2 Samueli 5

Daudi okuba omugabe wa Israeli yoona

1 # 2 Sam 19:12, 13. Bwanyima enganda zoona eza Israeli zaashanga Daudi Heburooni; zaamugira ziti: Reeba, turi abaanyu ab'aha mara. 2#1 Sam 18:13; Zab 78:71. Omu biro ebyahingwire, obu Saulo yaabaire ari omugabe waitu, niiwe waabaire oyebembera Abaisraeli nibahurura kandi nibatabaaruka; kandi MUKAMA akakugira ati: Niiwe oririisa abantu bangye Israeli, kandi niiwe oriba omugabe waabo. 3#1 Bus 11:3; 2 Bag 11:17. Batyo abakuru ba Israeli boona baashanga omugabe Daudi Heburooni; kandi okwo niyo yaaraganiire nabo endagaano omu maisho ga MUKAMA, bakamushukaho amajuta kuba omugabe wa Israeli. 4Kandi Daudi, obu yaaza aha ngoma, akaba ahikize emyaka makumi ashatu, yaamara emyaka makumi ana ari aha ngoma. 5Omuri Heburooni akamaramu emyaka mushanju n'ameezi mukaaga naategyeka Yuda; kandi omuri Yerusaalemu yaamaramu emyaka makumi ashatu n'eshatu, naategyeka Israeli yoona na Yuda.

Daudi okukubuura Yerusaalemu

6 # Bar 1:21. Bwanyima omugabe yaimuka n'engabo ze, baaza Yerusaalemu, baarwanisa aba Yebusi, abatuuzi b'omuri egyo nsi, abaagizire Daudi bati: Ku oriba otamazireho mpumi n'ebirema, torihika aha; ahabw'okuba bakaba niba teekateeka ngu Daudi tarikubaasa kuhikayo. 7N'obu kiraabe kyabaire kityo, Daudi akakwata ekigo kya Saayuuni, nirwo rurembo rwa Daudi. 8Kandi ahari eryo izooba Daudi akaba agizire ati: Orikwenda kuteera aba Yebusi, atembe ahu amaizi garikwerekyerera, abone kwita biri birema n'empumi, ebi Daudi arikwanga. Nikyo bagirira bati: Empumi n'ebirema bitaritaaha omu nju. 9#2 Bus 32:5. Atyo Daudi yaatuura omuri ekyo kigo, yaakyeta orurembo rwa Daudi. Yaakyombekaho amaju okukyehinguririza, okuruga Miilo n'okugaruka omunda. 10Daudi yaaguma naayeyongyera kugira ekitiinisa; ahakuba MUKAMA Ruhanga ow'amahe akaba ari hamwe nawe.

11 # 1 Bus 14:1. Bwanyima Hiraamu omugabe wa Tuuro yaayohereza entumwa ahari Daudi n'ebiti by'emyereezi, n'ababaizi n'abarikwombekyesa amabaare; baayombekyera Daudi enju. 12#2 Bus 2:11; Est 4:14. Daudi yaamanyira aho ku MUKAMA amuhamize kuba omugabe wa Israeli, kandi ku aimukize obugabe bwe ahabw'abantu be Israeli.

13 # Bir 17:17. Daudi ku yaarugire Heburooni, yaahika Yerusaalemu, yaashwererayo ebindi binyanshunju n'abandi bakazi; kandi baamuzaarira abandi baana b'aboojo n'ab'abaishiki. 14Aga nigo maziina g'abaana abu baamuzaariire ari Yerusaalemu– Shamua, Shobabu, Nasani, Sulemaani, 15Ibuhaari, Elishua, Nefegi, Yafia, 16Elishaama, Eliada na Elifeleti.

Daudi okugaruka kusingura Abafilistia

17Abafilistia ku baahuriire ngu Daudi ashukirweho amajuta kuba omugabe w'Abaisraeli, boona baimuka, baaza kusherura Daudi. Daudi ku yaabihuriire, yaashuuma, yaaza omu kigo. 18Omu bunaku obwo Abafilistia bakaba baizire, bajanjaire oruhita rw'Abareefa rwona. 19#Kub 27:21; 2 Sam 2:1. Daudi yaayehanuuza ahari MUKAMA naabuuza ati: Nyinamukye, ndwane n'Abafilistia? Noija kubahayo omu mikono yangye? MUKAMA yaagarukamu Daudi ati: Inamuka, ahakuba buzimazima niinyija kuhayo Abafilistia omu mikono yaawe. 20Atyo Daudi yaaza Baali-peraziimu, yaabaitirayo. Bwanyima yaagira ati: MUKAMA ahigwire abazigu bangye omu maisho gangye, nk'oku amizi gahigura omucungiro. Nikyo yaayeteire ogwo mwanya Baali-peraziimu. 21Abafilistia baatsigayo ebishushani byabo ebirikuramibwa, Daudi n'abashaija be baabitwara.

22Ku haahingwire ebiro, Abafilistia baagaruka bainamuka, baajanjaara oruhita rw'Abareefa. 23Daudi ku yaayehanwize ahari MUKAMA, MUKAMA yaamugarukamu ati: Otainamukayo; kureka obakiikuukye, obareetwe enyima ahashungaine n'akabira k'emitugunda. 24Bwanyima ku oraahurire enshwagara aha mitwe y'emitugunda, ahonaaho oyehuute, ahabw'okuba obwo MUKAMA naaba akwebembeire kuteera engabo z'Abafilistia. 25Daudi yaatwaza nk'oku MUKAMA yaamuragiira, yaagyenda naita Abafilistia okuruga Geeba, okuhika Gezeri.

Currently Selected:

2 Samueli 5: RR64

Highlight

Copy

Compare