. 32Kandi muryaguma mute omutima aha biragiro ebyatairweho n'ebyaragiirwe byona, ebi ndikuta omu maisho gaanyu eri izooba, mubyorobere.

Currently Selected:

Eky'Ebiragiro 11: RR64

Highlight

Copy

Compare