2 Samueli 3

1Bwanyima haabaho obweme buhango ahagati y'enju ya Saulo n'eya Daudi; kwonka Daudi yaaguma naayeyongyera amaani, enju ya Daulo yo yaagyenda neehwa amaani.

2 # 1 Bus 3:1; 1 Sam 25:43. Kandi Daudi yaazaarira Heburooni abaana b'aboojo; ow'omujigaijo akaba ari Amunooni, ou yaazaire ahari Ahinoamu owa Yezereeli; 3#2 Sam 13:37. owa kabiri Kileaba owa Abigaili, owaabaire ari muka Nabali owa Karumeeli; owa kashatu Abusalomu ou yaazaire ahari Maaka omuhara wa Talumai, omugabe wa Geshuri; 4#1 Bag 1:5; 2:13-25. owa kana Adoniya mutabani wa Hagisi; owa kataano Shefatia mutabani wa Abitaali; 5kandi owa mukaaga akaba ari Itereamu owa Egula muka Daudi. Abo boona nibo Daudi yaazaariire Heburooni.

Abuneeri okwangana na Isheboshesi

6 # 2 Sam 2:8, 9. Obweme ku bwabaire bukiri ahagati y'enju ya Saulo n'eya Daudi, Abuneeri yaayehindura ow'amaani omu nju ya Saulo. 7#2 Sam 21:8, 10. Omu bunaku obwo hakaba hariho omukazi orikwetwa Rizipa, muhara wa Ayiya, owaabaire ari omukazi wa Saulo w'ekinyanshunju. Eizooba rimwe Isheboshesi yaagira Abuneeri ati: Ahabw'enki otembire ekitabo kya muka tata? 8Okuruga aho Abuneeri yaagira ekiniga ahabw'ebigambo ebi Isheboshesi yaamugambira, yaamugarukamu ati: Beitu shi onyetsire omutwe gw'embwa y'Abayuda? Okuhitsya hati ninkiha enju ya sho Saulo ekitiinisa, na beene ishe na bagyenzi be, kandi tinkakuhayoga mu mikono ya Daudi; haza eri izooba oza kuntaho ekibi ky'okuraara n'ogwo mukazi? 9#1 Sam 15:28. Nyowe Abuneeri, ku ndaabe ntakoreire Daudi nk'oku MUKAMA yaamurahiire, 10nkaiha obugabe aha nju ya Saulo, nkata Daudi aha kitebe ky'obugabe, akategyeka Israeli na Yuda, okuruga Daani okuhika Beeri-sheba, Ruhanga akinture n'okukiraho. 11Isheboshesi tiyaabaasa kugarukamu Abuneeri kigambo kyona, ahabw'okumutiina.

12Bwanyima Abuneeri yaatuma entumwa ahari Daudi, ari Heburooni, naagira ati: Mukama w'ensi egi n'oha? Ragaana naanye endagaano, nkwatanise naiwe, nkukubuurire Israeli yoona. 13#1 Sam 18:20. Daudi yaamugarukamu ati: Ni kirungi; niinyija kuragaana naiwe endagaano; kwonka eki ndikwenda ahariiwe ni kimwe. Omanye ku otarincwa ryera, kureka biri waabanza kundeetera Mikaali muhara wa Saulo, oizire kundeeba. 14#1 Sam 18:25, 27. Bwanyima Daudi yaatuma entumwa ahari Isheboshesi mwene Saulo, naagira ati: Mpa omukazi wangye Mikaali, ou naajugire ebishushu igana by'Abafilistia. 15Isheboshesi nikwo kumutuma, akamwaka iba Palutieli, mwene Laishi. 16Kwonka iba yaagyenda naarira omuhanda gwona, amukuratiire, okuhitsya obu baahikire Bahurimu. Abuneeri yaamugira ati: Garukayo. Onu yaagarukayo.

Yoabu okuhoorera Asaheeli

17Bwanyima Abuneeri yaagira enaama n'abakuru ba Israeli, naagira ati: Obunaku obwahingwire, mukaba nimwenda Daudi ngu abe omugabe waanyu. 18Mbwenu mukikore; ahakuba MUKAMA akaraganisa Daudi naagira ati: Omukono gw'omugaragwa wangye Daudi nigwo ndijunisa abantu bangye Israeli okuruga omu mikono y'Abafilistia, n'okuruga omu mikono y'abazigu baabo boona. 19#1 Bus 12:29. Abuneeri yaagaruka yaabigambira Ababenyamiini; kandi yaaza Heburooni kugambira Daudi byona ebi Israeli n'ab'enju ya Benyamiini yoona basiimire kukora.

20Atyo Abuneeri n'abashaija makumi abiri baashanga Daudi Heburooni. Daudi yaateekyera Abuneeri obugyenyi n'abashaija abu yaabaire aine. 21Abuneeri yaagira Daudi ati: Niinyija kwimuka, nteeranire Abaisraeli boona ahari mukama wangye omu gabe, baragaane naiwe endagaano, obone kutegyeka abu omutima gwawe gurikwenda boona. Atyo Daudi yaayohereza Abuneeri; yaagyenda n'obusingye.

22Ago maguru abagaragwa ba Daudi na Yoabu, abaabaire bahurwire, baatabaaruka n'eminyago mingi; kwonka baashanga Abuneeri atakiri na Daudi, ahakuba akaba yaamwohereize, yayengyendeire n'obusingye. 23Yoabu ku yaahikire aho, naatabaaruka n'engabo ze zoona ezi yaabaire aine, baamugira bati: Abuneeri mwene Neeri aizire ow'omugabe; yaamwohereza, yaagyenda n'obusingye. 24Atyo Yoabu yaaza ow'omugabe, yaamubuuza ati: Eki okozire ki? Abuneeri mwene okwija owaawe, okamureka akagyenda? 25#Kub 27:17. Omanyire kimwe Abuneeri mwene Neeri ku aizire kukubeihabeiha, n'okukutata ngu amanye oku ohurura n'oku otabaaruka, n'okwetegyereza ebi orikukora byona. 26Yoabu ku yaarugire owa Daudi kutabaara, yaatuma entumwa, zaakurata Abuneeri, zaamugarurira aha iziba rya Siira; kwonka Daudi atarikukimanya. 27#1 Bag 2:5; 2 Sam 20:9, 10. Abuneeri ku yaagarukire Heburooni, Yoabu yaamutwara hangahari omu irembo ahagati, ngu agambe nawe omu mubonano; ku baahikireho, yaamuteera aha nda, yaamugwisaho naamuhoorera eshagama y'omurumuna Asaheeli. 28Daudi ku yaakihuriire, yaagira ati: Nyowe n'engoma yangye titurigiibwaho rubanja rw'eshagama ya Abuneeri mwene Neeri omu maisho ga Ruhanga okuhitsya ebiro byona. 29#1 Bag 2:32, 33; Zab 7:16. Kureka ruryaguma ahari Yoabu n'aha ka ya ishe; kandi eka ye teribura kubamu orikurugwamu amahira, nari omubembe, nari okugyendera aha kibango, nari ow'okwitwa rurara, nari omukuuhuzi. 30Okwo nikwo Yoabu na Abishai baitsire Abuneeri, nibamuhoorera murumuna waabu ou yaitiire omu rugamba rwa Gibeoni.

Daudi okuririra Abuneeri

31 # Kut 37:34. Bwanyima Daudi yaagambira Yoabu n'abantu boona abu yaabaire aine ati: Mutaagurre ebijwaro byanyu, mwezirikye ebiguniya, mucurire Abuneeri. Kandi omugabe Daudi yaagyenda akuratiire akatanda. 32Baaziika Abuneeri Heburooni; omugabe yaimutsya eiraka rye, yaacurira aha kituuro kya Abuneeri; n'abantu boona baacura. 33#Mub 2:15, 16. Omugabe yaacurira Abuneeri, naagira ati:

Abuneeri akaafiire nk'omushema?

34Emikono yaawe tebohirwe

N'ebigyere byawe tibikomirwe na byoma;

Nk'omuntu oku agwa omu maisho g'ababi,

Naiwe nikwo ofiire.

N'abantu boona baagaruka baamucurira. 35#2 Sam 12:17. Bwanyima abantu boona baija kweshengyereza Daudi kurya ak'okurya bukiri kare; kwonka yaarahira naagira ati: Ku ndaarye aha mugaati nari ekindi kyona, izooba ritakarengire, Ruhanga akinture n'okukiraho. 36Abantu boona baakyetegyereza, kyabashemeza; kandi ebi omugabe yaabaire akora byona bikaba bishemeza abantu boona. 37N'ahabw'ekyo aha izooba eryo abantu boona n'Abaisraeli boona baamanya ku kitarugire ha mugabe kwita Abuneeri mwene Neeri. 38Omugabe yaagira abagaragwa be ati: Ebyo nimumanya hati omuri Israeli ku hafiiremu omunyiginya, kandi obaire ari omushaija rugambwa? 39#2 Sam 19:7, 13; 1 Bag 2:5, 6, 33, 34; Zab 28:4. Kandi nyowe, n'obu ndaabe ndi omugabe oshukirweho amajuta, kwonka ndi busha; n'abashaija aba, batabani ba Zeruiya, bagumire, tindikubabaasa. MUKAMA azimuurire enkozi y'ebibi nk'obubi bwayo oku buri.

Currently Selected:

2 Samueli 3: RR64

Highlight

Copy

Compare