2 Timoseo 4

1 # Byak 10:42; Rom 14:9, 10. Ninkwehanangiriza omu maisho ga Ruhanga na Kristo, oricwera abahuriire n'abafiire orubanja, kandi ahabw'okugaruka kwe n'obukama bwe, 2#Byak 20:20, 31. ogume obuurire ekigambo kya Ruhanga, ogambe n'obweziriki omu bunaku oburagiirwe n'butaragiirwe, ohane, oteise, oyehanangirize n'okugumisiriza kandi n'okwegyesa. 3#1 Tim 4:1. Ahakuba ebiro biryaija, obu abantu baryanga kuhurira enyegyesa y'amazima; kwonka ahabw'okugira amatu agarikubarya baryayekanyisiza abeegyesa abarikwegyesa nk'okwetenga kwabo oku kuri, 4#2 Tes 2:11. beigare amatu ngu batahurira amazima, bahabe, bakuratire ebiteekyerezo by'ebigunjano. 5Kwonka iwe, oyerinde omuri byona, ogumisiririze obusaasi, okore omurimo gw'omubuurizi w'engiri, ohikize kimwe okuheereza kwawe.

Paulo okugamba aha kufa kwe

6 # Fil 2:17. Ahakuba na mbwenu nyowe ndi haihi kutambwa nk'empongano y'eby'okunywa eshukwa aha itambiro, kandi obunaku bwangye bw'okuruga omu nsi bwiriire haihi. 7#1 Tim 6:12; Fil 3:14. Ndwaine okurwana okurungi, mperize orugyendo rwangye, ndinzire okwikiriza. 8#1 Pet 5:4. Ekitsigaire mbiikiirwe ekirunga ky'okuhikiiria, eki Mukama omucwi w'emanja ohikiriire arimpa aha kiro ekyo, kandi tiinye nyenka, kureka na boona abarikukunda okugaruka kwe.

9Oteereho, nk'oku orikubaasa, kwija kundeeba juba; 10#Kol 4:14. ahakuba Deema, ahabw'okukunda eby'ensi eby'ebiro ebi, akantsigaho, yaataaha Tesalonika; Kreskeene yaaza Galatia, na Tito yaaza Dalumatia. 11Luka wenka niwe ntsigaire nawe. Reeba Mako, mwijane; ahakuba nangasira munonga omu kuheereza. 12#Efe 6:21. Tukiko nkamutuma Efeso. 13Omu kwija ondeetere eky'okwefubika eki naatsigire Troa owa Kaapo, n'ebitabo, kandi okukira munonga oreete eby'empu. 14#1 Tim 1:20; 2 Sam 3:39. Alegizanda omuheesi w'emiringa akankora kubi munonga; Mukama waitu aryamwihura ebi yaakozire. 15Naiwe omwerinde; ahakuba akarwanisa munonga ebigambo byaitu. 16Omu kwetonganira kwangye okw'okubanza tihaine waanyemereireho, boona bakantsigaho. Ninshaba ngu batarikiturwa. 17#Dan 6:21-28; Byak 23:11. Kwonka Mukama waitu akanyemerera haihi, yangumya, ngu mbone kugambira kimwe ekigambo kya Ruhanga, Abanyamahanga boona bakihurire. Kandi nkashahurwa omu kanwa k'entare. 18Mukama waitu aryaguma ankize omu kabi koon, anjune okuhitsya obu nditaaha omu bukama bwe bw'omu iguru. Aheebwe ekitiinisa ebiro byona. Amiina.

19Ondamukize Priska na Akula kandi n'ab'omu ka ya Onesifooro. 20Erasto akaguma Korinso; kandi Trofimo nkamutsiga Mileeto arwaire. 21Oteho omutima munonga, oije ebiro by'embeho bitakahikire. Yubulo, Pudenti, Liino, Kulaudio n'ab'eishe-emwe boona baabaramutsya. 22Mukama agume n'omwoyo gwawe. Embabazi zibe naimwe.

Currently Selected:

2 Timoseo 4: RR64

Highlight

Copy

Compare